دايما نسمع اتجوز فرق بينك و بين عروستك 5 سنين
بس عمري ما عرفت سبب مقنع الا السبب البيولوجي و دة مش شايفة سبب كافي لان الجواز مش مبني علي كدة و بس
فعايز اعرف رايكو بالجواز من الي في سنك او فرق حاجات بسيطة ما بينهم ؟
عرض للطباعة
دايما نسمع اتجوز فرق بينك و بين عروستك 5 سنين
بس عمري ما عرفت سبب مقنع الا السبب البيولوجي و دة مش شايفة سبب كافي لان الجواز مش مبني علي كدة و بس
فعايز اعرف رايكو بالجواز من الي في سنك او فرق حاجات بسيطة ما بينهم ؟
فرق بيلوجى فقط :)
اهم حاجه الاتفاق و فيه فكره تقولك خليها اصغر منك عشان تعرف تتحكم فيها و جو سى السيد ده
انت لو مش انت وانت جعان :) مش هيفرق اى فرق سن ولا هتعرف تتحكم فى حاجه
احسن سن للبنات في الجواز 20 لغايه 22 او 23
تعالي نعكس السؤال انت كام سنه لما هتتجوز
لو انت اواخر عشرينات او تلاتيناتي يعني من 28 الي 33 يبقي ممكن تاخدها 20 او22 هتبقي ممتازه انت ناضج كفايه وكمان هي في السن ده بتكون عاقله شويه (مش كلهم)
لاكن لو انت صغير24 مثلا برضه هتاخدها 20 او 22 يعني الفرق من 2 الي 4 وممكن 5 في احسن الظروف
يبقي اللي بيحدد سنك انت
مش تيجي عندك 24 سنه وعايز تاخدها 16 مش هينفع لاكن كل ماانت تكبر هتاخد من نفس السن المناسب ليهم
ده رآيي
أهم حاجة هى الحب اللى يعتبر أصعب حاجة فى الجواز ....
يوم ما تحب بجد مش هتبص لموضوع السن دة أن شا اللة تكون اللى بتحبها دى أكبر منك ....
طيب الكلام ايه فى العكس ؟
يعنى هي تكون أكبر منك بسنه مثلا ؟
الأهل والتقاليد هما المشاكل اللى بتواجة الجواز دة فى مجتمعنا المتخلف المتطفل ....
لو حسيت أن الأنسانة دى هى الوحيدة اللى قدرت أنها تملى عليك حياتك و أنك متقدرش تستغنى عنها يبقى عليك أنك تتحدى العالم كلة وتتجوزها لأن للأسف الشديد الحب الحقيقى مبيجيش فى حياة الأنسان غير مرة واحدة بس ....
كلام في الصميم.
انا شايف ان فرق السن ده حاجه مالهاش لازمه او يمكن احنا الشباب متفتحين شوية عشان اندمجنا مع المجتمع الغربي في الافلام والمسلسلات و اوقات كتيره بنكلم ناس اجانب انما اهالينا لأ.
يا اخي افرض البنت اكبر مني بسنه او اتنين ايه الي يمنع طالما هي محترمه وعلى خلق ودين اولا واخيرا.
