الموضوع: دليلك بالصور قبل شراء جنوط سبور لسيارات-مقال حر

السلام عليكم ورحمة الله
طبعا احنا عارفين الجنوط ومعظم الناس بتركبها عشان تخلي شكل العربيه أحلى .. وبيعرضوه عشان يزيد من ثابت العربيه .. ده غير طبعا لو عدنك العربيه جايه بعجل حديد ب أكيد الجنوط هتديك تسارع أحسن و ومسافة فرمله اقل .. غير إن التهويه على الفرمل هتبقى أحسن .. طبعا أنا عارف إني مقلتش حاجة جديدة لحد دلوقتي.. واللي جاي برده مش جديد …

بعد ماالواحد فينا يحوشله كام قرش حلوين ويقرر إنه يروح يجيب جنط .. بيبقى رايح على الشكل والخامه ومابيقاش عارف أي حاجة عالمواصفات الجنوط دي… هتقولي هو الجنط ليه مواصفات ؟؟
هاقولك آه .. اللي كل الناس عارفاه من المواصفات هو مقاس القطر بتاعه 15 انش, 16 , 17 .. الخ … بس للاسف في أكتر من كده بكتير الناس متعرفوش … وبعد ماتصرف الحبه الحلوين اللي إنت حوشتهم .. تيجي عند أول مطب من مطبات مصر الجامدة الحلوة دي تلقي العجل بيحك في الرفرف أو تلقي العربيه فيها اهتزاز جامد على سرعة فوق 100 كم ويمكن اقل كمان وممكن تلقي المساعدين ناشفة أو لفه الدركسيون مبقتش زي الاول … طبعا كل ده بسب عوامل تم تغيرها عن الجنوط الاصليه … والمشتري للاسف معرفش ايه اللي اتغير وراح ورا الشكل والمقاس بس …
تعالوا بقى نبص على المواصفات اللي بتبقى مكتوبها على كل الجنوط ومحدش بيعبرها



الجزء الاول :
• (Diameter)القطر : وده طبعا كلنا عارفينه .. اللي هوا 15 انش, 16 انش ..







•(Width)العرض : ده عرض الجنط الداخلي من اول طرف فيه لآخره وبيبقى 5.5 انش , 6.5 انش , 7 انش..






 

•(BCD/PCD ) قطر دائرة الترباس : ده المسافة مابين كل ترباسين قصاد بعض .. بصراحة صعب شرحها .. الصوره تغني عن ألف كلمه زي ماال مثل الصيني بيقول …


والمسافه دي بتتقاس بالمليمتر وطبعا دي لازم تبقى مظبوطه على الطنابير وألا الجنط مش هيركب من الاساس .. في بعض الجنوط هتلاقي فيها 8 اخرم ودي كل 4 قصاد بعد بمقاس أو 10 وكل 5 بمقاس مختلف.. وإنت بتركب ال بيركب مع المقاس اللي عندك …






لغيه دلوقتي معظم الناس عارفه الكلام دي … ودي الحاجات الظاهره قدامك .. وإنت شايفها …
في بقى حاجات تانيه الناس متعرفش عنها حاجة … وللأسف المشاكل بتيجي منها والناس مش عارفها سببها ايه ..



• Centre Bore/مركز التجويف: ده القطر بتاع الفتحه اللي
بتدخل في المكان اللي بيركب عليه فتحة الجنط وللاسف كل الجنوط مقساتها اكبر من المقاس الاصلي اللي متركب عشان يركبوا على أكتر من عربيه و وحدة قياسها المليمتر








وده معناه إن بعد التركيب الجنط مش هيبقى محمل عالاكس
والترابيس(مسامير) مع بعض .. لأ ده هيبقى على مسامير بس ومع السرعة العاليه ومطبات و الكلام ده .. هتلاقي العربيه بتهز منك جامد جدا جدا …ومع الوقت هتلاقي الترابيس بتفك ومحتاج تربط ...


طب ايه الحل ؟؟
أكيد سمعنا عن الرينجات .. (Centric Hub Ring)

الرينجات دي ممكن تبقى الومينيوم أو بلاستيك وبتتحط في الفراغ الموجود بين الجنط والاكس …

مثلا أنا العربية عندي مقاس مركز التجويف بتعها 66.1 مم .. والجنط الي عايز أجيبه 73 مم .. ده معناه إني محتاج رينجات بالفرق بين المقسين اللي هو 6.9 مم أو 7 مم …

الأفضل إنك تاخد الرينجات من عند اللي بايعلاك الجنط عشان يركبهملك وقت تركيب الجنط وبيبق شكلها كده





 
• (Offset or ET)مقياس الأزاحه: دي هي المسافه من منتصف عرض الجنط لغيه دائرة الترابيس وفي تلاثة أنواع منها..

