صاروخ شهاب 3 يطارد وزة جمال ابو شنب
كنت قد قررت ان اقوم برحلة استكشافية لعروس البحر المتوسط مع مجموعة من الاصدقاء ونقضي يوم هناك نغير جو وابحث امكانية قضاء العطلة الصيفية هناك مع زوجتي العزيزة وابنتنا المصونة نانا الزنانة وده لاني حديث العهد بالجواز (تاني سنة) والصيف السنة اللي فاتت كانت الانسة نانا لسه صغنونة ومتستحملش السفر والمصييف المهم اتفقت مع مجموعة من الاصدقاء اننا نسافر الخميس بليل ونقضي الجمعة هناك ونيجي في نفس اليوم بليل
وبعد شوية اتصالات باعضاء شلة الانس قدرت اجمع 6 منهم انا وجمال ابوشنب واخرين واستقرينا علي ان كل عربية تشيل 3 و اتقابلنا عن داندي اول طريق مصر الاسكندرية الصحراوي
ومع اول ساعات يوم الجمعة الساعة 12 بليل انطلقت وزة جمال طائرة فوق بوابات الطريق (طبعا بعد دفع ال 4 رسوم المرور) بسرعة متوسطة ما بين 100-120 يتبعها صاروخ شهاب 3 ايراني الصنع (برايد سابا) بسرعة جنونية للحاق بالوزة المنطلقة وما ان لاحظ جمال فرق التسارع بين السيارتين حتي بداء الدم يغلي في عروقة ليضغط علي الاسليراتور لذيادة السرعة وهكذا استمرت المطاردة حوالي نصف ساعة بين الوزة وشهاب 3 دون تحقيق اي منهما النصر علي الاخر (بغض النظر عن التسارع ) حتي اتسع الطريق وقل عدد السيارات فبدءات المطاردة تاخد طابع تشويقي جبار جعل الوزة تنطلق بسرعة تجاوزت ال 170 كم في بعض الاحيان في محاولة يائسة للهروب من السابا الا ان السابا كانت بالمرصاد اثناء المناورة والشد اتضح الاتي
1- تفوق شهاب 3 علي الوزة في التسارع بشكل درامي
2- تفوق الوزة في الثبات الافقي مع مطبات الهواء علي السرعات العالية وده طبعا راجع لوزنها الثقيل ولعفشتها الناشفة وعلي العكس عربيتي كانت بتنطط زي الكورة الكاوتش مع ارتفاعات وهبوط الاسفلت والسرعة العالية وعلي فكره ده اكتر حاجة كانت بتخوفني
3- تفوقت الوزة في العزل بشكل جعل الكابينة هادئة تماما علي عكس اصوات ارتطام الهواء اللي كان بيتسمع بوضوح بعد ال 150 كم
4-تفوق السابا (عفوا شهاب 3 ) علي الوزة في الثبات علي المنتحنيات بسرعات تجاوزت 130 - 140 في حين ان الوزة لعبت بجمال علي سرعة 140 في احد الملفات (جمال بيقول ان سرعتة كانت 170 بس الصورة علي الموبيل كانت فوق ال 140 بحاجة بسيطة)
5- السابا مع الجري امبير الحرارة بينزل لاكن الوزة امبيرها فضل ثابت علي النصف
6- كانت صورة الوزة في المرايا في منتهي الجمال (ماشاء الله) في الجري علي الطرق المظلم المكحل بانوار الزينون وبتصميم فوانيسها لدرجة اني اكتر من مرة تتشابة علي مع سيارات اخري كا الاوكتافيا والاوبل الجديدة والانسر
7- تفوقت السابا في استهلاك البنزين فانا فولتها من بنزينة شل اللي قبل البوابات وبالتفويلة راحت اسكندرية رايح جاي ده غير اللف في البلد ومفولتهاش تاني الا في نفس البنزينة لما رجعت
عند وصولنا للاسكندرية فوجئنا بانتشار للوز بشكل غير عادي خاصة الوزة الكبيرة
في طريقنا للعودة لم اري للوزة اثر علي الطريق وعند وصولي لداندي بعد البوابات اتصلت بجمال لاجد انة بيني وبينة فرق 35 كم
(ملحوظة) رغم كل التحسينات التي طرئت علي الطريق فمازالت هناك كيلومترات خالية من اي نوع من انواع الاضاءة لدرجة اني شوفت بالصدفة علي نور عربية تانية عربية نقل مفيهاش ولا لمبة منورة ومحملة انابيت وماشية علي اليمين بتتمختر شكل للبيع عشان كده الطريق لا يخلو من المخاطرة خاصة وان رواد الطريق تفاوتت سرعاتهم بين ال 140 وانت طالع وعلي السرعات ديه الناس بتعدي من بعض وبتاخد غرز !!!
اخيرا كانت رحلة ممتعة الاسكندرية في منتهي الجمال في الوقت ده رايقة والمية نظيفة والشقق فاضية وباسعار تبداء من 100 لليوم وعجتني منطقة المعمورة كمصيف عائلي جدا (فكرتني بمطروح) نصيحة لعشاق الاسكندرية الحقوها في الاسبوع ده قبل الزحمة
