الموضوع: حكايتي مع الـ 128انتاج واخراج وتمثيل ( كورسير )

مش عارف مش مرتاح للحلقة التانية ابدا
اكيد حريم السلطان ارحم

هههههههههههههه موضوع جميل في انتظار الحلقة التانية من اولها كدة وش سلندر دة المسلسل اللي لما اتعرض مات المشاهدون جميعا

معلش يا رجالة اتاخرت عليكم كعادتي اللي انا بقيت بكرها فعلا وان شاء الله اروح البيت بس وهبدء في الحلقة التانية ومتقلقوش مش هتبقي بالليل اوي

مش عارف اضيف الحلقة التانية

طبعا بعيد عن حريم السلطان ونور ومهند وادهم والمسلسلات اللي مبتجبش فلوس دي

نكمل الحلقة التانية بأسم صراع مع الدائري


بما اني من عشاق الدائري علي رأي الحاج والدي قررت اني اخد الحاج والحاجه عندي واطلع بيهم علي اكتوبر عن طريق الدائري مرورا بالمحور المهم توكلت علي الله وحاسس ان في حاجه غلط في العربية قولت يا واد طنش خالص وكبرت دماغي طلعت من مسطرد علي الدائري وسامع صوت مش تمام قولت يا واد طنش خالص وكملت طريقي عادي جدا ولقيت العربية بقيت بتطلع اصوات غريبة قولت يا واد طنش خالص ولا اكنك سامع حاجه لحد قبل نزلة اسكندرية الزراعي ب 3 كيلو تقريبا وسمعت طراخ والعربية وقفت مره واحده زي اللي قلبه وقف من الخضه في الجهة الشمال من الطريق وفي منزل يعني اللي طالع مش شايفني قولت عنب اوي كدا نزلت الحاج والحاجه من العربية وقفتهم في الجهة اليمين وقولتلهم اتفرجوا علي العربية لو اتلطشت لحد ما اشوف ميكانيكي يجي يشوفلنا حكيتها ايه وطبعا انا علي الدائري والساعه 1 الظهر وفي الصيف والواحد يعني مش طايق نفسه روحت عملت فيها اللي جاب الديب من ديله ونطيت من فوق الدائري ومشيت بتاع 500 متر علي ما لقيت ميكانيكي فاتح قعدت اتحايل عليه قالي والله ما اطلع الدائري ولو هتديني مليون جنيه ليه يا ابا الحاج كدا هو انتا معندكش ولاد بلاستيك وقعدت اقوله طب علشان خطري معايا 2 كبار في السن ومينفعش اسيبهم كدا قالي ابدا وراح دلني علي ميكانيكي بعديه يجي ب 300 متر وقالي ده ممكن يطلع معاك روحت جريت طبعا عليه وقولتله الموضوع كذا كذا تعالي شوفلي الدنيا فيها ايه ابوس ايدك قالي العربية فين قولتله في الجنب الشمال من الدائري قالي طب روح زقها للجنب اليمين وتعالي قولي انك نقلتها لاكن اني اروح اشوفهالك في الجهة الشمال انسي انا مش مستغني عن روحي واساسا ادعي ربنا انك تروح تلاقيها واقفه مكانها اساسا متكونش عربية زحفتها 4 كيلو قدام قولتله انتا بضحي بيا يا معلم قالي انتا حر وروحت جريت علي العربية وتصلقت الجبل اللي بيطلع علي الدائري وطبعا عديت الدائري وانا بقرا الشهداتين

ووصلت للعربية لقيت الحاج والحاجه قعدين فيها قولتلهم انتوا بتعملوا ايه لقيتهم بيصلوا الظهر جوا العربية قولتلهم يعني حبكت دلوقتي يا جماعه مش خايفين علي نفسكوا روحت منزل الحاجه من العربية عديتها للبر التاني واتفقت انا والحاج اننا نستغل المنزل اللي في العربية وازقها للجنب اليمين والحاج يشاور للعربيات انها تتفاداني وطبعا بكل عزم وقوة روحت استغليت جزء من الثانية الدائري في فضي وادي زوبه زقه من اللي قلبك يحبها لقيتها جريت مني والباب اتقفل روحت طاير وراها جري ونطيت من الشباك ورافع الهاند بريك قبل السور بتاع الدئري اللي في الجنب اليمين لانها خلاص كانت هتنط من فوق الدائري
وكان هيبقي منظري وحش والناس بتتفرج عليا كدا





حسيت ساعتها اني خسيت بتاع 30 كيلو من الجري اللي جريته وروحت جاري علي الميكانيكي الي خدني بعربيته وطلعنا علي العربية وشافها لقا مجموعة الكهربة ضربت وروحنا قعدنا ندور عليها لحد ما اشترينها وركبها وطلعنا كملنا مشوارنا وانا شكلي بقيت عامل زي اللي بيلمعوا جزم وطبعا الحاج طول الطريق لسه يا واد ناوي تطنش خالص

بعتذرلكم يا جماعه لو في اي اخطاء املائية في الموضوع لحسن انا لسه مخدتش نحو الامية





المغامرات لسه منتهتش محدش يزهق ده وهديكم نبذه مختصرة عن الحلقات الاخيرة واللي هتكون ببتكلم عن

بيع ال 128 سنة سجن