- صفر : المسافه مابين من منتصف عرض الجنط لغيه دائرة الترابيس هي صفر , وده معناه انهم على خط رأسي واحد
- موجب : المسافه مابين من منتصف عرض الجنط لغيه دائرة الترابيس هي موجبه ; ومعناه دائرة الترابيس طالعه لبره الجنط يعني بتقرب من شفة الرفرف وتبعد عن المساعدين
- سالب : المسافه مابين من منتصف عرض الجنط لغيه دائرة الترابيس هي سالبه ; ومعناه دائرة الترابيس داخله لجوه الجنط يعني بتقرب المساعدين وتبعد عن من شفة الرفرف





 
كل العربيات الدفع الأمامي بتركب جنوط ازحتها موجبه وممنوع تركب سالب .. جرب كده ومع اول ملف العربيه هتتقلب
و عامه 99% اللي في مصر موجب ...
معظم السيارة بيبقى الجنوط الأماميه والخلفيه مقياس الأزاحه بتعهم واحد عشان المصنع يوفر شوية .. بس لو مختلفين يبقى لازم تلزم بيهم ..
طب يحصل ايه لو جبت جنوط مقياس الأزاحه بتعها مختلف عن الاصلي… هيحصل الاتي :
- لو مقياس الأزاحه اقل من الاصلي .. يبقى الجنط هيبعد عن المساعدين ويقرب من شفة الرفرف .. ولو العربيه مش عاليه كفايه بعد التغيير.. العجل هيحك شفة الرفرف من بره

- لو مقياس الأزاحه أكتر من الاصلي .. يبقى الجنط هيبعد عن شفة الرفرف ويقرب من المساعدين .. ولو العربيه برده مش عاليه كفايه بعد التغيير.. العجل هيحك في الرفرف من جوه ويمكن يوص إنه يحك في اجزاء التعليق الداخليه من جوه ..

- لو إنت حظك حلو .. مش هيحصل حاجة من دول

وطبعا كل المقايس دي على أساس إن العرض واحد


طب ايه الحل ؟؟
الحل إنك تلتزم بالمقياس الاصلي .. والعرض الاصلي أو تجيب اقرب حاجة ليه سواء موجب أو سالب.. 2 مم أو 1 مم مش هيفرق .. بس 15مم ممكن يفرقه جامد ..

أو إنك تستخدم فواصل بالفرق في المقياس .. يعني مثلا لو الجنط الاصلي 45+ والجديد +30 .. يبقى إنت محتاج
فواصل +15 مم عشان ترجع زي الاصلي ..




وبصراحة أنا مابنصحش تركبها لأن مع الوقت هتاكل في الطنابير مع الإحتكاك وهاتعمل ازمه ..

لو عايز تعرض الجنط يبقى لازم تحسبها صح (جبنه President) صح الصح) ... محدش يعلق عليها
… لأن العرض دخال في الحسبه... يعني مش تعرض الجنط وتجيب نفس مقياس الأزاحه …

ممكن تدخل تشوف الموقع ده .. هيديك مقياس تقريبي
Wheel Offset Calculator




طب يا ترى ال كلام ده كله فين ؟؟؟؟
الكلام ده هتلقيه في الجنط من جوه محفور عليه .. وفي اغلب الاوقات البايعين ميعرفوش عن الكلام ده حاجة …




 
الجزء الثاني :
في معظم الحالات لو كبرت مقاس الجنط , يبقى لازم تغير الكاوتش بس مش مجرد إنك تغير وخلاص .. لازم تجيب المقاس ال مظبوط طب ليه ؟؟؟

عشان لازم يبقى مجموع قطر الجنط + الكاوتش هو هو نفس القطر القديم وألا قراية عدد السرعة مش هتبقى صح …
مثلا : العربيه عندي 205/65 R15 وده معناه إن العرض بتاع الكاوتش 205 مم وسمك )بضم السين ( الحائط بتاع العجل 65% من ال 205 مم و القطر الداخلي 15 انش .. طب دلوقتي أنا عايز جنوط 17 ... يبقى اعمل ايه ؟؟

أكيد لازم اقلل ال 65 % دي .. فـهتبقى 55% .. بالتقريب كده كل لما تزود الجنط 1 انش هـتقلل 5% ده لو إنت على نفس العرض .. لأن زي ماقلنا دي نسبه مئويه من العرض ..

والموقع ده هيساعد كتير لو عايز تحسبها …
Tire size calculator


واتمني إني اكون أفدتكم وأي سؤال أنا موجود :)

جزاك الله خيرا على المعلومات دي
بس احب اضيف حاجه كمان انا من حوالي اسبوعين كنت بغير مقاس جنط عربيتي كان الستوك 6J * ET 47 وكان راكب عليه كاوتش 195 /65/ R15 المهم اشتريت جنط جديد اصلي للسياره وكان مقاسه 7.5J * ET47 وكان المقاس اللي حركبه عليه هوا 225/45/R17 طبعا كلل حاجه ماشيه تمام وركبت الجنط من اول مابدأت اتحرك بالعربيه حسيت بتهبيد رهيب في العفشه غير طبيعي مع الأخذ في الإعتبار تغير المقاس والكاوتش ال Low Profile لاكن الهبد مش كده وبعد كده بكام يوم لاقيت طرف الكاوتش الخارجي بدأ يبان عليه لوود اكتر المهم ماكدبتش خبر وبعد يومين كاملين بحث على النت اكتشفت ان مقاس الأوفسيت هوا المشكله وفعلا غيرت الجنط بجنط برضوا اخر اصلي ولاكن كان مقاسه 7J * ET 54 وفضلت الخساره في تمن الجنط على اني اهلك عفشت عربيتي وبالفعل بعد التغير العربيه هديت جدااااااااااااااااا في المطبات رغم انه نفس مقاس الكوتش وكل حاجه اختلاف الاوفسيت الخلاصه
تغير اوفسيت العربيه مش مشكلة الحك في العفشه او الرفرف فقط مشكلته اكبر بكتير وهيا توزيع وزن العربيه بيبقى غلط نظرا لأختلاف اللود سنتر بتاع العربيه
انا حابيت اشاركم تجربتي واي استفسار انا حاضر
وشكرا مره اخرى لصاحب الموضوع