قرية أندلسية في مرسى مطروح

**wael2sh** · 16-05-2012 04:39 PM

حد يا جماعة يعرف معلومات عن قرية أندلسية أنا رحتها مرة واحدة من كذا سنة وكانت كويسة
لو حد يعرف مثلا رقم تليفون سمسار هناك أو الالعاب المائية بتفتح من شهر كام و ايجار الاسبوع في حدود كام وياريت لو حد راحها قريب يقولي لسة كويسة ولا باظت وبلاش ارورح

شكرا للمساعدة :w_030:

**Ghosts** · 16-05-2012 08:49 PM

شوف يا سيدى ....
أنا رحت صيفت فى أندلسية 5 سنين ورا بعض من خلال أعلانات الأهرام والوسيط ....

الأسعار على حسب موقع الشالية ....
يعنى الشالية اللى على البحر طبعآ سعرة بيبقى أعلى من الشالية البعيد عنة ....

فى شاليهات نضيفة وفى شاليهات زبااااااااااااالة ....
دة بيعتمد على الناس اللى هتأجر منهم ....

يعنى أنا فاكر أنى كنت بأجر الشالية من واحد صاحب محل زهور فى مدينة نصر ....
كان راجل محترم وشيك ومهتم جدآ بالشالية وكنت بأنبسط أوى فية ....

بس للأسف جة فى سنة راح زود سعر الأيجار أوى فأنا بنصاحتى قلت أشوف حد غيرة ....
لاقيت ناس فى المعادى عايزين يأجروا الشالية فى أندلسية وكان على البحر ....

أول لما دخلت بيتهم لاقيتة قذر جدآ جدآ وللأسف معرفتش أسحب نفسى بالذوق ولما رحت الشالية لاقيتة بردوا قذر جدآ جدآ و كان أسبوع منيل ب 60 نيلة ....

أنا بقولك على الموقف دة عشان لما تحب تأجر يبقى لازم تكون بتتعامل مع حد شيك وبيتة نضيف ....
وفى كمان فى القرية فندق ممكن تسئل على نظام الحجز فية بالتليفون ....

الحاجة اللى هتضايقك فى أندلسية عشان أكون أمين معاك هى رحلات اليوم الواحد اللى بتعملها النوادى و مراكز الشباب هتلاقى الدنيا فااااااااضية الصبح بدرى بس من بعد الساعة 12 لما يهل عليك فوج من أفواج الرحلات الهباب دى هتلاقى نفسك فى مولد (زحمة و وش وعيال بيئة) ....
أنا كنت أول ما شوفهم جايين كنت أخد بعضى وأجرى على الشالية علطول ....
نصيحتى أنك تروح تقضى 3 أيام فى الغردقة فى أى قرية فيها ألعاب مائية زى السندباد عشان الجو هناك و البشر اللى حواليك هيبقوا أنضف و أرقى ....

**wael2sh** · 17-05-2012 11:42 AM

شكرا للزميل العزيز على النصيحة أنا برضه تقريبا كنت هناك من أرْبع أو خمس سنين وخايف تكون القرية اتنيلت في المدى دي بصراحة من أرْبع سنين كانت معقولة بس حسيت إن صيانة القرية مش تمام قوي و عازم حماية الصيف ده وهو نفسه يروح مطروح علشان كده قلت أسأل وكان في سمسار معروف هناك اسمه الشيخ وسواق تاكسي ومعروف قوي بس للاسف نمرته راحت مني وخايف ألبس في شاليه مش كويس و الاجازة تبوظ ,,,لو كان الشاليه النضيف البتقول عليه كويس اديني رقم الراجل وجزاك الله خير

**amdd** · 17-05-2012 12:09 PM

شوف يا سيدى انا ساكن بينى وبين اندلسية كيلومتر واحد وعايش هناك على طول صيف شتا
نصيحة لو عايز تتمتع سيبك من اندلسية انا كنت فيها اخر مره الصيف اللى فات اكتر حاجه ليها شعبية هناك الالعاب المائية بس بصراحة مستواها فى النازل خصوصا مع زحمة اليوم الواحد اللى غالبا بتبقى الجمعة والاحد
وحكاية الشاليهات دى انت وحظك وممكن تدخل القرية وتقول انا عايز ااجر شاليه اسبوع هتلاقى اللى ياخدك ويفرجك بدل الشاليه عشرة وتختار براحتك الذوق اللى يعجبك
لو عايز تبقى فى قلب مطروح تبقى الاندلسية ولو عايز بره مطروح شويه بالعربية 20 دقيقة يبقى سانتا مونيكا
بس معلش سوال الليلة فى شالية الاندلسية بيعمل كام...؟\

**Ghosts** · 17-05-2012 03:13 PM

المشاركة الأصلية كتبت بواسطة wael2sh

لو كان الشاليه النضيف البتقول عليه كويس اديني رقم الراجل وجزاك الله خير

للأسف ضاع تليفونة منى ....

**أبو_يوسف** · 17-05-2012 05:45 PM

الالعاب في اندلسية مش بتشتغل قبل شهر 6
واليومين دول اليوم ب 150ج او الاسبوع ب 1000 لان الموسم لسه مبدأش
عايز اسأل الاستاذ amdd
عن قرية بلوبيتش.. رأيك فيها ايه؟
ولو حضرتك تعرف اسعار سانتا مونيكا

**Ayman999** · 17-05-2012 10:50 PM

الاندلسة زحمة قوي السنة اللي فاتت

**wael2sh** · 20-05-2012 12:09 PM

المشاركة الأصلية كتبت بواسطة amdd

شوف يا سيدى انا ساكن بينى وبين اندلسية كيلومتر واحد وعايش هناك على طول صيف شتا
نصيحة لو عايز تتمتع سيبك من اندلسية انا كنت فيها اخر مره الصيف اللى فات اكتر حاجه ليها شعبية هناك الالعاب المائية بس بصراحة مستواها فى النازل خصوصا مع زحمة اليوم الواحد اللى غالبا بتبقى الجمعة والاحد
وحكاية الشاليهات دى انت وحظك وممكن تدخل القرية وتقول انا عايز ااجر شاليه اسبوع هتلاقى اللى ياخدك ويفرجك بدل الشاليه عشرة وتختار براحتك الذوق اللى يعجبك
لو عايز تبقى فى قلب مطروح تبقى الاندلسية ولو عايز بره مطروح شويه بالعربية 20 دقيقة يبقى سانتا مونيكا
بس معلش سوال الليلة فى شالية الاندلسية بيعمل كام...؟\

**wael2sh** · 20-05-2012 12:13 PM

من 150 ل 250 بس معنديش مشكلة في الفلوس عندي مشكلة في الالعاب المائية علشان الاولاد لو سانتا مونيكا فيها العاب معايا وزيادة في الفلوس مفيش مشكلة

**ياسر شقو** · 22-06-2017 02:20 PM

السلام عليكم ورحمه الله وبركاته
انا كنت ناوي اشتري شقة او شالية في قرية في مدينة مرسى مطروح
وانا ساكن في مدينة القاهرة بالتحديد في مدينة حلوان
عاوز نصائحكم وتجاربكم في مطروح
اشتري ولا بلاش
ولكم الشكر والتقدير