بالصور -حادث مريع على الطريق الداري - شاهد عيان

السلام عليكم ورحمة الله وبركاته

في اثناء طريق عودتي من الكلية للاسف حصلت حادثة صعبة على الدايري عند الوصلة الجديدة

كنت ماشي وفجأة شفت اكن فيه نار على الاتجاه المقابلة وعربيتين نص نقل طالعين فوق الحواجز اللى بتفصل بين الاتجاهين وفوق بعض بطريقة غريبة جدا !

لما قربت شوية اكتشفت ان اللى على الارض ده مش نار وطلع برتقال مش عارف شفته نار ازاي << العتب على النظر

مش عارف تفاصيل الحادثة بالظبط لاني شفتها تقريبا بعد وقوعها مباشرة !

لكن كل حصل ان فيه نص نقل مقلوبة بالجمب ونص نقل تانية داخلة فوقيها وطبعا الاتنين مدمرين تماما

النص نقل الاولى محملة برتقال وكتاكيت والتانية فاضية

في اقل من دقيقة كان الدايري من الاتجاهين وقف تماما والناس بدات تحاول تخرج المصابين

فيه اتنين خرجو الحمد لله فايقين وتقريبا اصابات خفيفة

المشكلة ان سائق العربية النص نقل اللى كانت مقلوبة بجمبها ومقلوبة نحية كرسي السواق ماقدرش الناس تخرجه ! لان النص نقل التانية فوقيها

ربطوها في ترلا والترلا جرتها واتعدلت وقدرو يخرجو السائق اللى خرج مغمى عليه وان شاء الله يكون لسه على قيد الحياة

اما النص نقل اللى طلعت فوق التانية لحد مانا مشيت محدش قدر يخرج اللى جواها لان الكابينة كانت مدمرة تماما ! !

الحمد لله الاسعاف وصلت بعد وقوع الحادثة باقل من 15دقيقة وده يعتبر انجاز !!

برة الاسعاف بتوصل بعد الحادثة بدقيقتين او تلات دقائق كحد اقصى واحنا هنا لما الاسعاف وصلت في 15 دقيقة انا شخصيا اعتبرته انجاز

المشكلة والسؤال اللى في بالي من ساعت ماشفت الحادثة

ليه اكتر من 99% من الحوادث على الطرق المصرية بيكون احد اطرافها اما عربية نص نقل - عربية نقل - ترلا - مقطورة ! ! ؟ وللاسف غالبا مابيتظلم معاهم عربيات ملاكي في النص وبيتم دهسها !!

نفسي سواقين العربيات النقل والترلا يراعو ربنا شوية

واسيبكم مع الصور

ربنا يستر طريقنا ويحفظنا

http://img138.imageshack.us/img138/5062/08052012641.jpg

http://img10.imageshack.us/img10/2162/08052012643.jpg

http://img818.imageshack.us/img818/4982/08052012644.jpg

http://img710.imageshack.us/img710/2278/08052012646.jpg

http://img823.imageshack.us/img823/4625/08052012645.jpg

http://img687.imageshack.us/img687/6883/08052012642.jpg

ربنا يرحم اللي مات و يخفف على اللي عايش و أتمنى أنه يتعلم من الحادثه دي
و أتمنى أن كل اللي شاف الحادثه يتعلم برضه

يوميا حوادث مميتة على الدائري و طريق الواحات
و محدش بيتعلم حاجة الناس فاكره نفسها شوماخر على حلبة فورميلا وان للآسف الشديد .
ربنا يهدينا .

لسة كان فيه حادثة شبيه بدي على ملف اليو ترن عند طريق الواحات اللي رايح على الدائري
عربية فيها فراخ ......... نص الفراخ يا عيني مدعوكة و ميتة على الأرض و كابينة العربية الجامبو مدمرة .

شعب يقرف بصراحة (أنا آسف في الكلام )

ياساتر يارب
ربنا يرحمنا برحمته

لا حول ولا قوة إلا بالله

المفروض يبقى فى رادارات توقف العالم دى. كل الحوادث سببها النقل منهم لله

موووت و خراااب ديار :(

تلاقي واحد فيهم كان بيشد نفسين و لا حاجه

ربنا يعافينا ويعافي المسلمين ويرحمنا ويرحم المسلمين الاموات منهم والاحياء اخي الكريم الغالبية من سواقين الدبابات عايزين الحرق بجاز وسخ بصراحة من اللي بشوفه منهم بيكونوا بيجروا بطريقة غبية جدا معظمهم وغرز من اليمين ومن الشمال وشوية لو يطولوا من فوق العربيات ده غير التعميرة اللي هي اللي بيكونوا عاملينها وكمان ده نفسه بينطبق على كثير من سواقين التريلا والنقل والحمد لله عن نفسي لما بشوف واحد من دول او دول بتوتر وبحاول اعديه او اعدي منه وربنا يسترها معنا يارب

