الموضوع: عندي مشكلة .. ممكن تشاركوني الرأي

يخرب شيطانك يانونه .... انا عمال اقرى المقاله الي كتبتيها وحاطط ايدي على قلبي .... يابنتي وانتي بتكتبي قولي بسم الله مشاء الله .... بالذات لمن تمدحي شيء. ... وبالذات ابنك ضناكي .... بسم الله مشاء الله وربنا يباركلك فيه يارب ويطرحلك فيه البركة

بصي ياستي هاتي ابنك وانتي بتحميه وبتغسليلو راسو اقري عليه المعوذات تلات مرات. .... اذا انا وانا بغسل عربيتي وبحميها بقرى المعوذات تلات مرات علشان ربنا يطرحلي فيها البركة .

وانشاء الله باذن الله باذن الله هتلاقي ربنا يوفقو .... مش عاوز اقولك ايام مكنت في المدرسة كنت شاطر في مادة الرياضيات وكنت جايب عشرة على عشرة فرحت لعمتي قلتلها على اساس تبوسني. وتقولي برافو عليك شطور. وتديني حاجة وتقلي هتلك حاجة حلوة المهم وده محصلش طبعاً بس لامت ابنها اننا جبت علامات اكتر منو وهو لأ تاني شهر ورغم اني حالل كويس بصيت لقيت نفسي خدت صفررررررررر في الامتحان من عشرة مش عارف بقه عمتي ولا ابن عمتي. سرهم باااااااتع ههههههههه

وعامةً انا مش عاوزك تحطي في بالك خالص ولا تقلقي . مش مهم العلامات او يجيب الاول ولا حتى العاشر المهم ينجح وخلاص ويتعلم ازاي يزاكر .... انا دايماً بتخانق مع ام العايل. هيا عاوزة العيال تبقى من الاوائل ومفيش حد يكره .... بس انا مش عاوز اخدع ابني واقلوا ذاكر علشان تشتغل دكتور ولا مهندس. لانهم اغلبهم قاعدين على الاهاوي دلوووقتي هههههههه فما بالك بكرة مستنيهم ايه ، ده انا نفسي كنت اكون سباك ولا حتى نقاش. على الاقل على الاقل يكون في ايديا صنعة اقدر اعلمها لعيالي هههههههه علشان ياكلو الشهد من وراها وبلا محاسبة مالية بلا محاسبة تكاليف بلا وجع قلب دلوقتي كل واحد مجبش مجموع وقاعد صايع بيشتغل محاسب شوفي كام مليون دكتور وكام مليون مهندس. وكام مليار محاسب ولا صيدلي .... لكن النهرده تعالي اتصلي على اي سباك ولا كهربائي ولا حتى نقاش يقلك مش فاضي النهرده الاسبوع الي جي طيب بكره طيب بعدووو وياريت تبعتلي حد بالعربية ياخدوني .... وروح هاتلي كزا وكزا .... ولا دي متنفعش روح غيرها وقلوا الاسطة محمد السباك بيسلم عليك. وبيقلك هاتلي لينيه نص ملي على تلات تربع. استانليس. وتفضل ياعني رايح جي علشان خاطر سمو السباك ولا الكهربائي ويشغلك معاه وبعد كده عاوز كام يسطه يقلك علشان خاطرك ٢٠٠ جنيه بس هههههههه ياحبيبي .... منك لله يابه. ياريتني كنت سباك ياريتني كنت سباك هههههههههه وتحياتي

شكرا ليكم كلكم ردودك عليا

انا الحمد لله قلت ماشاء الله لا قوة الا بالله

انا كنت باذاكر معاه لحد خامسة ابتدائي عشان اخته بدأت اقعد معاها
مستواه وقع شوية مني
بصراحة عوضته بدروس خصوصية رغم اني كنت رافضاها تماما
لان اخته تعبتني وتوبتني اني اذاكر مع حد ههههههههه هدت حيلي
و نظرا لظروف عملي مكانش عندي الوقت الكافي اني اتابعهم هما الاتنين

انا قلتله زي ما حضراتكم قلتوا
الفرق بين اللي بيذاكر والغشاش هواالفرق بين الدكتور الشاطر والدكتور اللي المريض بيموت في ايده وبين المهندس الشاطر واللي بيبني عمارة بتقع عالناس

المشكلة ان القيم والمبادئ عنده اتهزت
احنا بنعلمه ان اللي بيتعب ربنا مش بيضيع تعبه
لقى اللي بيهرجوا طول السنة جابوا اكتر منه
ونظام التنشين اللي انتوا عارفينه
ينشن على حاجة يذاكرها وهوا اللي ييجي

انا باقول له انت في حاجة بتعملها غلط مش عارفة هيا ايه
حاجة في المذاكرة .. حاجة في حله في الامتحانات

ازاي يبقى المدرسين بيشهدوله بالتفوق والاقيه جاب مجموع زي دة
انا باقيس المجموع بالثانوية العامة
زمان كانوا بيقولوا اللي يجيب 95 في الاعدادية يجيب 85 في الثانوية
دة قياسا بالمجاميع بتاعة زمان
اما يجيب في الاعدادية 85 يبقى ال75 هتدخله معهد سنتين
مع احترامي لخريجي المعاهد المتوسطة
كل واحد طبعا نفسه ولاده يبقوا احسن حاجة في الدنيا

لدرجة اني عمالة افكر اني اقعد جنبه وهوا في الثانوية العامة اذاكر معاه كلمة كلمة زي ما كان في اولي ابتدائي
بس طبعا الاسلوب دة غلط
خاصة انه ولد مش بنت

اسألكم الدعاء