الموضوع: الساعة 10 مساء وعند ميدان الحصرى وعلى عينك يا تاجر

السلام عليكم ورحمة الله وبركاتة

كنت نازل بلف بالعربية شوية (زهقان) المهم وقفت قدام سوبر ماركت جنب البيت اشترى طلبات قبل ما انسى ببص لقيت فردة العربية الخلفية مريحة شوية
قلت اروح ابص على بريدجستون قبل ما يقفلوا يبصلى عليها وقد كان

للى ميعرفش اكتوبر بريدجستون fit&fix بعد مسجد الحصرى مباشرة فى حارة بطىء بس على نفس الشارع الرئيسى ومعروف اوى ان الميدان دة هوة ازحم حتة واكثر منطقة حيوية فى اكتوبر
المهم الوصف بالتفصيل الممل للمشهد الجلل الحالى

انا واقف عند بريدجستون مستنى دورى والراجل قالى انا بقفل 10 وانا من الصبح على رجلى انا حزودهالك ولو فيها حاجة تعالالى بكرة وبتاع

المهم مفيش مشاكل انا كدة كدة نازل اضيع وقت واقف ومدى ضهرى للشارع وسمعت صوت زعيق واستغاثات وفرك عجلة عربية ودخاااااااااااااان بتلفت لقيت عربية فيرنا بيحاولوا يوقفوها وجواها اتنين وعمالين يحرقوا يجروا بس العربية بتجرى بس مش بسرعتها فى حاجة اعاقة الحركة الطبيعية ليها وعاملة علامة فى الارض والعربية بتجرى والريحة اللى طالعة سواء من العربية ككل او الكاوتش والدخان

كل دة وانا مش فاهم حاجة لحد ما العربية فعلا قدرت تجرى وتكتسب شوية سرعة والناس بدات تتحرك وراها علشان تلحقها

مبدأيا طبعا اللى فهمتة وعرفتة بعد كدة لانى اخدت العربية وجربت بردة وراه زى الناس وكنت متاكد انة حيتمسك لان اولا المكان زحمة جدا وثانيا ودى باة فعلا اللى يتقال عليها قدرة ربنا سبحانة وتعالى فى ان العربية دى متتسرقش
الباشا الحرامى دخل العربية ازاى مش عارف المهم دخل هوة والبرنس التانى وكسروا تقريبا الفبر اللى حوالين الدريكسيون والكونتاكت وعروا السلوك وهما فى طريقهم للتدوير شافهم راجل معدى لا يعرفهم ولا يعرف صاحب العربية ولا اى حاجة ولكن المنظر باين اوى لاى حد حيبص بصة عليهم بس المهم الراجل بدا يستغيث بالمارة اللى افتكروة بالمناسبة صاحب العربية

المهم الباشا الحرامى دور العربية وهوووووب بيرجع مرشدير (الحمد لله الحمد لله) العربية راحت طالعة فوق الرصيف وهى جاية تنزل كانت وهى طالعة كسرت حتة من الرصيف(حتة مستطيلة من الرصيف الحلوة الكبيرة دى ) وراحت نازلة تحت العربية وحلفت ايمانات المسلمين ماهى متحركة من مكانها

فما كان من البية الحرامى الا انة يحرق على قد ما يقدر ويطلع بالعربية والعربية تقريبا ماشية على العجلتين الاماميتين وجرة الباقى وكان الحجر رافع الفردتين الخلفيتين شوية من على الارض

الحرامى مكنش فاهم فى اى او اية اللى تحت العربية وطول ما هوة ماشى ودى حاجة كمان اولا سرعتة بطيءة جدا مقارنة للحالة الطبيعية يعنى حيتجاب حتيجاب
وثانيا الحجر اللى تحت العربية طول ماهوة ماشى عامل خط ابيض عريـــــــــــــــــَض تحتة وبالتالى لو مشى من هنا لحد اسوان حتشوف خط سيرة بوضوح كمان (مش بقولكوا سبحان الخالق انا فعلا كنت مستغرب جدا العربية مش حتتسرق لو اية حصل :) )

طبعا انا على بال ما استوعبت الموقف ودورت وطلعت كان البرنس اتمسك عند التوحيد والنور (بعد المكان اللى اتحرك منة ب 200 متر تقريبا)

انا روحت لقيت الشباب عاملين احلى واجب ممكن يتعمل لدرجة انة معدوم العافية بكل معنى للكلمة والناس ماسكينة ومستنين الراجل صاحب العربية يجى يشوف حيعمل فية اية

طبعا فى شوية حجات انا كتبت الموضوع دة علشانها

اولهم ان عند الحصرى فى مدرعة جيش لم تحرك ساكنا (الناس راحولهم وتقريبا متحركوش معاهم علشان ياخدوا الواد لدرجة ان الناس كان تقريبا واخدين قرار انهم يموتوة )
عند ميدان الحصرى فى عدد 4 عساكر مرور لتسهيل الحركة للميدان لم يحركوا ساكنا
المكان زحمة جدا وازاى جالة قلب انة يسرق فى المكان دة وبالطريقة دى (ياخوانا كلة يخلى بالة بجد لانهم بيسرقوا فى اى وقت واى مكان )

الحرامى دة غالبا حيموت من الضرب بجد انتوا مش متخيلين الكبت اللى موجود عند الناس والرعب والفزع من موضوع سرقة العربيات اللى بتحصل يوميا بالاضافة لاحوال البلد السيئة جدا

الغريب باة ان اليوم قفل معايا انا شخصيا كدة قفلة ما شاء الله :( لان انا الصبح اساسا صاحى الساعة 7.20 على صوت انفجارات البرق والرعد وبالمناسبة اللى من اكتوبر بس حيعرف انا بتكلم فى اية النهاردة الصبح كان البرق والرعد كانة قنابل بتترمى من طيارات فى السما(دة اللى جة فى بالى اول ما صحيت على الصوت ) وطبعا من ساعتها وانا قاطع الخلف تقريبا

ربنا يستر طريقنا وياخد كل حرامى قادر يا كريم