السلام عليكم
ما شاء الله تبارك الله، يا رب تكون خير ليك وعليك بإذن الله ويكفيك شرها.
وأهلا بيك فارس من فرسان الفيليشا
أحب أهنيك اختيارك سكودا فيليشيا، وأقول حضرتك أحسنت الإختيار إلى حد كبير
سكودا فيليشيا عربية محترمة وكويسة ونتائج أدائها يرضيك لو حالتها كويسة وموتورها مظبوط وبتراعيه، هتستحمل المجهود الشاق وتشرفك في الطريق، أهم شئ هو إنك تعمل الصيانة عند فني متخصص سكودا وشاطر وأمين، العربية مش معقدة بس تحتاج واحد عنده دراية وخبرة في صياناتها.
كأي عربية مستعملة لازم تعمل شوية حاجات بسيطة ومهمة جدا زي:
- فحص شامل لكهرباء الموتور والكهرباء العامة من فوانيس وإشارات ومساحات....إلخ
- تغييير زيوت وفلاتر (زيت وفلتر موتور، زيت فيتيس، زيت فرامل، فلتر هواء، فلتر بنزين)
بالنسبة لزيت الموتور فحضرتك تستخدم زيت درجة 20w50 وده كل الأنواع بتنتجه، وبالنسبالي بحط زيت ليكوي مولي (ألماني)
بالنسبة لزيت الفيتيس حضرتك تحط زيت مانيوال درجة 75w90 وتلاقي منه أنواع كتير.
وفلتر الهواء رخيص ومهم جدا، ومعاه فلتر بنزين.
- الكشف على نظام الفرامل بداية من التيل، والماستر والطنابير وبالأخص الأمامية.
- تغيير سير المجموعة (سير دينامو، طلمبة المياه) بيكون واحد في الفيليشيا.
- بالنسبة لسير الكاتينة بيكون جنزير حديد ومش بيتقطع بس صوته بيعلى وعلى فكرة مش هيعيش للأبد وإنما برضه يتغير عشان نحافظ على الأداء ومعدلات التسارع ونعومة الموتور عشان مع الوقت بيريح ولو ملليمترات بسيطة.
- فحص ومراجعة على العفشة
زي المساعدين، المقصات، علبة الدركسيون، الجلب، الكوبلن وكاوتشه... وتغيير ما يلزم تغييره
- كشف على حالة الإطارات وضبط الضغوط للإطمئنان لأهمية الإطارات.
أعتقد إن كل ده مش هياخد أكتر من يوم لو مفيش حاجة هتغيرها أو تصلحها، والزيارة ممكن تكون لورشة واحدة فقط.
وبكدة أعتقد إن حضرتك تكون مطمئن لحد كبير، وأي رتوش بسيطة أو أمور فرعية تكون سهلة وبسيطة زي حاجة في الصالون أو الأبواب.
أرجو أكون أفدتك، وأكيد فرسان فيليشيا هيفيدوك أكتر لأي استفسار
المفضلات