السلام عليكم انا عضو جديد في المنتدي وبصراحه انا سعيد جدا بانضمامي لاني متابع المنتدي من فتره وكل الناس هنا بصراحه كانها اسره واحده وكل شخص بيحاول يفيد الاخرين علي قد مايقدر وده شيء رائع وانا ان شاء الله هاستلم عربيتي بريليانس جالينا 2012 اكسكلوسيف خلال ايام ولاحظت انا اغلب مواضيع المنتدي عن frv , fsv فهحاول ان شاء الله اكتبلكو تقرير شامل ومفصل عن العربيه ممكن حد يستفيد بيه طبعا كلكم عارفين المواصفات المبدئيه انا ان شاء الله هاعمل التقرير اول ما استلمها عن الشكل الخارجي وبالصور وبعدين عن العربيه من جوه والكماليات بتاعتها وبعد كده عن الاداء والموتور وفترة التليين وبعدها عن الملاحظات بعد التليين ويارب اقدر اعمل حاجه تكون مفيده وتعجبكم
والسلام عليكم ورحمة الله وبركاته

اول حاجه لازم اقر ان التقرير ده مش بتاعي لوحدي التقرير ده جهد متكامل لكتير اوي من رجالة البريليانس وكل واحد فيه ضاف حاجه جديده ليه وخلاه تقرير جميل انا بقول الكلام ده لان حق الناس دي ومعلش مش هاقول اسماء علشان محدش يزعل لكن الناس لما هتقراه هاتعرف اد ايه ان في ناس كتير تعبت في التقرير ده وانا هحاول تنسيقه علشان يبقي احسن

الناس الجديدة اللي اول مرة تقرا التقري هاتحس احيانا انه متلخبط وده لان في تعديلات حصلت علشان يكون احسن بعتذر لاي واحد انا عدلت مشاركاته وياريت يسامحني لو اضايق بس انا قصدي انه يكون افضل لان بجد التقرير ده شامل وفي كل شيء عن الجالينا بشكر تاني كل الناس اللي ساعدت في هذا التقرير ويارب الكل يستفيد منه












































اقتباس المشاركة الأصلية كتبت بواسطة el_lod_81 مشاهدة المشاركة
أعتذر عن التأخير و أيضا على جودة الصور حيث أننى قد قمت بتصوير السيارة قبل تنظيفها ولكنى كنت قد وعدت بالأمس برفع الصور. و على أى حال اٍذا كان هناك أى ملاحظات فسوف أقوم برفعها مرة أخرى بعد تنظيفها.
و اليكم الصور و أرجو أن تنال اٍعجابكم:

أولا
الصور من الخارج:





ثانيا
الصور من الداخل:




























و هذه صورة الموتور:



صورة الشنطة من الداخل:



صورة العجل:



وهذه صور التقطت بالليل:






هذه صور من الداخل أيضا:











وشكرا جزيلا لرفع الصور

وده رابط عليه البروشور بتاع الجالينا وفيه كل المواصفات الفنيه والكماليات بالتفصيل مع ملاحظة ان الضمان بقي تلات سنين فقط



http://www.herosh.com/download/10917...logue.pdf.html

قبل اي شيء لازم اقول لنفسي واقولكم اننا بنتكلم عن عربيه صيني تجميع مصري وفيها كل الكماليات وسعرها في حدود 100 الف جنيه يعني اللي مستني قنبله ميكملش التقرير لكن اللي عايز كلام موضوعي وتقييم بالعقل والمنطق يتفضل.


في البدايه انا استلمت العربيه من حوالي 10 ايام وعملت مسافه 1200 كيلو اول ماركبت العربيه بجد حسيت اني مرتاح ومقتنع انا مش هحاول انقل لحد الاحساس ده لكن انا هانلكوا صوره كامله.


لو بدانا بالفيرست لوك العربيه شكلها حلو جدا والتصميم الخارجي كويس وملفت للنظر وطبعا الشيء الاساسي في الشكل هوه الطول الواضح

بالنسبالي وش العربيه تحس نوعا ما ان لي جاذبيه ولكن تحس انه منخفض شويه الارتفاع كويس وشكل العربيه من ورا عاجبني بصراحه والفوانيس الخلفيه بالنسبالي اجمل واشيك من الاماميه تحس الفوانيس الاماميه مطفيه شويه

الدهان كويس ولمعته حلوه جدا وبيعكس الصوره اللي قدامه لو في اضاءه - ممكن تشوف نفسك -

