كل واحد فينا ......... لسة جواة عيل
صباح الليمون بالنعناع .... عاملين ايه...
قطعا و بدون ادنى شك .. كل واحد من حضراتكم لما بيجى يتفرج على التليفزيون بيلاقى شوية اعلانات... تحف .. تجيب تخلف عقلى ... او .. على الاقل .. تأخر عقلى .. مفيش اعلانات تحترم عقلية المشاهد ابدا ....
كنت شوفت من فترة اعلان كده بيقولك كل وااااااااااااحد فينا داخله لسة جواه عيل .... مكانش ييجى الاعلان ده الا لما انزل علية تريقه .. راجل عامل زى درفة الدولاب ماسك قطه و عمال يخوف بيها واحد تانى راجل برضه ... دة ايه الهبل ده .. و فى الاخر يشرب العصير علشان لسه عيل ....
بصراحه الموقف اللى حصلى مع القطه خلانى عذرته شوية ... ماشى بس برضه مش للدرجاتى ....
من كام يو كده كنت قاعد على الكافيه مع واحد زميلى ... واسمع صوت الكتريك واريا ... تكتكتكتك .... زززنننننننن ..
بتلفت كده .. لاقيت واحد من البياعين السريحه دول .. جايب شوال و مليان بقى بضاعه من اللى قلبك يحبها ... اشى نضارات و كشافات و مفكات ... و معاه بقى مضرب ناموس بكشاف .. و بيتشحن و شكله جامد ...
المهم عجبنى شكل المضرب و صوته .. مع ان عندى فى البيت مفيش ناموس و لا دبان تقريبا .. زميلى ده نده على الراجل و جى صاحبنا يورينا المنتجات الحصرية ... فزميلى ده اشترى المضرب .. و الراجل حب يجربهوله ...
و طبعا احنا على القهوة مفيش دبان و كانت الساعه 11 بليل .. هيجربة ازاى .... الراجل اخترع حيلة ماكرة .. فقام واخد كوبايه المية من قدامى .. و قام باخخ شويه مية على المضرب .. و اسمع يا عم احلى تكتكه ... صوته زى الالكترك بالظبط .. المهم اشترى واحد ... و انا عاجبتنى اللعبه ... و شبطت فيه .. فقولتله هاتلى واحد انا كمان ... و قعد شوية و روحت على البيت و طالع فى ايدى المضرب ......
طبعا كل اللى فى البيت نايمين... انا بقى عاوز اجرب المضرب ده ... قعدت الف فى الشقه انى الاقى دبااااانه توحد ربنا .. مفيش .. اضرب عينى فى السقف... يمين شمال فى كل الشقه .. مفيش .. ادخل الحمام .. مفيش ..
طب و بعدين .. قمت داخل نايم .. و انا مقهور و حزين ... و لسه بخش فى النوم .. الا و الاقى زنننننننننننننننننن .. دبانه امها داعية عليها .. قمت ناطط من على على السرير و انا فرحان جدا ... و نورت النور .. و قفلت الشبابيك كلها طلعت اجرى وراها فى الشقه .. زى المجنون .. و فى ايدى المضرب ... و اتفرج على احلى مسخرة .. و الدبانه بقى استعرضت كل المهارت الجوية ... و انا شغال تنس ... هتجنن .. مش عارف اطولها .. قعدت انهج شوية ... و قولتها و حياة ابوكى يا انا انتى الليله ده .. هدغدغ المضرب ده فوق دماغ ابوكى .. و كبرت فى دماغى و الله ...... و عملت عقلى بعقلها.. دخلت اوضت العيال .. دخلت و راها و طلعت فوق السرير .. الواد الصغير قام من النوم .. و شاف المضرب فى ايدى .. افتكره لعبة جايبهاله .. و طلع يجرى ورى الدبانه هو كمان فى الشقه و بيقولى اهى يابابا .. طارت .. دخلت اوضه ماما .. قمت متسحب و داخل اوضه النوم عندى وقفلت الباب .. وقولته روح هز الستارة بشويش .. و الدبانه مش مدية خوانه .. و جاية ناحيتى ... و طرااااااااااااااااااااااا ااخ ... قامت لبسه فى المضرب وش .. و كانت النهاية
و قام المضرب عامل تكتكتكتكتكت ... و الدبانه اتصعقت ... فى اللحظه ده .. صحيت المدام مفزوعه من صوت المضرب ... و شافتنى و انا متلبس بالجريمه ... فقولتلها ... كل واحد فينا لسه جواه .... عيل ...