بصراحه شايف ان السن ده زي الي بيحط العقده في المنشار
ههههه موضوع جميل وفكرني بحاجة في علم النفس اسمها عقدت اوووديب ، وعقدت او ديب بتتلخص انو كان عندو حاجة وعشرين سنة وكان بيحب الستات الي اكبر منو لانو كان بيرى فيهم ستات كاملة الانوثة وحنينين. ، يعني كلهم حنان بعكس فتاة صغيرة طائشة ، ودي مرحلة بيمر فيها اي شاب وبيخدع نفسو بمثل بيقول الدهن في العتاقي. ، لكن كما تفضل اخي وحبيبي الاستاذ النوبي ان فعلاً افضل سن للجواز بالنسبة للبنت هيا من ١٨ سنة لغايت ٢٤ سنة بتبقى البت لسه كده طازة وموديل حديث ، زيرووو على قولتنا كده ، بس في ناس تقولك بدل ما اروح اجيب عربية فيرنا ولا لانوس جديدة وزيرو واي كلام طيب ما اروح اجيب عربية مارسيدس ولا بي ام بس قديمة. واهو اسمي راكب مرسيدس او راكب بي ام ، وتلاقيهم يجرو ورى امرءة اكبر منهم في السن لاكن تكون مطلقة او ارملة لكنها جميلة وغنية .... ويمكن كمان يكون عندها شقة وعربية بتحصل كتيرررر ، لكن المشاكل بتبقى اكترررر واولها رفض الاهل والمجتمع. وكونها انها اكبر منك فانتا بالنسبه لها. حتت عيل صغير شوخ شيخه في ايدها تلعب بيك زي ماهيا عاوزة. وانك بتكون كرجل بالنسبة لها ده شيء مستحيل. لانك هتفضل في نظرها اصغر منها مش بس في السن لكن كمان بالعقل ...
والعقدة دي لخصوها العلماء بان الشاب بيبحث عن الحنان والرعاية الي ملقهومش. من والدتوو الي كانت منشغله عنو .... تماماً زي البنت الي كانت بتحب ابوها الي مات فبتبحث عن الرجال الي في سن ابوها علشان يعوضها عن. الحنان الي فقدتو رغم جمالها وصغر سنها ... فهنا الموضوع بيبقى شائك شووية ويتبلور في اكثر من حاجة واكثر من شيء. واولهم رفض المجتمع لهذا الزواج وكلام الناس الذي سوف يؤثر على علاقتك بامرئة اكبر منك وشك المرائة وغيرتها هيكون ايكسترا شك وايكسترا غيرة لشعورها دائماً بالنقص وان عينك وديلك هيلعب كده او كده .... ولو بتبص مجرد بصه في اي اتجاه وانتا معاها. وصادف ان في بنت صغيرة او اصغر منها هتقولك اااااه تعاله يا حلووو هنا. عينك رايحة فين. متبصش ولو طالت تخذق عنيك هتخزقهم ههههههههه
وفاكرين مسرحية. العايل كبرت لمن جه كمال بيقول لابوه انا بحب مدام سووووونة يابابا. جرتنا. وعاوز اتجوزها ( اربع عيال. واموهم هههه) والواد بقه يناطح في ابوه كل همو انو يتجوز مدام سوووونة ، وارجوك يا بابا متجبش سيرتها بحاجه وحشة ....
كل شاب فينا عاوز شوية حنان شوية حوب شوية رومانسية .... لكن صدقوني مع تقدم العمر هتلاقي نفسك دائماً تبص على الجيل الجديد الي طالع وموديلات ٢٠١٢ وتقول ياسلام. لو كنت صغير شووية واخودلي حته. كده الانترا. من بتوع اليومين دول الشكل الجديد ولا حته سيراتو جديدة رغم انك معاك مرسيدس بس دايماً بتبص على اي موديل جديد ينزل السوق وده طبع في كل الرجال ما يملاش عينهم غير ال ١٢٨ ههههههههههه
لذلك ياعزيزي ويا اعزائي انصحك دائماً متبصش تحت رجليك ودائماً فكر بالمستقبل .... انت كرجل دائماً تحتاج لامرئة تعيد لك شبابك لا ان تعيد انت لها شبابها .... وتصبح انت شبشبها .... المرئة في سن. معين بتوصلوا وخلاص لاتستطيع الانجاب بينما انتا لسه في مقتدى عمرك وبالنسبة لها الحمل فب خطورة على حياتها .