اول ماتفتح الباب هاتلاقيه تقيل - علي فكره صاج العربيه محمل وقوي ماتحسش انه بيطبق لمجرد الضغط -
لكن ضايقني الريموت لانه خفيف ومش في المفتاح كمان اضايقت من اكرة الباب لانها من النوع اللي المقبض من تحت لفوق مش اللي بيتشد لبره-

اول ماتقعد علي كرسي السواق هاتحس يعني ايه الصالون الواسع ويعني ايه الراحه في القعده من غير ماتفكر في اللي قاعد وراك

هاتلاحظ ان فرش الكراسي يعتبر كويس جدا لكن فرش الباب والتابلوه اقدر اقول عليه تعبان

هاتلاحظ وانت قاعد مسند الذراع وده شيء مريح بصراحه

عربيتي اكسكلوسيف وكرسي السواق كهرباء في تماني اتجاهات وده شيء لذيذ جدا مع اني كنت باعتبره رفاهيه لكن مريح خصوصا وانه بيتحرك بسرعه فيخليك مركز في السواقه

مقبض الفتيس والطاره الجلد بتاعهم احسن شويه بس الطاره كبيره نسبيا لكن العدادات واضحه من خلالها كمان من وجهة نظري ان العدادات منظرها قديم شويه

سقف العربيه عالي وبعيد عن الراس كمان في حركه حلوه قوي في السقف بالنسبه للي قاعد في الخلف هتلاحظ زي تفريغ للسقف في منطقة الراس - السقف مرفوع شويه يعني اللي قاعد وره حتي ولو طويل راسه مش هاتخبط في السقف

حاجه تانيه صحيح خامات الصالون مش اوي لكن الفينيش ممتاز جدا جدا جدا بمعني انك هاتحس بالتناسق في كل حته مثلا الدراع اللي فوق الزجاج علشان تعلق في الشماعه او تمسكه بايدك هاتلاقيه بسوسته ومحطوط جوه تجويف كانه مش باين غير لما تشده والخطوط الداخليه كلها متسقه مع بعض

تعالو بقي قبل ما ندور العربيه نبص عليها تاني من بره هاتلاحظ فعلا ملاحظات بسيطه ولكنها مستفزه بالنسبه للكبوت مع جسم العربيه هاتلاحظ انه مش حابك عليه وكمان تبييت الفوانيس الامامي والخلفي في فواصل بسيطه بين الفانوس والصاج لكن قفلة الابواب كويسه جدا بصراحه وفتحة السقف تمام مع ان الشكل بتاعها يحسسك انها ممكن تسرب ميه لكن هاكلكمكو في موضوع العزل ده بعدين تعالو بقي نقعد ع الكرسي وندور العربيه

اول ماتفتح الكونتاكت هاتلاحظ انوار الاي بي اس والاير باج والصيانه وطلمبة الزيت ووووو
واول ماهتدور هاتحس ان المكنه لقططت بسرعه جدا وصوتها بصراحه هادي وجميل ومنتظم العربيه بتسخن بسرعه اركن رجلك الشمال خالص وعلي فكره لو طولك في حدود 180 سم ده معناه انك ممكن تفردها للاخر -بجد مش هزار -
يلا نطلع ع البركه في البدايه بصراحه كنت حاسس بقلق ومتحفز جدا للعربيه وبعدين كله كوم والمشي كوم تاني العربيه اتحركت بسلاسه ومتحسش ان الموتور صوته بيعلي مع الحركه او ان العربيه تقيله عليه

الطاره حلوه وسهله في الحركه بس طبعا هي هيدرولك مش الكتروني

البربريز بتاع العربيه كبير وواسع مبيديك مدي رؤيه حلو جدا

اول ماهاتتحرك هاتحس ان العربيه تقيله شويه او كانك بتدوس بنزين وهيه مابتتحركش للدرجه الموضوع ده في الغيار الاول بس لكن بعدها هاتلاحظ فرق كبير

بدات اتحرك والعربيه تمام وانا لسه متحفز

هوبا بدات الحفر والمطبات وبدا الفار يلعب في عبي صوت الطريق واضح جدا في العفشه والحفر ملحوظه اوي حسيت ان انا بتهبد وحسيت احساس اللي اخد الصابونه

علشان ماطولش عليكم بعد ماعملت مسافه حوالي 300 كيلو بدا الموضوع ده يقل جدا جدا والعربيه بقت انعم بكتير وبتاخد وتدي مع المطبات والنقر كويس كمان تنجيد الكرسي حلو وبيقلل الاحساس ده كتير وبعد 700 كيلو تقريبا الوضع اختلف تماما -عربية والدي اوكتافيا a4 اقدر اقول ان عربيتي احسن بنسبة 30 %

