الموضوع: تقرير بيرسونا عن 200 كيلومتر

... بسم الله ...
... والحمد لله ...
... والصلاة والسلام على رسول الله أفضل الخلق وعلى آل بيته وأصحابه أجمعين ...
... اللهم آمين ...

طبعا أنا ما ركبتهاش كتير لسة همة 200 كيلو فقط بسرعة لا تتعدى 90 كيلومتر في الساعة .. ولكن أول ملحوظة لي أثناء القيادة أن إحساس السرعة داخل السيارة بمجرد غلق النوافذ يتغير تماما وينعدم تقريبا ... حيث أن السير بسرعة 90 كيلومتر في الساعة أشعر بيها إنها بالكتير قوي 40 - 50 ... الإحساس ما حستش بيه غير في اللانسر الكريستالة والهوندا الأكورد موديل 90 والتويوتا الكريسيدا موديل 95 .. ولكن صراحة كل واحد من الثلاثة دول كانت السرعة فيهم تتعدى الـ 180 - 190 تقريبا ولكن كان الإحساس يساوي 80 - 90 .. وللأمانة التجربة دي كانت من فترة كبيرة وفي السعودية ولذلك قد أكون غير دقيق في نقلها

بالنسبة للعزل أنا شايفه لا يقل عن اللانسر والنيسان صني والكيا السيراتو .. بمجرد غلق النوافذ لا تشعر بالعالم الخارجي بنسبة 80 %

- تاني ملحوظة .. وهي التقفيل الداخلي بمناسبة إني كنت حاسس إني هالاقي مواد داخلية غاية في الرداءة والسوء .. ولكني فوجئت بالعكس تماما ... مثلها مثل أي سيارة في ذات الفئة .. يعني نفس خامات التابلوه هية هية بنفس جودتها في النيسان الصني وفي السيراتو وأحسن بكتير من اللانوس والفيرنا

- برغم إن شكل الكونسول والتابلوه وأماكن أزرار التكييف أحد محاور الجمال فيها ومن الحاجات اللى شدتني ليها من الأصل .. ولكن بالإستعمال حسيت إنه غير مريح في الاستخدام قليلا .. ويمكن عشان لسة مش متعود عليه ... (بالنسبة لبوابة إدخال الهواء الخارجي الى داخل مقصورة القيادة اللى هية الزرار بتاعها موجود في البكرة بتاعة درجات الحرارة ... هل لازم كل مرة أطفي العربية وأشغلها أدوس عليه عشان مايجيبش هواء من برة ... ولا في طريقة تخليه شغال على طول من غير ما أدوس عليه كل مرة أشغل فيها التكييف أو المروحة)

ما شاء الله نور التابلوه جميل جدا بلونه الأبيض والبرتقالي والأحمر .. عاجبني أكتر بكتير من نور تابلوه الجن تو البرتقالي الداكن

المساحة المخزن فيها الجنط الاستبن بداخل الشنطة كان ممكن تكون مكان رائع لتخزين بعض العدد البسيطة أفضل من كدة بكتير ... فيها مساحة كبيرة مهملة لم يتم استغلالها

من الحاجات اللى مدايقاني عدم وجود وحدات رفع للزجاج في حالة غلق الإنذار

حاجة كمان مش فاهمها في الإنذار بتاعها المفروض إن لو في باب مفتوح وجيت قفلت العربية بالريموت إنها ماتقفلش حسب ما قريت في الكتالوج .. لكن اللى بيحصل إنها بتقفل عادي وتطنش الباب المفتوح ده .. يعني بتسيبه مفتوح عادي وتقفل الباقي حتى ما بتقوليش بأي إشارة صوتية أو ضوئية إن في باب أو الشنطة مثلا مفتوحين ... يعني ممكن أشغل الإنذار وأمشي وأنا مش واخد بالي إن فيه باب مفتوح ... (ياريت لو حد فاهم النقطة دي يشرحهالي أكتر)

المشاركة الأصلية كتبت بواسطة doo7aa

انا معايا جين 2 2012
و لو فيه اى باب مفتوح بعد ما بشيل المفتاح العربيه بتعمل صفاره مستمره و علامة باب مفتوح ظاهره فى التبلوه
لو انت كبرت دماغك من الصفاره يبقى تستاهل ان الباب يفضل مفتوح بقى :d

ولا انت معندكش الصفاره اصلا ؟

لأ ما بتعملش صفارة مستمرة عندي لو الباب مفتوح وأنا شغلت الإنذار ... بتقفل جميع الأبواب وبس كدة وشكرا ولو الباب مفتوح بيفضل مفتوح بدون أي تنبيه ... تعمل الصفارة دي بقى لو جيت أنا قفلت الباب والإنذار شغال .. أقوم أضطر أطفي الإنذار وأشغله تاني

هل معنى كدة إن الإنذار عندي مش مظبوط ولا أنا اللى مش فاهمه !!