الموضوع: عملت حادثة تانية أبشع وأعنف بالياريس 2008

طبعا انا مش عارف أبدأ منين أنا مخنووووووووء فعلا
عموما الملخص إن البلد دي مفيهاش قانون ولا تستاهل الواحد يستني فيها يوم واحد.. حاسس اني كنت بطل فيلم اكشن النهاردة..

المهم نبدأ من كوبري أكتوبر صباح الخميس 12/6

واخد بالي من واحد راكب لادا وعمال يسوق بهبل كدة سواقة واحد لسة بيتعلم
طبعا قعدت ابعد عنه وكنت ساعتها بكلم واحد صاحبي بقوله الصبح واحد كان باصص عالعربية وانا جاي أركبها بطريقة تخوّف و قرأت عليه سورة الفلق كذا مرة وبقول لصاحبي انا ماشي بالراحة عشان خايف اعمل حادثة بسبب العين دي

بعد المكالمة دي مفيش بدقيقتين عربية وقفت ووقف وراها أربع عربيات و أنا فرملت عليهم وشغلت الانتظار ألاقيلك بتاع اللادا 2007 دا يقوم لابس فيها مبوظلي ضهر العربية تماما

نزلت لقيت بني اادم تنح بشهادة كل اللي شافوه وكلمت النجدة وجه الونش و شاف الحادثة وخد الرخص وقاللي ماتسيبش حقك واعملله محضر وخد منه حق تصليحها

هو لوحده اما لقي ان في محضر وبتاع جه قاللي خلاص هصلحهالك.. بكام.. ب 150 جنيه.. اه إنتو قريتو الرقم صح.. مية وخمسيش جنيه

الظابط قالي هننزل من عالكوبري عشان ما يقفش وجه ركب معايا في عربيتي واتعرفت عليه طلعنا جيران من شبرا ونزلنا من نزلة النصر ووقفنا قدام شوية مستنيين النجدة ومندوب القسم عشان يعمل محضر.. وعشان احنا في مصر النجدة إتأخرت أكتر من نص ساعة وكل شوية يكلموهم يستعجلوهمزز لغاية ما حصلت حادثة تانية علي كوبري اكتوبر والظابط سابلي الرخص بتاعتي وبتاعته وقاللي ماتسيبش حقك وروح عالقسم اعملله محضر..

بعدها خدت الرخص وطلعت عالقسم لقيته بيكسر عليا وعايز ياخد الرخص ومش عايز يعمل محضر وعايز يخبطلي العربية تاني.. قلبت منه بعد مطاردات في شارع الطيران و مصطفي النحاس.. كلمت النجدة وبلغت وبصراحة كانوا ذوق جدا و اتصلوا بيا كذا مرة عشان يتابعوا ويشوفوني وصلت القسم ولا لأ ..

في الفترة دي كلمت كذا واحد من صحابي ظباط وغيرهم وسألتهم أعمل ايه .. في ظابط صاحبي جالي علي قسم تاني مدينة نصر وقاللي ماتعملش محضر غير اما اجيلك وواحد صاحبي تاني مهندس كان في الادارة في مدينة نصر فجالي برضو علي طول عالقسم و طبعا صاحبي اللي كنت رايح اعدي عليه عشان اروح معاه نجيب اهله م المطار خليته يقف جنب العربية عشان الشنطة كانت مفتوحة ودخلت أنا وصحابي الظابط والمهندس عملنا المحضر وسلمنا رخص الواد اللي خبطني ومشينا بس كان معايا صاحبي المهندس كنا واقفين عند العربية قدام القسم..