وحتى بالنسبة للمرئة تريد دائماً ان تشعر انها هيا الصغيرة الدلوعه في البيت كلوو. لذلك لو تلاحظ ستات مصر بيقولوا لازوجهم بابا ... بابا جه بابا راح هههههههه اوعو تفتكرو ا علشان تحفظ كلمة بابا للعيال يعني بدل ما ابني يقولي يا وله ياميدو لا يقولي بابا ههههههه لا لا اطلاقاً ولكن. هيا تريد ان تشعر نفسها بانها مازالت صغيرة. والزوج بالنسبة لها هو اصبح اب لها وتفتخًر ان زوجها اكبر منها في العمر .. وانها مازالت طفلة صغيرة .... والعيال الي جبتهم دول جبتهم من السوبر ماركت كان في عرض على قزازة زيت. اشتري قزازتين واحصل على علبة سمنة وعيل هدية هههههههههههه
فالموضوع شائك شائك يعني بالنسبة لعقدة اوديب بالذات لمن يرى الشاب حتت دين ستات يحلو من على حبل المشنقة لكن الفرق بينهم كبيررر جداً في العمر ... بل احياناً تكون في عمر والدته .... ويحبها ويريد ان يتزوجها دون النظر لوالدته الي هتتشل. ولا ابووه الي هيتنقط وتجيلو جلطة من ورى ابنو المصاب بعقدت اووديب . وعرق الهبل اشتغل في دماغو بل تكاد جتو لسعه كده ... والغزالة اشتغلت .
لكن كل هذا شعور لحظي تماماً زي مالواحد كان وهو صغير بيحب الابلة بتاعتو (الميس بتاعت المدرسة) او زي ما البنت بتحب المدرس الخصوصي بتاعها ولمن يروح سنة تانية يعرف ان حبو ليهم كان لانهم كانو شاطرين وحنينين وبيعرفو يشرحو كويس وحببونا في المادة .
فنصيحة في الجواز مفيش هزار .... وسيب دائماً امرك لله وتوكل على الله .... وخلو دائماً ولدتك هيا الي تنقيلك .... او على الاقل تكون راضيه عن جوزتك بنسبة ٦٠٪ علشان متبقاش حياتك جحيم في جحيم وعذاب في. عذاب .
وتحياتي ليكم ياشباب واسف على الاطالة ولو عوزني اطول قول طوووول ههههههههه
بصراحه فرق السن دا ملهوش اي لازمه في وجهه نظري
طالما في حب متبادل من الطرفين او على الاقل ارتياح نفسي وتوافق في الافكار يبقى السن مش هيفرق
بصراحه اسلوبك في الكتابه اكتر من رائع
انت لازم تفكر تكتب مقالات ساخره بجد
عندك موهبه كويسه جدا في الكتابه
كنت بقرأ مشاركتك وانا بضحك فعلا من قلبي :Ta_clap[1]:
فرق سن عامل واحد من عوامل كتير مهمة فى الجواز ( شكل - طباع - اخلاق - حب - تفاهم - تعليم - نسب و عيلة - ماديات - ....) و بشكل عام افضل حاجة يكون فى فرق سن 5 سنوات
يعنى انسب سن جواز للرجل يكون 26 - 28 سنه و ياخد واحده عندها 21 - 24 سنه
بس ذى ما قلت فى عوامل تانية كتير مهمة فى الجواز و انت بتاخد بكيدج على بعضه... فلو فى بنت ممتازة و بتحبها و اكبر منك بسنة او 2 بالكتير مفيش مشكلة خالص و متترددش لحظة طالما بتحبها و هى بنت ممتازة و طباعها مريحاك... بس سنة او 2 max مش تكون اكبر منك بى 5 او 10 سنين!!!!
انا رايي ان الحب يعوض كل هذا و اذا كانت زوجتك تكبرك في السن قليلا فلا باس. . وتذكر ان رسول الله صلى الله عليه وسلم تزوج السيده خديجه وهي تكبره بكثير. .ما كان هذا عبثا ولكنه كان ليجيب عن حيرتنا وسؤال مثل سؤالك...
توكل على الله وكن معه بقلبك وخاطرك ولا تفعل شيئا بدون صلاة الاستخارة حتى يوفقك المولى سبحانه وتعالى لما فيه الخير. ..