المفروض يبقى فى رادارات توقف العالم دى. كل الحوادث سببها النقل منهم لله

ليه منعملش اختبارات للناس دى على الطريق
يعنى اللجان الى على الطريق ميكونش همها الاستيكرات و الفاميه بس لازم كمان يكون فى تجهيز لفحص المخدرات و الخمور

ربنا يرحم امواتنا واموات المسلمين
منهم لله سواقين النقل والميكروباس قمة الاستهتار باراوح وومتلكات الناس

الدائرى بقا صعب فعلا قمة الفوضى

ربنا يسترها علينا

ربنا يستر عالناس وعلينا

الحمد لله ان مفيش حد مات وربنا يستر

الواحد ممكن يكون واقف بالعربية وتلاقي عربية من غير اي مقدمات دمرت العربية الى واقفه

بس شكل البط الى عمال يتمخطر مع نفسه في اول صورة زي العسل lol

ربنا يسترها ويكفينا شر الحوادث

مش لما يكون في لجنه فحص عدله في المرور تبص علي العربيه دا بيبص علي الدهان ويقولك شيل الاستيكر
يعني تلاقي عربيه معدومه غير مطابقه للمواصفات وبترخص

الموضوع مالوش حل
يوميا حوادث موت علي الدائري
نقل تقيل او دبابات او ميكروباص الغالب هم المسبب لكل الحوادث
امبارح كان في حادثه صعبه عند منزل الزهراء للقادم من التجمع
عربيتين نقل واحده دبابه وواحد جامبو وفيرنا وفي شخص مرمي علي الاسفلت وتقريبا كان خلاص بيودع
ربنا يرحمنا من الدائري واللي بيجري فيه
قمه الاستهتار

حسبي الله ونعم الوكيل في الاهمال والرعونة وعدم الاهتمام بالاخرين
ربنا يستر طريقنا وطريقكم جميعا

ربنا ينجينا و يسترها يل رب

ياساتر يارب
حادثة وحشة اوى فعلا ربنا يسترها على الجميع

لا حول ولا قوة إلا بالله

ربنا يكفينا ويكفيكو شر الطريق

احمد انا اكتشفت بعد م شفت الصور انى كنت واقف قدامك الناحيه التانيه .... انا حضرت الحادثه من اولها و هى العربيه لسه بتتقلب

بس الحمد لله ال 4 طلعوا عايشين ... بس فى منهم السواق اللى كان فى النص نقل الخضرا اصاباته بالغه شويه بزياده عنهم

اجمل حاجه عجبتنى فى الموضوع ان والله لسه الشعب المصرى فيه الخير ... يعنى بمجرد م الحادثه حصلت لقيت حوالين العربيه ما لا يقل عن 100 واحد معرفش جم ازاى ولا منين و كله بيساعد

و اكتر حاجه نرفزتنى ... راجل فى وسط البهدله دى كلها و احنا بنحاول نطلع الناس الاقى واحد بيزقنى اوى
لييييييه ... ؟؟

البيه واقف بينقى برتقان من اللى على الارض و انا كنت هدوس على واحده كانت عاجباه . !!!

انا مكنتش حاسس بنفسى بقول ايه بس صوتى كان اعلى من صوت كل الناس اللى حواليا .. و شديت من ايده الكيس و كنت هضربه ...

ربنا يستر علينا !

الدائري ده ازبل و اسوء طريق في العالم خاصه لما يبقى بيسوق عليه سواقين النقل الــ@##$%@ دول

انا و الله ساعات بطلعه يدوبك طالعه مدينه نصر بتاعت السابع و انزل نزله كارفور المعادي
يعني بمشي عليه حوالي 2 كيلو او اقل
بس ببقى هموت من الرهب و انا عليه

ربنا يكون في عون الناس اللي بتمشي عليه بالـ20 و الـ30 كيلو بجد

دة بط يا دكتور مش كتاكيت

لا حول ولا قوه الا الله

النهاردة الصبح معدى
لقيت فيه برتقال برده لسه موجود
المنطقة دى تقريبا يوميا حوادث
تريللات مخبوطة وخابطة
تريللات طالعة على الجزيرة اللى فى النص
حاجة تيت اوى