عودة الرادار المتحرك للطرق الصحراوية-بقلم الاعضاء

**Inteltech** · 03-05-2012 10:14 AM

احب اقولكم تجربتي الوحيدة مع الرادر وعن اللي سمعته من سواق ميكروباص بعدها بظروفها
الاولى اني تصورت رادار وخلاص كنت داخل اللجنة على الصحراوي بس الكلام ده قبل الثورة وفي اتجاه اللي رايح القاهرة ويومها كان في كافتريا وبنزينة قبل اللجنة بمسافة بسيطة رحت نازل من الطريق على الكافتريا وقعدت بتاع نص ساعة كده ولما مشيت محدش كلمني . ولما حكيت اللي حصلي ده لسواق ميكرو العفريت قلي ايه بقى قلي بسيطة يا باشا كان ممكن تنزل تحط بايد الراجل اللي بيصور عشرين جنيه وهتعدي زي الفل قلت له ازاي بقى احط في ايده عشرين وانا اساسا مش بكون شايفه انا هوب بشوف اللجنة قلي اصله ده بيكون قبل اللجنة بكيلو او اتنين كيلو بالكثير فاستغربت طبعا قلت له طب من باب اولى لما انت فالح وعارف مكان الراجل اللي بيصور ما تهدى قدامه لحد ما تعديه فسكت ههههههههههه ادي اللي حصل معايا

**beeronasr** · 07-05-2012 01:31 AM

الرادار برضو اشتغل على طريق الغردقة بقالة اسبوع -و خاصة وصلة الزعفرانة و راس غارب - و السرعة المسموحة 110

**tutankhamoun** · 07-05-2012 04:57 AM

الألتزام شئ جميل و السرعة المعقول توصلك بالسلامة
و كويس انهم بدءوا يشتغلوا و يارب كل الطرق يبقى عليها رادرات
الناس فاكرة نفسها على حلبات الفورميلا وان و الحوادث الله ينور

90 كم - س و 100 كم - ..................... سرعات معقولة جدا و خلاص يعني اللي مستعجل يبقى يخرج بدري شوية .

ما الناس برة مصر بتسوق على سرعات قليلة و مسافات طويلة و محدش بيقعد يشتكي زينا .

أحنا بنشكتي من كل حاجة و أي حاجة

الرادار مش عاجبنا ......... و الشرطة مش عاجبنا ........ و لما الشرطة أختفت ......... البلطجية مش عاجبنا ......... و لما الشرطة رجعت بالرادار تاني برضه مش عاجب

الحكومة تقول فيه فائض ......... يقولك دول بينيمونا ؟
و لما يقولوا فيه عجز .......... يقولك بيخوفونا ؟

على رأي جدتي الله يرحمها

شعب لا بيعجبه العجب ........... و لا الصيام في رجب
و صباح الكنافة .