الفكرة إن لما إنت تبقي أكبر بخمس سنين علي الأقل بتبقي خبرتك أعلي منها و بتعرف توريها حاجات و تحكيلها حاجات و تخليها تعمل حاجات عمرها ما عملتها فبيبقي فيه عنصر الإنبهار و بتبقي مستمتعة معاك عكس لما تكون قدك أو أكبر بتبقي شافت كل حاجة و عرفت زيك و يمكن أكتر فا مبيبقاش عندك حاجة تقدمهالها و يكون فيها إثارة و بعد كده ييجي الملل و المشاكل بقي
ده يعتمد عليك انت وعلي شخصيتك
وبرده علي السن اللي بتتجوزوز فيه
يعني انا متجوز وانا 22 ومكنتش كملتهم كمان ومراتي اكبر مني ب 6 شهور
اكيد مكنتش هاخد واحده عندها 10 سنين عشان يبقي في فرق
لكن لو هتجوز 25 هاخد واحده عندها 21 مثلا او 20
بحس ان صحابي اللي متجوزين اصغير منهم بيبقو سعداء اكتر لان الزوجه بتحس انك اكبر واعقل واكثر خبره منها وده مش معناه ان الكلام صح في كل الأحوال
ساعات بيبقي الزوج اكبر ب 10 سنين وتافه ملوش لازمه
يبقى أية يا راجل اللى مخليك محتار؟؟!!
هى لما تكون أكبر منك بسنة واحدة بس تبقى دى مشكلة؟؟!!
و بعدين أنت قلت أهم حاجة تخليك متأكد أن الأنسانة دى لازم تكون شريكة حياتك وهى أنها مش مخلية مكان لحد تانى فى دماغك يعنى أنت مش شايف ولا بتفكر فى حد تانى غيرها ....
دة أجمل أحساس ممكن يحس بية راجل ناحية فتاة أحلامة ....
مرة سمعت واحد بيقول كلمة عجبتنى أوى وهى:
لا تتزوج الشخص الذى تستطيع أن تعيش معة ....
تزوج من لا تستطيع أن تعيش بدونة ....
بيختلف من حاله لحاله على حسب الشخصيه
عارف المشكله أيه ؟
ان انا لسه عمري 20 سنة
مرجله تخبط المساعر ... خايف يكون ده جزء منها
و في نفس الوقت خايف أخود راحتي أوي في الوقت ف تروح متي و ملاقيش نفس الاحساس تاني مع حد تاني
+ عقبال ما اتخرج و أخلص جيش حيكون عمري 24 او 25 سنه و هى أكبر مني
فهل حرام اقعدها معايا ده كله ؟
السلام عليكم ورحمه الله
فرق السن فى الزواج مهم جدا ويجب عدم اغفاله والاهل عندهم حق بان الرجل يجب ان يكون اكبر فى السن للاسباب التالبه.
المراه نظرا لظروف الحمل والولاده يظهر عليا فارق السن اسرع وايضا تعجز اسرع.
فلو واحد عنده 25 سنه تزوج امراه عندها 30 سنه بعد 15 سنه سوف يكون عنده 40 سنه
وهو قمه النضوج العمرى والمالى ( يعنى وصل مركز كويس فى العمل ) والمراه تكون وصلت
الى 45 سنه وتقدم العمر ابتدا يظهر عليها والزمن عامل شغله معاها.
والراجل يبتدى عينه تزوغ بعد ذلك على الشابات الصغيرات .
المراه ايضا تريد الراجل الذى لديه خبرات فى الحياه الذى تامن بجانبه - يعنى لما اقول لها لاتمشى فى هذا الشارع بالمساء فتثق فى كلامه - بعكس اذا كان طائش وليس له خبرات.
فيبداون فى الجدال والنقار ولايستطيع اقناعها .
كلمه الحب كلمه جميله ولكنها لاتصلح للاستمرار وسوف تنسى بعد بعض الوقت بعد انتهاء الرغبه - بسبب المشاكل الماديه ومشاكل الاولاد وايضا الاهل.
الشى الجميل فى الحب ان يتحول الى عشره واحترام وقبول من الطرفين الزوج والزوجه .
