الموضوع: الحمد لله علي نعم الله وفضله علينا

المشاركة الأصلية كتبت بواسطة lonedoctor

انا استشارى باطنة ومن اول المشاركة وعرفت طبعا انه جيليان باريه سيندروم guilian barre syndrome والعلاج فعلا زى ما الاخ الفاضل قال جلوبيولين وومكن بلازما فاريسز وده التهاب اعصاب بيحصل فى بعض المرضى بعد اى التهاب فيروسى ودى حالات بنشوفها كتير عندنا فى السعوددية بس ما اعرفش انه الطب تدهور فى مصر واصبح تشخيص حالة زى كدة عامل مشكلة مع الدكاترة--المهم اعتقد انه لم ياخذ العلاج المناسب لانه الجلوبيولين بنعطيه ثلاث ايام بس موش الفترة دى كلها والاهم متابعة عضلات التنفس لانها لو تاثرت ممكن يحتاج تنفس صناع لغاية لما تتعافى --الموضوع هيطول شوية لغاية الشفاء الكامل (4 اسابيع تقريبا)
تقبل تحياتى

اولا ألف الحمد لله على سلامة الطفل ويارب دايما في صحة وعافيه وربنا يشفي ويعافي كل مرضى هذه المتلازمه....

حبيت اعلق تعقيبا لكلام دكتورنا..
هو الطب تدهور في مصر جدا جدا جدا فعلا للاسف الشديد
انا لسا مخلص سنة الامتياز ولله الحمد قضيت جزء منها في السعودية واكتشفت ان اللي شفناه في مصر من الطب يعتبر جلدة كتاب قديمه ومهربده بالنسبه للطب اللي شفته في السعودية (بدون مبالغات!!)!!!!
لكن مع كل ده,, معتقدش ان اي حد مر على ابو الريش ولو لاسبوع واحد فقط مش هيعرف يقول ان دي جيليان باريه سندروم
يعني الحق يقال الحاله مش نادرة قوي كده بالعكس موجوده وياما شفناها واحنا فسنه خامسه
وفعلا في حالات (نادرة) مش بتخف منه وفي حالات اندر واندر بتتوفى منه (نتيجه شلل عضلات التنفس)
والحمد لله انها جت على قد كده
يمكن الحالات دي صعب تشخيصها في محافظات بعيده عن القاهره بسبب ان مصر مفيهاش رعاية طبية اوليه جيده...

وبالنسبالي مش هنا المأساة!!
يعني ممكن فعلا حد مشافش الحالة دي قبل كده فميعرفهاش..
المأساة الفعليه تكمن في حاجات ابسط من كده بكتير بتفوت وتعدي ومبتتشخصش خالص غير في مراحل متأخره وتكون علاجها اصعب بكتير من لو كانت اكتشفت فيما قبل...
في ناس هتلومني عالكلام ده ويقولولي احنا اجمد ناس (ركز على كلمة يقولولي) ولكن هو ده الواقع
العالم كله بيسبقنا واحنا لسا زي محنا مكاننا وربنا يسترها علينا مش عارف هتوصل لفين بعد كده...

هتحف سيادتك بقصة بسيطه بما ان حضرتك استشاري باطنه..
خالتي مريضة ازمه من وهي صغيره من عمر 4 سنين وحاليا عندها حاجه واربعين سنه
فيوم من ايام الشتاء البارده جدا جالها الازمة وتصاحب معاها التهاب شعبي رئوي والذي منه
واخذت العلاجات والذي منه واتحسنت لكن مرجعتش زي الاول
بقت حالتها تتحسن وتسوء وتتحسن وتسوء
للاسف كنت بره مصر في هذه الاوقات ومعرفتش بدري
راحت لاحد الزملاء طلب منها اشعه مقطعية للصدر (بدون ميطلب حتى اكس راي عادية الاول)
عملتها
وكما يعرف الاطباء مريض الازمة قد يكون عنده جزء او اجزاء من رئتيه متليف بحسب نوع الازمة وعمرها والعلاج متى بدأ وهل كان المريض ملتزم بعلاجه ... الخ
طبعا الزميل شاف التليف قالها عندك درن ومحتاجه استشاري صدرية
تصادف تواجدي بعد 5 ايام من الكلام ده
فقابلتها لقيتها حزينه ومهمومه جدا
خير؟؟ حكتلي الموضوع
فضحكت قلتلها هاتي الاشعه المقطعيه
بصيت ملقتش جديد في الاشعه التليف الموجود كسابق عهده من اكثر من 10 سنين ثابته
فضحكت وقلتلها انتي زي الفل ومفيش اي حاجه جديده في الاشعه دي عن الاشعات بتاعت زمان
تهللت اساريرها شويه وقالتلي معقول؟؟ امال ده طلب مقطعية ليه؟؟
قلتلها بيروش عادي مش هيخسر خليه عندك واهو base line ممكن نجعله فيما بعد لكن غير كده مفيكيش الا العافيه وانتي كويسه
وسبحان الله من تاني يم اتحسنت جدا وعلى 3 ايام كمان رجعت تمارس كل نشاطاتها وبلا ادنى مشكله بدون علاجات اللهم ان نفسيتها كانت مأثرة على الوضع ككل بسبب طلب زي ده....

فالشاهد ان الحاله واضحه وضوح الشمس بس الزميل بيطلب حاجات مش محتاجها وبيكلف العيانه ويتعب اعصابها عالفاضي كله والله والله المستعان
اكيد القصه دي مش معضله بالنسبه لاي حد مش محتاجه حد كبير اصلا والله المستعان

والطب ربنا ينتعه بالسلامه في مصر الحبيبه


تحياتي