لكن في حاجه مهمه جدا الكاوتش بتاع العربيه سيء جدا جدا انا ناوي اغيره في اقرب فرصه بجد انا حاسس ان الاداء هايختلف تماما مع تغيير الكاوتش

عايز اقول حاجه مهمه جدا جدا بجد كلنا اختلفنا في اهمية فترة التليين ونلين ولا لا والمواتير الجديده متلينه ولا لا

التليين اساسي والسبب اني لاحظت في البدايه ان الجزء المعدني اللي حوالين عصاية الفتيس سخن جدا مع الجري لدرجة ان ممكن يلسع ايدك الموضوع ده بدا يقل شويه بشويه لغاية لما بقي حرارته طبيعيه لما وصلت ل 1000 كيلو عشان كده باكد ان التليين مهم ونفس الموضوع لاحظته في حرارة الموتور وامبير الحرارة

خلاص بقي العربيه اتلينت وخدت وقتها عايزين نشوف الامكانيات ونعرف الحقيقه

لحسن الحظ انا طريق شغلي مصر اسماعيليه الصحراوي

مكدبش عليكم اول ماعملت 900 كيلو بدات اتشجع العربيه بتجيب 100 كيلو بصوره كويسه جدا وعايز اقول بامانه ان الموتور والفتيس بجد حاجه جامده جدا وبالذات الفتيس تحس انه ذكي بمعني انه بيقدر طلبك قياسا مع دوسة رجلك علي الاكسيلاتير - دواسة البنزين - الكيك داون في العربيه ممتاااااااااااااااااااااز واالفتيس مش هاينقل قبل 6000 rpm

بالنسبه لموضوع العفشه والثبات انا بصراحه جبت 180 كم والعربيه تمام مش هاتحس انها بتعوم او بتروح وتيجي ومش هاتحس بمطبات الهوا وفي حاجه غريبه العربيه بعد 120 بتكون اثبت واحسن من سرعة 110 مثلا

بالنسبه للملفات بصراحه في ملفين علي الطريق كنت بعديهم بالاوكتافيا بتاعة والدي - بالمناسبه هيه موديل 2009 - علي 120 مقدرش اجيب اكتر من كده انا عديتهم بالبرليانس علي 120 باردو لكن الصراحه محستش بالحدفه بتاعة الملف اوي

في ملف تاني في اخر الطريق زاويته 90 درجه - ملف عمودي - اخرك فيه بامانه 40 كم والله عديته 60 كم والعربيه مقلتش لا بصراحه لسه هاجرب الملفين الاوالانين علي 140 واقولكم النتيجه - طبعا لو مقولتش النتيجه يبقي انتو اكيد هاتفهموها من نفسكم- ربنا يستر

اه نييجي بقي للفرامل ضايقني فيها انها هيدروليك مش كهربا مع انها abs مش عارف ازاي قولت تبقي ال abs ده اشتغاله

المهم يا رجاله مشيت علي 100 كم وكبست فرامل ع الاخر بجد ماصدقتش نفسي العربيه وقفت زي الالف لاحدفه يمين ولا شمال وكلبشت في الارض من غير ماتزحف --- هاحسب مسافة التوقف اد ايه واقولكم ان شاء الله - لكن بالنظر كده اداء الفرامل في التوقف المفاجيء كويس جدا مع الاخذ في الاعتبار ان الكاوتش زباله - سوري في اللفظ-

نييجي للتكيف من الاخر بكل امانه ثلااااااااااااااااااااااا ااااااااااااااااااااااااا اجه وكمان مابياثرش علي الاداء للدرجه اللي هيه يعني مش هاتحس بفرق شديد باردو المكنه 2000 سي سي بتريح وحلو


بمناسبة الالفين سي سي نييجي لحاجه مهمه جدا جدا جدا البنزيييييييييييييييييييي يييييييييييييين

انا حسبت للعربيه من العداد 800 لغاية 1200 باستهلاك متوسط شويه جوه البلد والمطبات وخلافه - انا اصلا من الزقازيق - وشويه مشي معقول علي الصحراوي 120 كم مع شوية كبس لغاية 160 وحوالي 6 كيك داون ع الاخر علشان اوصل لنسبه عمليه ومتوسطه بالظبط


النتيجه العربيه عملت في الصفيحه 195 كيلو متر بالظبط.. اعتقد ان ده معدل استهلاك كويس جدا لكن من غير تكيف هاحسبلكم ان شاء الله بالتكييف وابلغكم

