توكيل ابو رواش ( ارجوكم القراءه للعظة )
اولا انا اسف اذا كنت بكتب ليكوا الموضوع ده لانه للاسف موضوع يندى له الجبين لما نشوف ازاى اننا كمواطنين مصريين بيضحك علينا وبنتسرق ونتزل من مواطنين مصريين برضة المهم علشان مطولش عليكوا انا هحكى ليكوا تجربتى بكل صراحة ووضوح فى توكيل هيونداى ابو رواش وطبعا مروحتش هناك غير لما اشتكيت من عربيتى الفيرنا 2008 وكنت عامل موضوع بشكوتى اسمه فيرنا 2008 وابداع التوكيل فيها وطبعا لما اشتكيت للشركة كلمونى كذا مره وحددوا لى ميعاد علشان اروح ويشوفوا لى العربيه فيها ايه وطبعا من سذاجتى صدقت انهم ممكن يعملوا حاجة تعوضنى عن ماساتى فى توكيل قليوب وانى هخرج من عندهم العربيه زيرو ومش هعرفها ولكن وللماساة وللاسف حصل الاتى
1 - وصولى الساعه التاسعه الا ربع وانتظارى مايقرب من نص ساعه علشان حد يرضى يطلع ويشوف معايا العربيه والاستقبال طبعا مكون من بنتين مش بيعملوا اى حاجة غير انهم بيتكلموا مع بعض ويضحكوا واول ما تدخل عليهم علشان تسأل على حاجة يدوك رقم ويقولوا لك اتفضل انتظر لما رقمك لما ييجى ورئيسهم طبعا واقف يتكلم معاهم وهاتك ياضحك معاهم وسايب الناس تولع وتتخانق والمفروض انه رئيس قسم الاستقبال المهم انتظرت رقمى لما ييجى وطبعا قعدت اكلم نفسى واقول لما المهندس ييجى هقوله كذا وكذا وكذا وهيطلع يجرب العربيه معايا وعمال احلم بقى وللصدمه الشديدة طلع لى مهندسة او معرفش وظيفتها ايه غير انها لابسه جاكت عليه كلمه هيونداى وقاعده على المكتب المهم قلت ياواد عديها مش لازم تحرجها وتقولها ان عايز مهندس جرب وشوفها هتتعامل ازاى مع العربيه المهم خرجت الست هانم معايا وطبعا فى اثناء خروجها قعدت تضحك مع فلان وعلان وسابتنى روحت على العربيه وهى جت ورايا المهم انا متاخرتش وطبعا اول ما شافت العربيه نزل عليها الوحى فجأة وكانها قدام مفاعل نووى وقعدت تبص للعربيه ولا مخرجين السينما وقعدت تعمل بوظات من فوق لتحت وطلعت الورقه اللى بتكتب فيها الشكوى واللى مرسوم عليها شكل العربيه طبعا قالت لى ممكن تفتح لى الكبوت ؟؟ وهى واقفه تتفرج مش عارف ليها جايز مش طايله !!! المهم وخدت لفه حلوة حولين العربيه وطبعا منهم لله اللى بيركنوا ورايا وقدامى الاكصدام فيه خربوش فى النص ورا منهم وخربوش فى الزاوية المهم قالت لى العربيه مخبوطة من ورا قلت لها ده خربوش مش خبطة قالت لى يعنى انا بعرفك ودورت العربيه بتاع دقيقه وقعدت تسمع صوتها وهى دايرة ( الصوت طبيعى جدا ) قالت لى ياه ده سير الكاتينه عندك عايز يتغير ( من الصوت عرفت !! ) المهم قالت لى ماشى خلاص ومشيت وسابتنى اقفل العربيه ولما دخلت لها كانت المفاجاة بقى وقالت لى العربيه هتكلفك فى حدود 3000 جنيه ليييييييييييييييييييييييي يييه قالت لى سير الكاتينه مغيرتوش ليه قلت لها السؤال ده لي انا ولا لبتوع قليوب اللى كنت عندهم من 500 كيلو فى صيانه 25000 كيلو معملوش حاجة غير الزيت كالعاده وفلتر الهواء المهم قلت لها يعنى السير ب 3000 جنيه قالت لى لا ب 900 جنيه والدبرياج ب 1600 جنيه والباقى بقى مصنعيات ولو فى حاجة تانيه ممكن تتغير هنقولك عليها وقلت لها هو الحاجات دى ظهرت فجاة مقالوش عليها فى قليوب ليه قالت لي انا مليش دعوه ببتوع قليوب احنا عندنا هنا ناس متخصصة ( ركزا فى الكلمة دى كويس هتعرفوا معناها بعدين ) المهم قلت لها يعنى هما مش بيفهموا فى توكيل قليوب قالت لى ماليش دعوه المهم قلت لها يعنى انتوا مستنيين لما اخرج من الضمان علشان اسمع كل ده لكن جوة الضمان مش بسمع غير العربيه زى الفل ياباشا وغيرنا زيت وفلتر الهواء والبنزين !!!!!!!!!!!!!!!!!!!!!!