يا رامى كويس أوى أنك عارف أن أنت فى فترة تخبط المشاعر ....
تصدق بالله أنا فى أغسطس الجاى هتم 34 سنة ولسة حاسس أن مشاعرى متقلبة ....
ممكن أحس أنى ميال لزميلتى دى و بعد شوية أكبر دماغى منها وبعدين تلاقينى بفكر فى واحدة تانى وبعدين أكبر وهكذا ....
فى رأيى أنك تسيبها بظروفها و شوف الأيام الجاية مخبية أية ليك وليها ....
يعنى لو فى نصيب هتجوزها مهما حصل ومهما كانت الظروف و لو مفيش نصيب فمهما عملت مش هتكون مقسومة لك عشان محدش بيتجوز مرات حد تانى ....
انا من وجهة نظري فرق السن مش فارق في حااااجة ... لكن فعلا العقبة اللي هتواجها في النقطة دي ( لو هي اكبر بشهور حتى :( الاهللللللللللل من الطرفين :( :( :(
الأهل كمان (وخصوصآ أهل العريس) ممكن يزرجنوا لو عرفوا أن العروسة أصغر بسنة أو 2 ....
لما أتنيلت خطبت أول مرة :crying1: كنت أكبر من خطيئتى ب 3 سنين بس ....
أمى بهدلتنى قبل الخطوبة (اللى تمت غصب عنها) و قالت لى:
لما تبقى البنت داخلة على التلاتين متجوزش واحد عندة 32 المفروض أنها تتجوز واحد فى أواخر التلاتينات وأنت المفروض أنك تتجوز واحدة عنها 24 أو 25 سنة ....
معظم الأهالى فى مصر بيحسبوها كدة ....
وكمان تلاقيهم مابيحبوش خاااااااااالص العروسة لما تبقى فى التلاتينات ....
المرأة تكون اكبر عشان الجوازة تنجح ده معتمد تماما على شخصيتهم هم الأتنين ودرجة اقتناعهم ببعض
ومش صحيح ان الراجل الأكبر هيعلمها حاجات ومعرفش ايه لأن اتقدم لى ناس 40 سنة وبصراحة مشفتش اعيل من كده وتلاقيه لسه بيسألأ مامته فى كل فتفوتة وملوش شخصيىة وتلاقيه لا بيتحمل مسئولية واحيانا مبيفهمش حاجة فى الدنيا
صحيح المفروض الخبرة تيجى مع السن بس الواقع غير كده فى صديقتى عندها 23 سنة عاقلة وبتصرف امورها وناجحة فى جوازها احسن من صديقة ليا عندها 40 سنة ومتعرفش حاجة فى الدنيا وساذجة جدا جدا
المشكلة ان فى ناس مبتطورش نفسها مهما كبرت ولا بتستفيد من تجاربها فى الحياة وهتفضل كده لحد ما تموت
ده بالنسبة للخبرة والشخصية اما الأهم قدرتهم عالتعامل مع نظرة الناس لهم وتصرفات اهلهم لأن الجواز اصلا له مشاكله مش ناقص مشاكل من بره
وفعلا لما الرسول عليه الصلاة والسلام اتجوز السيدة خديجة رد عل ى السؤال بس شوف شخصيتهم هم الأتنين عاملة ازاى
والصحابة مكنش بيهمهم الكلام ده ولا واحدة مطلقة حتى كام مرة ولا ارملة وعندها ولاد
لكن احنا اهو بعد 1400 سنة ومش قادرين نغير مفاهمنا الموروثة وصاحبتى عندها 35 اتجوزت واحد عنده 28 وكنا ف ى فرح واول مرة اشوفهم مكنتش اعرف لسه فبقول فى سرى ايه ده هى واخدة واحد كبير كده ليه فعلا شكله اكبر منها بكتير بس السعادة كانت مرفرفة عليهم وبعدين لقيت صاحبتى بتقوللى اقوللك سر بقى ده هى اكبر منه ب 5 سنين
لأننا اتربينا ان ده مينفعش