نييجي بقي لموضوع العزل باختصار لو انت قافل الزجاج هاتحس ان الصوت جوه العربيه هادي جدا بامانه مش سايلنت تماما لكن مريح قوي وغير ملحوظ نسبيا ولو فتحت السقف علي اي سرعه هايختلف الموضوع حسب اتجاه الهواء خارج السياره لكن لو انت ماشي مع اتجه الهواء الصوت ممتاز وهادي لو عكس اتجاه الهواء هاتحس ان في زي تصفيق ملحوظ

حاجه تانيه والاهم انا كنت مستني اغسل العربيهفي البنزينه عشان اشوف مسدس الميه هايعمل ايه معاها مع فتحة السقف وبصراحه كنت مستني بفارغ الصبر عشان اعرف النتيجه وبكل امانه ولا نقطة ميه دخلت العربيه من اي حته حتي فتحة السقف الميه معدتش للمجري بتاعتها خالص وده شيء فرحني بجد

اه رفعت العربيه عشان اشوفها من تحت واعرف هما عاملين فيها ايه

هاتلاحظ اول حاجه ان العربيه عاليه فعلا - للمقارنه مع حاجه معروفه اقل من ارتفاع اللانوس ب نصف سنتي فقط - وفي المطبات العاديه والمتوسطه مش هاتحك من تحت - راكب انا وواحد صاحبي وحاطين حاجتنا في الشنطه-

هاتلاحظ حاجه جميله جدا جدا جدا ان الشكمااااااااان بالكاااااااااااااامل متعلق علي كاوتش يعني حتي لو حكت العربيه من تحت مش هايتكسر وطبعا ده شيء رائع خصوصا في بلد المليون مطب

دهان العربيه من تحت كويس جدا وتحس انه مخدوم وواخد حقه

في عازل فبر تحت المكنه لكن للاسف مش مصفحه والطبه بتاعة كارتيرة الزيت مرفوعه بميل 45 درجه مش عموديه علي الارض - طبعا الناس اللي اتلسعوا من المطبات فهمني - قصدي ان صعب انه تكسر نوعا ما ولو اتكسرت صعب ان الكارتيره تكسر معاها والحافظ ربنا

ودي شوية ملاحظات مختلفه عشان تكمل الصوره

* الشنطه واسعه جدا جدا جدا فوق ما تتخيل مش هاتقصر معاك ابدا


.... الاستبن جنط سبور زي الاربعه التانيين مش عجلة موتسيكل


*الكبوت ليه اتنين مساعدين ارفعه سنه بسيطه وهوه هايفتح لوحده ومش هاتحتاج للسناده الحديد عشان تفضل رفعه


.... الشنطه كمان فيها اتنين مساعدين


* زجاج السواق اوتو داون بس للاسف مش اوتو اب


.... في مسند يد في الكنبه الخلفيه لكن مفيهوش حامل اكواب


* في ولاعه اضافيه -مصدر كهرباء اضافي - للمقعد الخلفي


.... العربيه معاها مثلث عاكس


* بتستلم مفتاح ريموت ومفتاحين احتياطي ( ايموبليزر)


.... العربيه فيها سنسور بارك - حساسات للرجوع للخلف -


* اضاءه للمقعد الخلفي والامامي وتحكم في اضاءة التابلوه


.... الشنطه متبطنه بالكامل من اسفل ومن الاجناب


* صوت الكلاكس عالي وقوي مش طبطبه


.... فتحة السقف ليها وضعين و اوتو اوبن و اوتو كلوز

* دي في دي وشاشتين بالخلف لكن جودة الصوت مش اوي

.... مراية البربريز مش حلوه وتحس انها صغيره شويه

* التكيف تاتش مش بكر وسهل التحكم

.... اماكن تخزين متعدده وعمليه

يفضل حاجه مهمه جدا انا بعتذر عنها انا مجمع للعربيه صور كتير عشان توضح اكتر لكن للاسف مش عايزه تترفع علي الموقع وبتديني خطا في التحميل ياريت لو حد يساعدني في الموضوع ده

في النهايه اتمني اني اكون قدرت افيد حضراتكم ونفسي التقرير يعجبكم وانا تحت امركم في اي استفسار او اسئله وان شاء الله هاحاول اضيف اي ملاحظات جديده اول باول علشان تنفع اي حد عايزها وبشكركم جميعا للاهتمام والمتابعه

وتاني وتالت وعاشر بشكر كل الناس اللي ساهمت في الموضوع ده وكلهم اصحاب فضل فيه ونصيحه لاي حد بيقرا الموضوع لاول مرة حاول تقراه كله لان بجد في مشاركات تانيه اجمل واحسن وياريت اي حد من الاعضاء ليه وجهة نظر او تعديل للموضوع يشارك بيه علشان يكون افضل