اجبار المشاه على احترام اشارات المرور

دى اهم مشكله عندنا فى مصر
تيقى الأشره فاتحه والناس تعدى وطبعا العربيات بدل ما تجرى علشان الأشاره تهدى علشان الناس اللى بتعدى
هما مش قادرين يصبروا لغايه لما الأشاره تقفل
وطبعا ده بزود مده انتظار السيارات فى الأشاره
وأقتراحى لازم يبقى فيه مخالفه للناس اللى بتعدى والأشاره فاتحه
وفعلا الملاحظ ان الناس لا تحترم اشارات المرور يبقى لازم العافيه هي الناس ما تجيش غير كده
ده غير حوادث السير تكون ماش ى فى امان الله تلاقى واحد معدى الشارع وبدون اى مبالاه (واكل فول) عاوز يخلص من حياته وتلبسها انت:oops: وطبعا انت لازم تهدى وتفاديه لأن لو حصله حاجه انت اللى حتروح فى داهيه
وطبعا ده غير اللى ماشيين فى عرض الطريق
حاجه بقت تقرف

هو بالنسبة للقانون فهو موجود مخالفة للعبور المخالف للطريق حوالي 2 جنيه فوري
لكن تطبيق القانون هو المطلوب
ولابد من حملة إعلامية للتربية المرورية في مصر في جميع وسائل الإعلام وهذا أفضل حل

وأتذكر هنا برنامج سلامتك في السعودية رأيته هناك وهو حملة إعلامية للتربية المرورية في السعودية
فلنقلدهم ولا عيب في ذلك

اقتباس:

---

المشاركة الأصلية كتبت بواسطة ahmed1981

ولابد من حملة إعلامية للتربية المرورية في مصر في جميع وسائل الإعلام وهذا أفضل حل

وأتذكر هنا برنامج سلامتك في السعودية رأيته هناك وهو حملة إعلامية للتربية المرورية في السعودية
فلنقلدهم ولا عيب في ذلك

---

عندك حق.. انا مش فاهمة يعني جهابذة الإعلام في مصر عندنا بيعملوا ايه و لا التليفزيون المصري شغال 24 ساعة على ايه؟ و راحت فين الإعلانات التوعوية بتاعة زمان؟

والله ياريت يعملوا اشارات مرور في كل الشوارع
عندك مثلا شارع الهرم مفيش فيه ولا اشارة وشارع زحمة جدا
ونادر لو لقيت واحد عنده مروءة وهدى علشان المشاة يعدوا

ولو زودوا مخالفة المشاة لعشرة جنيه الناس هتفكر الف مرة مرة قبل المخالفة

بس الاهم تنفيذ القانون بس فعلا الدنيا سايبة في مصر على الاخر

i agree with this i want the law to order this f**kin city

طيب ماهو المشاة برضه معذوريين لا اشارات يعدوا منها و لا ارصفة يمشوا عليها و زي ما المشاة بيكسروا الاشارة العربيات كمان بتكسر الاشارة طيب ايه الحل ؟؟
1- كباري علوية و انفاق مزودة بسلالم كهربائية لعبور الطريق دون اعاقة لحركة السيارات
2- اسوار علي طول الشوارع لمنع المشاة من النزول الي نهر الطريق
3- ادخال محطات الاتوبيس و السرفيس الي داخل هذه الاسوار من خلال بوابة يحرسها العسكر :policeman:
4- تشديد العقوبة بالغرامة المالية الفورية او الحبس 24 ساعة في حالة عدم الدفع

معلش هو الناس مش هاتيجي الا كده :k28::k28:

للاسف الناس غصب عنها بتعمل كده لان حتي لو الاشارة قفلت مش بيعرفوا يعدوا لان العربيات بتستمر في السير برضه ........ و كمان بالنسبة للتقاطعات بتلاقي ان لو حتي الاشارة قفلت والعربيات التزمت بالوقوف بتلاقي العربيات اللي جاية من الاشارة اللي من الناحية التانية ابتدت تتحرك و طبعا بيضيعوا كده فرصة المشاة في عبور الطريق

علي قدميك / في سيارتك / راكب ميكروباص ولا أوتوبيس
الفرد هو سبب المشكلة
الفرد هو من يملك الحل
يعني شوية نظام ممكن حالنا يتحسن
بس أحنا شعب يتفنن في مخالفة النظام ويجد لذة كبيرة في الشقاء والتسبب في إتعاس الآخرين

اذا الحل يكمن في الاتي :
1- يجب اعادة النظر في تخطيط الشارع و تجهيزات عبور المشاة مع وضع العوائق لضمان فصل المشاة عن السيارات
2- تطبيق القانون بشدة و حسم علي كل من يخالف النظام و يتعدي علي حقوق الغير سواء مشاة أو مركبات :k28: :k28: :k28:
3- زيادة التوعية المرورية و الارشادات للناس من خلال وسائل الاعلام المختلفة مع التوعية بعقوبات المخالفة

غرامات فورية كما كان في أيام "أحمد رشدي" وزير الداخلية الأسبق .. سمعت أن أحد الأقارب دفع ربع جنيه غرامة عشان كان نزل من ع الرصيف !
غرامات فورية هي اللي هاتظبط الدنيا .. بس لازم العساكر يكون عندهم نزاهة .. والغرامة تكون بسيطة عشان نضمن نزاهة التطبيق.
بالنسبة للحواجز في الطريق وعلى الرصيف ده شيء لا آدمي وغير إنساني .. ليه الحَجْر على حرية الناس؟ وليه يتعاملوا زي الكتاكيت اللي بيحلقوا عليها في عشة؟ إشارة شارع رمسيس اللي عند مسجد الفتح بيقفلوا الرصيف ببوابة والناس تقف وراها زي الكتاكيت بالظبط ولما تتقفل الإشارة يفتحوا البوابة والناس تنزل تجري في الشارع تقولش ماسورة بني آدمين واتفتحت؟!
المنظر ده بيغيظني جدا، ولو اضطررت لعبور هذه الإشارة استعمل أنفاق المترو بدلاً من هذه المهانة. بس في الأول والآخر الناس هي اللي عملت في نفسها كدة بعدم احترامها للقوانين وللإشارة.

انا بصراحه بأيد اقتراح SE_coralsea وبردو معاك يا TaoTao
بس فعلا المشكله دي لازملها حل جذري يمنع التجاوزات دي ويكون رادع بحيث ان اللي مش راضي يلتزم لازم اجبره انه يلتزم وده عشان المصلحه العامه يعني اسوار ولو حتى بقت اسوار شائكه او حتى مكهربه بس المهم اني احافظ على ارواح الناس وفي نفس الوقت احقق سيوله مروريه بتنقذ بردو ارواح ناس كتير

"بعا أضم صوتي لكل ما يحافظ على أرواح الناس
أتمنى بعد جمع العديد من الأصوات أن يرفع الموضوع بواسطة الادارة كاقتراح للجهات التنفيذية (الاعلام و المرور)