قلتلها انا احترمته جدا لأن هو كده راجل حقيقى قدر يتجوز اللى اختارها ويتعامل مع عيلته وعيلتها كمان
الموضوع صعب على الطرفين بس قصة انها تعجز دى برضه فروق فردية لأن فى ستات بتبقى فى العشرينات وجوزها يتجوز عليها واحدة اكبر منها ويمكن منه لأنها خلاص فقدت حماسة الحياة بينما واحدة اكبر منها روحها شباب ونفس الشىء بيحصل فى الرجالة
كمان فى ستات مش بيبان عليهم السن والبوتوكس موجود ربنا يخليه: )
وفى ستات صغيرة وشكلها عجوز وتديلها اكبر من سنها ب10 سنين
اما بالنسبة للحمل فى برضه ناس اتجوزت فى العشرينات وفضلت 15 سنة على ما خلفت وده رزق من عند ربنا هيديهولك مهما كان سنها وكان فى واحدة فى بريد الأهرام عندها 35 وحماتها فسخت الخطوبة وقالتلها انا عايزة افرح باحفادى وانتى خلاص دخلة على ال 40 وربنا عوضها بواحد تانى اول ما اتجوزت جابت 3 توائم بدون مخصبات
بس مشكلتنا اننا بنربط كل حاجة بالأسباب والمنطق بينما رب الأسباب بيغير كل توقعاتنا
وواحدة صاحبتنا اتطلقت مرتين واللى اتجوزها مكنش اتجوز قبل كده وكان عندها ابن كمان وما شاء الله فى منتهى السعادة وفات سنين طويلة على جوازهم ولسه بيحبوا بعض
بس برضه هو شخص متميز جدا
المشكلة فى الاهل
لكن انا ليا واحد صاحبى خطب واحده اكبر منه 5 سنين ، ومتفاهمين وهو سى السيد برضه وهى عاقلة كفاية
فانا شايف ان السن مش هو السبب الرئيسى
اهم حاجه فى الجواز ، ان العروسة تكون صاحبة دين ، والله لو عندها 30 سنة هتاخد بالها منك وتعمل اللى عليها المهم تكون صاحبة دين بس
@Ghosts : المشكلة انه الأهل لسه فاكرين اننا عايشين فى ايامهم لما كان الجواز سهل والراجل يتجوز واحدة اصغر منه بمراحل عشان يبقا ليه كلمة عليها والكلام دا .. لكن الزمن اتغير والجيل دا غير اللى قبله تماما فى كل حاجة دا حتى الخبرة اللى الجيل اللى قبلنا اخدها فى سنين احنا بناخدها دلوقتى فى ايام .. لكن والدتك عندها حق فى نقطة انه فوق ال30 كبيرة مع ظروف الحياة فى مصر والضغط النفسى وشيل الهم الناس بتعجز بسرعة مش زى بره مثلا تلاقى الواحدة عندها 45 ولسه فى عز شبابها عشان مش عايشين فى ضغط زينا
@azmeralda: اولا تحية لكلام حضرتك
مش شرط السن يبقا دليل على الخبرة ولا المسئولية نهائى ومدام متفاهمين وهيقدروا يساعدوا بعض على عقبات الحياة يبقا إيه اللى يمنع
بس ليا تعقيب على الجملة دى
هو دا اللى يزعل بقا ليه الناس بتبقا بالفضول انها تعرف كل تفاصيل حياة 2 اختاروا بعض وينقدوهم وحتى لو هما مقتنعين ببعض يقعدوا يكرهوهم فى بعض .. دى من اكتر الحاجات اللى تضايق خصوصا فى الأفراح تلاقى البنات والستات كلهم ماسكين ودان بعض وعمالين ينقدوا ينقدوا ودى مش حلوة وهو احلى لأ هى احلى .. ببقا نفسى اقولهم يا جدعان ما كل واحد يخليه فى حاله هو انتو من غير عيوب يعنىاقتباس:
وبعدين لقيت صاحبتى بتقوللى اقوللك سر بقى ده هى اكبر منه ب 5 سنين