المهم قلت لها ماشى غيرى وطبعا مفيش امل لتخفيض التكلفه المهم مفيش بعد نص ساعه بالصدفه بكلم واحد شغال فى هيونداى نفسها وقالى ايه ياعم الاسعار دى الكاتينة كلها على بعضها بالدبرياج مش هتزيد عن 1000 جنيه بره ؟؟؟ يعنى الموضوع نصب قالى خش قولهم انك عايز تسحب العربيه والكلام ده بعد نص ساعه بس ؟؟ المهم روحت وسالت على العربيه قالوا لى ان العربيه شغالين فيها يعنى سراع اوى ومصدقوا لقوا صيده طبعا ماهو 3000 جنيه مبلغ مش قليل وطبعا فضلت قاعد من الساعه 10 صباحا من ساعة مابداوا فى العربيه ولحد الساعه 4 الا ربع العصر وحصل فى ال 6 ساعات دول المهازل الاتيه الاتىة
1- عميل بيزعق ويقول انتوا حرامية ازاى العربيه تتفتح وتتقلب وطبعا مدير الاستقبال بكل برود احنا ملناش دعوه احنا قلنا شيل الحاجة من العربيه واى حاجة فى العربيه تبقى مسؤليه العميل من احنا فالراجل قاله انتوا قولتوا شيل الولاعه بس لكن مش لدرجة انى افتح التابلوه الاقى فلاشة متاخذة والفلوس الفكة كمان اتخذت قالوا لو احنا ملناش دعوه قام الراجل قالوة انتوا حرامية ونصابين وبتشغلوا عندكوا ناس حرامية فالمدير قالوة احنا عندنا احسن ناس ( فاكرين كلمة ناس متخصصة )
2- عميل تانى بيزعق ويقول الولاعه اتخدت والمهندسة ترد عليه احنا ملناش دعوه دى مسؤؤليتك احنا قلنالك خد الولاعه انت مرضتش ؟؟ المفروض يعنى ان احنا داخلين الحرفيين مثلا مش توكيل محترم قالها انا مش هستلم العربيه غير بولاعه قامت مشوحة بايديها وقالت انت حر خليها مركونة قالها انتوا حرامية قامت لفت ليه وقالت له متعليش صوتك واللى عندك اعمله علما ان العميل سنه فى حدود 50 سنه والمهندسة ف حدود 30 سنه
3- عميل بيزعق ويقول قولتوا لى ان العربيه محتاجة بطاريه وبقالى 3 ساعات قاعد علشان بطاريه وبعد كل ده يوقولوا لى لسه العربيه متعملتش علشان مفيش بطاريه طيب سايبنى قاعد ليه كل ده محدش قالى ليه من الاول ولما حاول يسحب العربيه برضه رفضوا وقالوا له العربيه مرفوعه ونص ساعه وتخلص وخذوا الراجل فى الاوضه اللى جوة ومشفتوش تانى
4- واحد بيزعق برضه ازاى ادخل علشان اغير زيت 5000 وبعد ساعتين ونص تقولوا لى احنا خلصنا والفاتوره مكتوب فيها زيت 10 الاف بناء على ايه هو بمزاجكوا بتحطوا الزيت اللى انتوا عايزينه وبرضه كملوا خناقه
5- العبد لله انا العربيه زى ماقلت لحضرتكوا كان فيها خربوش ورا فى النص وفى الزاويه ؟؟ العربيه استلمتها فيها كحته وتقشير جامد ورا فى النص وخبطة فى الزاوية غير اللى كانوا موجودين فى الاول وفى الرفرف اللى قدام حكة تانيه ولما الفنى اللى وصلها لى نزل يجرى وسابها ندهت له وقلت له العربيه فيها خبطات فضل واقف بعيد ومش عايز ييجى ولما بدات ازعق والناس تتفرج عليا جه وهو قرفان بالعافيه وقالى ماليش دعوه شوف المهندسة اللى استلمت منك العربيه وقول لها وطبعا الهانم لما ندهت لها جت وقالت لى هى كانت مخبوطة من الاول قلت لها معلش دى عربيتى وانا حافظها شبر شبر والخبطات دى ماكنتش موجودة قالت لى امال انا معلمه على الحاجات دى فى الورقه ليه قلت ليها متستصحيش عليا انتى معلمه على الخبطات اللى تحت مش اللى فوق قالت لى انا مش بستنصح انا بشوف شغلى قلت لها ماشى العربيه دى اتخبطت جوة قالت لى مفيش حاجة تخبطها فى الارتفاع ده وطبعا محاولات يائسة منى لاثبات صحة كلامى
ودة كان يومى المتعب فى التوكيل واللى مش هسيبهم والمرة دى هشتكى للشركة العالميه نفسها بس الاقى العنوان بتاع الايميل بتاعهم وهنشوف بقى احنا ولا ابو رواش بس ارجوكوا اللى يعرف يقولى على الايميل او طريقه اخرى للشكوى وانا هتكفل بتنفيذها
المهم انا حبيت بس اعرفكوا ازاى الناس دى ببتعامل مع العملاء ودة كل اللى حصل قدامى مابالكم بيحصل ايه كل يوم
