الموضوع: الجراج وسنينه !

تابعوا معايا المشكلة واحده واحده وأتمني نلاقي حل مع بعض

واحد ساكن في عمارة ليها جراج خاص كبير كان حاجز 3 باكيات لعربياته ركن 2 و واحده كانت في التوكيل ومكانها فاضي جه جار ليه ركن عربيته في مكانها وسابها و '' خلع '' أو إختفى أو سافر المهم العربية لزقت وصاحبها مش موجود

الرجل بكل ذوق وإحترام قال خلاص مش هنعمل مشاكل مع الجيران بسبب جراج ومش هدفع للمكان دة إلى لم يفضى وأحط عربتي فيه

بعده بيومين لقى وحده ست على كلامه فيها برود الدنيا كله ركنة عربيتها ورى عربياته الاتنين التانيين بالعرض وسايبه له من اليمين ومن الشمال فراغ يطلع منه بالعافيه '' أنا شفت المنظر بعيني '' والراجل كل مايطلع يعمل اكروبات علشان يطلع أي عربية وبهلوان علشان يدخلها تاني .

طلع لها شقتها وقاله لو سمحتي مش ذنبي انك ملكش مكان في الجراج أنا عربياتي كدة هتتحك ده غير تعب الاعصاب في الركنه وأنا داخل أو خارج قالتله مليش دعوة السايس إلي وقفني هنا ودة جراج العماره وأنا ساكنه في العماره والمكان دة عاجبني !!

كلم السايس قال له محصلش د هي إلي بتيجي كل يوم وتركن هنا ومبتعبرش حد ... الراجل بردو لأنه مبيحبش المشاكل قالها طيب لو سمحتي سيبي العربية مش معشقة على الاقل علشان السايس يبعدها وأنا داخل أو خارج وبعدين يقدمها تاني ردت وقالت بكل برود وجبروت


أنا مسبش عربيتي مموره طلع إنت عربية من عربياتك ودخلني مكانها في الباكية وخليها هي بلعرض مموره السايس يزقها!

الراجل كلم المسؤول عن العمارة قال له أصلها '' بتربي يتامى '' ومش عايزين نزعلها !!!! الراجل قال يا سيدي وأنا مالي هو أنا تعديت على حقوق اليتامى في حاجة دلوقتي أنا عاوز حقي في إن محدش يسد عليا الجراج بتاعي !

بعد كلام كتير معها من مسؤول العمارة ومن السايس ومن صاحب الباكيتين الست ولا حياة لمن تنادي لحد ماحصل المحظور وإتخبطت عربيته '' bmw الفئه الخامسه الجديده '' هنا الراجل إتنرفز جداً وزعق وعلى صوته ولم العماره كلها وكلهم غلطوها وقالولها حرام عليكي دي عربية بنص مليون جنيه ارحمي الراجل شوية هو علشان مؤدب وبيتكلم بالذوق نطنشه !

المهم من كام يوم الست عملت تحرك أخيراً وشالت العربية من ورى الباكيتين لكن حطتها فين بقا ........ مكان عربية من عربياته !!!!!!!! لأن طبعاً دايماً هو خارج بوحده منهم هو يخرج يرجع يلاقي دي حطة عربيتها في باكيته وجيباها على أقصى اليسار قال اه وقفها جانبي والمكان بالعافية حتى لو دخل عربيته لزم ينط من فتحه السقف لأن مش هينفع يفتح الباب وفي الاول وفي الأخر الباكيتين بتوعوا ليه هي تجيب نص عربيتها في باكية منهم وتضيق عليه !

الراجل إتخنق وقلي أنا مش عرف اتصرف مع الست دي ازاي بصراحة خصوصاً إن لا السايس ولا مسؤول العماره بيعملو أي تصرف جاد و منابني إلى إن عربيتي إتخبطت والست بتتصرف ولا كان أنا إلي معتدي على مكانها مش العكس وللعلم مفش أي خلاف شخصي بينهم قبل الموضوع دة .

حد عنده حل !