تغير بطاحات مساعدين وجلب مقص سيراتو 2008
السلام عليكم اعضاء كيا الاعزاء - وحشتونى والله :Copy of m-s5:
فى صيانة الـ 40 الف من حوالى 7 شهور او اكثر كانوا قالولى فى التوكيل انى محتاج
اغير بطاحات المساعدين وبما انى ماكنتش شايف مشكلة حقيقية منهم فقلت ماشى مش هعملهم دلوقتى
بعد فترة لقيت كوتش البطاحة اللى ظاهر من اسفل الكبوت بدء يتشقق و مع الوقت
الشقوق دى بتزيد - سئلت البعض افتى انك لازم تغير و الا المساعد ممكن يخرج من الكبوت :brn:
وبعد فترة بقيت اسمع صوت طقة فى المطبات وعمالة تزيد مع الوقت لحد ما كرهت العربية
فيه ميكانيكى نضيف فتح جنبى قولت استشيره - ركب جنبى وطلعنا جربنا العربية
وشاف البطاحات وقالى لازم تتغير ورفع العربية وفك العجلة لاقى جلبة المقص
شبه مقطوعة وقال انها مسئولة عن الصوت ولازم تتغير واعتقد ان المقص لازم يتغير كامل
اتصلت بالتوكيل علشان اشوف البطاحات قالو مش موجودة ومافيش جلب مقص
المقص كامل فقط
جبت كاتلوج سيرفيس العربية لاقيت ان الشركة مواضحة طريقة فك و تركيب جلبة المقص
يعنى الوكيل بيستسهل ويغير مقص كامل :yeah:
عملت جولة بالتليفون على بتوع قطع غيار كيا الجندى ما عندوش اصلى فيه كورى
البطاحة بـ 90 جنيه ومافيش جلبة , والمقص الكورى - مش اصلى بـ300 جنيه
حلمى سليمان عنده بطاحة كورى بـ 120 جنيه والجلبة كورى بـ 50 جنيه
وتارجت فى فيصل بطاحة كورى بـ 85 جنيه وجلبة كورى بـ 50 جنيه
بعد حوالى شهر موضوع الخبط زاد قوى رحت لحلمى سليمان هات يا عم البطاحات
جبلى بطاحة عبارة عن فردة شبشب قديمة حاجة حقيرة لابعد حد ورولمان البلى بتعها ردىء جدا
قولتله شكرا وشوفت اللى عند تارجت فيصل برده نفس الحكاية - اتصلت بعاصم اللى فى شارع دمشق
لقيت الاصلى عنده الاتنين بـ 500 جنيه والمقص كورى بـ 350
جربت الوكيل تانى لقيتهم وصلوا بـ 450 بدون ضريبة ومافيش جلبة المقص كامل
بـ550 بدون ضريبة :oops2:
روحت ابو رواش اشتريت البطاحتين ب 495 بالضريبة وروحت للمنير فى فيصل
لقيت الجلبة اللى بيبعوها بـ 50 عنده بـ 25 وقالى فيه الاصلى لو عاوز ب 50
قولتله فيه الاصلى ؟؟؟!!!! قالى ايوه هما هما بتوع الماتريكس جبتهم اصلى فعلا وعليهم
العلامة المائية بتاعة موبيس وكيا وهيونداى
روحت للميكانيكى فك المساعدين وغير البطاحات بسهولة وسرعة عنده عدته جديدة ونظيفة
وسقط المقصين علشان نوديهم للخراط لفك الجلبتين القدام وتركيب الجداد بواسطة المكبس
" بيضة الطرف والجلبة الريشة فى المقص بحالة جيدة جدا "
وتم تركيبهم بسرعة والحمد لله رجع الوضع لاصله