حكايتي مع ملاكي دمياط 5220

**hazem_khidr** · 14-06-2008 03:50 AM

الف مبروك و ربنا يجعلها اخر زياره.
بصراحه ما شوفتش مرور مضبوط زي مرور المحله
لا رشاوي ولا وجع دماغ
1+1= 2
معاك ورقك بتخلص و عمره ما يشحططك و عمري ما شوفت لا مهندس و لا موظف بيقبض
دي بتبقي عيبه حتي لما مهندس ياخد 20 جنيه و كلام فاضي من دا.
حسبي الله و نعم الوكيل

**modux** · 14-06-2008 04:16 AM

حازم ده انا كان نفسي اخلصها لوحدي

اقسم بالله والدي قعد يقولي خد عمك معاك او يبعتلك حد معاك ( عمي لواء اركان حرب في الجيش )
و ماشاء الله علي العيله اللي فاضلها جوز عساكر و تعلن الحرب !!!! هههه

بس كنت عايز اخلص لوحدي !!!
و يافرحه والدي لما عرف اني دفعت 400-500 عشان اخلص !!!

قالي ما انا قلتلك !!!! خد عمك او يبعتلك حد

**hazem_khidr** · 14-06-2008 05:01 AM

يا محمد اللي ليه ضهر ما بينضربش علي بطنه.
ليك قريب ضابط
يعني بمكالمه لاي حد معرفه حيسهلك كل شئ .

**transporter1000** · 14-06-2008 09:33 AM

يا سيدى الفاضل حضرتك غلطان من الاول لان احنا هنا فى مصر نش فى اليابان
يعنى كان لازم تفتح جيوبك من الاول وتصرف اقد تمن العربية شاى

**vw3** · 14-06-2008 04:00 PM

محمد انت بتحكي قصة حياتي مع عربيتي اللي أشترتها من ناس تبع مرور السلام و انا ساكن في الهرم :)
انا فضلت أرخص فيها من 12-2007 حتى 5-2008 و الرخصة تنتهي 9-2008 :)
و على فكرة انا اعتقد انها حظوظ و بس لأني رحت للمخلصاتي و رفض أصلاً انه يخلصلي عربيتي تخيلوا ؟!! هههههههههههه
فأعتمدت على نفسي و أي موظف ببقى داخل عليه أحضر الـ 20 جنيه المتينة على طول عشان أقصر على نفسي و كل الاجرآت اللي أتطلبت منك أتطلبت مني بااحرف بالاضافة إلى "ايه ده انت ساكن في الهرم ؟ طب أستنى نروح مع بعض " مع أني مش راجع على البيت !!! بس حاضر بأبتسامة عريضة و انا بجز على سناني و كان كل يوم أروح فيه المرور كنت أرجع أحسب الرشاوي اللي دفعتها عشان ورقي السليم يمشي كنت بلاقي حوالي 100 جنيه كل مرة في حوالي 10 مرات والله بدون مبالغة يعني 1000 جنيه + 1000 جنيه مخالفات من أصل 3000 منهم 3 مخالفات في يوم واحد سحب رخص :) ...3 رخص يتسحبوا و في يوم واحد ؟!!...طب رخصة السواقة و رخصة اعربية و التالتة ده رخصة أيه و في نفس اليوم يعني انا ماشي بقتل الناس في الشارع !!! انزل بقى روح الادارة المركزية شيلها من هناك و استنى للساعة 4 العصر لغاية وكيل النيابة ما يمضي لا تتشال لا لأ !!...المهم 2000 جنيه مخالفات و رشاوي و انا لسة ماعملتش حاجة في ترخيص عربية هيونداي 1300 :)
انا واحد من الناس اللي بيحبوا مصر زي ناس كتير قوي مصر جميلة بس اللي بيحصل ده و الشوارع و الضرايب و المعيشة و التعليم و المرتبات يخلوا الواحد مش شايف ميزة واحدة في العيشة هنا خصوصاً لما تعرف ان صحبك اللي عايش في دبي دفع فلوس العربية و المعرض قاللوا تعالى بعد 3 أيام خد رخصة العربية راح في اليوم التالت لقى الرخصة في انتظارة و انا بحكي الحكاية ده لواحد صحبي تاني عايش في دبي لاقيته أستغرب جداً و قال " ليه ؟ ده بيطلعوا هالك في نفس اليوم انت بتاخد العربية بالرخصة !! " الرخصة انتهت و راح يجددها بيقوللي انا كنت فاكر الدنيا زي مصر... رحت من الساعة 9 و لعبتلي 10 ضغط قبل ما اروح عشان اعرف أدي كتف و أستحمل الضرب و الزحمة...قاللي رحت لاقيت 12 شباك عليهم حوالي 4 بس واقفين و الباقي فاضي وكراسي بقى عشان الناس تجلس "مش فاهم ناس مين ماهوا ماقيش حد بيجلس كله بيخلص على طول!!" المهم...أخدت رقم "زي البنوك عندنا" و لسة بجلس لاقيت الدور جه عليا مالحأتش أجلس المهم يا جماعة كان خارج من المرور بعد ما فحص و معاه الرخصة بعد 20-30 دقيقة...لو ده اداء الخدمات للناس اللي بتدفع ضرايب يبقى هتلاقي زحمة ليه ؟!

**samehafez** · 15-06-2008 05:51 AM

هي دي مصر ................ايه يا عم مشربتش من نيلها و لا ايه
بس انا بقي في المواضيع دي بحب نظام المقاولات شابكه راكبه على طول هو بستنضف واحد و اظرفه اللي فيه النصيب و هو يلف يخلص المصلحة و انا و نصيبي مرات تمام و مرات يجي يقول انه دافع من جيبه و هكذا يعني انما اقعد الف علي الموظفين عشان يلقفوني لبعض و ده 10 و ده 20
علي كلا لو لسه متضايق من اللي بيجري في البلد حاول تغنيلها

**tutankhamoun** · 15-06-2008 07:21 AM

فتح عينك تأكل ملبن ............

تغمض عينك .......... تأكل حاجات تانية

و تحيا ج.ع.ع ..................... هاي هيئ

------------------------------------

**Engesso** · 15-06-2008 12:02 PM

المشاركة الأصلية كتبت بواسطة hazem_khidr

الف مبروك و ربنا يجعلها اخر زياره.
بصراحه ما شوفتش مرور مضبوط زي مرور المحله
لا رشاوي ولا وجع دماغ
1+1= 2
معاك ورقك بتخلص و عمره ما يشحططك و عمري ما شوفت لا مهندس و لا موظف بيقبض
دي بتبقي عيبه حتي لما مهندس ياخد 20 جنيه و كلام فاضي من دا.
حسبي الله و نعم الوكيل

انا لا اعتقد ان المهندسين اللي في المرور دول مهندسين خريجين كليات الهندسة، دول بالكتير فنيين عمرهم ما عتبوا كاية الهندسة العريقة...