لقينا مين جاي.. الواد اللي خبطني وجاي يقوللي مش عملت محضر.. دا انا كان نفسي اخبطهالك أكتر من كدة وكلام زي ده وعايز يخبطها بطوبة ولا حاجة وجايب معاه اتنين شكلهم رد سجون.. قمنا ماسكين فيهم رزعناهم العلقة المحترمة قدام القسم وخدناهم علي جوة.. والاتنين اللي معاه هربوا.. وكلمت صاحبي الظابط اللي كان لسة ماشي رجعلنا تاني .. دخل لرئيس التحقيقات ومأمور القسم ورجع قالنا كبروا دماغكو وخلصوها مصالحة عشان الموضوع ما يكبرش وتروحوا النيابة وهيبقي فيلم كبير ومحدش فاضي لكدة.. قلتله ماشي كفاية انه اتضرب ومسحنا بيه الشارع بس محضر العربية دا حاجة تانية.. طبعا المحضر دا مالوش لازمة غير انه يخليه يدفع تمن تصليح العربية .. بس زي ما قلتلكو م الاول انه شخصية تنحه.. مكنش حد في القسم طايقة اصلا.. بس مكنش عايز يخلصها مصالحة وقال انا اتضربت واتبهدلت.. وطبعا محدش يعرف يغصبه علي حاجة أبدا..

رحنا المستشفي عملنا الكشف الطبي وطلع كله كدمات مفيهوش حاجة.. بعدها جه قالنا خلاص شوف انت عايز كام لو 10,000 جنيه تصليح العربية ونخلصها مصالحة.. دلوقتي ماينفعش تعمل مصالحة في القسم.. لازم نعمل التصالح ده في نيابة القاهرة الجديدة.. كلمت والدي حكيتله عالموضوع وكلم وكيل نيابة في نيابة القاهرة الجديدة قاله ما تقلقش هيخلوا سبيلهم من سراي النيابة بضمان محل اقامتهم.. كلم ظباط ورؤساء مباحث ومأمورين أقسام كلموا قسم تاني وقالوله خلاص الموضوع كدة في النيابة برة القسم بس مفيش حاجة هتحصل وحقك موجود..

رحنا النيابة ودخلنا لوكيل النيابة بني أدم عايش في الدور وربنا مبتليه بشوية تناكة .. اول ما دخلنا قام صاحبي داخل يسلم عليه كإنه بيسلم علي واحد صاحبه ومدله ايده.. قام باصصله بقرف ومامدش ايده.. ومسكه بهدله .. انت تعرفني.. إنت ماتعرفش تكلم وكيل نيابة ازاي.. إنت بترسم نفسك.. جه ينطق ماخلاهوش يرد بأي كلمه وكل ما يتكلم يزعق فيه يقوله اخرص.. وقام رازعنا التقرير التمام وقاله عشان تبقي تعرف الفرق بين هنا وبين القهوة اللي بتقعد عليها مع صحابك.. مش عارف الناس دي هتروح من ربنا فين.. إزاي بيناموا الليل وضميرهم مستريح.. هي البلد ناقصة فساد وظلم..

التقرير بقي فيه الاتي .. يخلي سبيلنا من سراي القسم مش من النيابة.. ويقوم احد المهندسين من المرور بالكشف علي العربيتين.. يعني يتحجزوا في القسم.. ومش هنطلع غير اما نسلمهم.. وصحيفة الحالة الجنائية والفيش والتشبيه..

رحنا القسم خلصنا الورق دا ومشينا الحمد لله بعد كابوس طوييييييل و دلوقتي عربيتي هناك بس الحمد لله اني ما اتحجزتش لغاية ما اعمل فيش وتشبيه.. دي اللي خدموني فيها اوي بصراحة.. خلوني اسيب العربية بس..

طيب دلوقتي العربية الاكصدام الخلفي باظ خالص والشنطة ما بتقفلش بس مش مخبوطة.. اروح الحم الاكصدام ولا اغيره ولا ايه.. انا سمعت ان في مركز في جسر السويس اسمه الشركة الوطنية تأريبا.. بيقولوا كويس وبيشتغل في الزيرو بس.. ولا اروح فين..
تاني حاجة ايه نظام حجز العربية في القسم ده هيقلّبوها ولا ايه؟؟
وايه نظام المهندس اللي هيعمل معاينة ده اجيبه منين وكدة؟؟

يللا الحمد لله قدر الله وماشاء فعل

م/ياسر

طيب انا كنت عايز أسأل علي حاجة
دلوقتي لمبة الشنطة منورة علي طول ومش عارف افصلها ازاي
كدة هروح الاقي البطارية نايمة مش كدة
طيب ايه الحل؟؟؟؟

ابقي افصل البطاريه لما تنزل من العربيه.
شيل الكابل الموجب و حاول تخليه في مكان معزول.