الموضوع: إستطلاع: هل عمرو دياب و جيلة ضحكوا علينا؟

المشاركة الأصلية كتبت بواسطة micromoud

انا مقارنتش انا كل كلامى داخل نطاق ان اى اغنيه مهما ان كانت حلوة طبيعى جدا انك مش هتسمعها كل يوم ... وبالتالى ممكن اعرف مقارنة حضرتك بالتوكتوك والمرسيدس بناء على ايه ؟؟ بناء على الصوت ولا الالحان ولا التوزيع؟؟

بناء على كل شىء ....
مرة سمعت الملحن و المغنى عصام كاريكا بيقول:
الناس اللى بتتهمنا أن أحنا عكاكين وبنعمل الأغنية فى نص ساعة مايعرفوش أن أحنا بنعمل الأغنية فى 5 دقايق و بالتليفون كمان يعنى المؤلف يقولى الكلمتين على الموبايل فى دقيقتين ألحنها (هو عشان متخلف فاكر أنة كدة واد شاطر ومفيش زية) ....

معظم الأغانى بتاعت الفترة دى أتعملت كدة ....
زمان كنا نسمع أن فى أغنىة ممكن تكتب و تتلحن وتتوزع فى سنة كاملة ....
كان الناس عندها أخلاق وضمير و بتعمل كل حاجة بأتقان عشان كدة أغانيهم عايشة معانا لحد النهاردة ....

وأنا معاك أن أى أغنية مهما كانت حلوة طبيعى أنك متسمعهاش كل يوم و تزهق منها ....
بس الفرق ما بين الأغانى القديمة وعك التمانينات أنك ممكن تزهق من محمد فوزى النهاردة بس هتشتاق تسمعة الأسبوع الجاى لكن لو زهقت من أغنية لعمرو دياب النهاردة مش ممكن هتسمعها ولو بعد 10 سنين (دة اللى بيحصل معايا ممكن يكون الوضع دة مختلف مع ناس تانيين الموضوع فى الأول والأخر مسألة أذواق) ....

المشاركة الأصلية كتبت بواسطة Screenplays

حرام عليك ... عمرو دياب ده اسطوره ... و الله اغانيه كلها تتسمع لحد دلوقتي ... دياباوي و افتخر هههههههههه

Screenplays حبيب قلبى أنت فين من الصبح يا عم؟؟!!
أول مرة ميبقاش رأينا مش زى بعض ....

عمرو دياب كنت زمااااااااااان بعتبرة أسطورة ....
بس رأيى دة أتغير تمامآ لما بدأت أسمع أغانى أجنبى ولما كبرت وبدأت أسمع الأغانى المصرية القديمة ....

المشاركة الأصلية كتبت بواسطة ramy01011

طبعا بنسمعها غريبة انا اساسا اول مرة اشوف حد بيقول كدة انا اللي اعرفه عن نفسي و عن ناس كتيرة اعرفهم بيسمعوا عمرو القديم اكتر بكتيير ما بيسمعوا شرايطة الجديدة

فعلا كلامك سليم ان بسمع كل القديم احسن من الجديد وعلى طول مش اوقات

المشاركة الأصلية كتبت بواسطة ghosts

screenplays حبيب قلبى أنت فين من الصبح يا عم؟؟!!
أول مرة ميبقاش رأينا مش زى بعض ....

عمرو دياب كنت زمااااااااااان بعتبرة أسطورة ....
بس رأيى دة أتغير تمامآ لما بدأت أسمع أغانى أجنبى ولما كبرت وبدأت أسمع الأغانى المصرية القديمة ....

لاحظ في فرق سني 8 سنين فاكيد في اختلاف و انا يستحيل اسمع الاغاني القديمه لانها بتنيمني هههههههههههه

الاغانى دى حالة يعنى مثلا انا كنت وانا فى ثانوى بنتظر اى شريط ينزل وممكن اروح اسال مرتين ةثلاثة فى اليوم لحد الراجل مايزهق منى واشترى الشريط وابقى فرحان قوى النهاردة مع نهاية الثلاثينات من عمرى بقيت مش من هواة السمع الا قليل يمكن وانا سايق او كل فترة كبيرة اسمع حاجة لكن الاغانى دى بيبقى ليها ذكريات لدرجة كنت مشغل الراديو فى السيارة وكان يوم مخصص لاغانى الثمانينيات والتسعينيات ياه كنت فرحان قوى كل اغنية ليهاذكرى معايا الثانوى الجامعة الرحلات السفر بعد التخرج الحب الفراق والضيق الفرح وكده لدرجة مكنتش عايز انزل من العربية لدرجة طلعت الشغل زعلان وبقول للسكرتيرة بتاعتى قالتى بسيطة اشغلك الاذاعة على النت لانها كانت لسه بتسمعها والله قعدت اكمل البرنامج وكانت مبسوط قوى لا اكيد مضحكوش علينا هما فرحوا معانا ولعبوا معانا وفرحونا فى رحلاتنا وفى خروجنتا وفى الحب وفى الفراق وحتى فى المذاكرة بس انا كنت من هواة حميد ثم عمرو وبعدهم باقى الشباب اما الان يمكن بسمع شيرين عبد الوهاب وعمرو دياب

انا من زجهة نظري كل وقت و ليه اغانيه يعني انت في الوقت ده كنت بتبقي سعيد لما بتعلي الكاسيت و تسمعهم و دلوقتي ممكن نوع تاني من الاغاني يسعدك انما اغاني عمر و دياب ارحم بكتير من الي بيغنو دلوقتي علي الاقل صوته مميز و كان رمز للموضه اي حلاقه يحلقها كانت الشباب تقلده
و لحد دلوقتي اغانيه لما بتتذاع الناس بتبقي مبسوطة بيها هو او محمد فؤاد او عامر منيب او فارس و ايهاب توفيق و حميد الشاعري و علي حميدة