الحلقة الخامسه / رحلة العوده من وجه قبلي
اولا قبل ما احكي رحلة العودة هحكيلكم علي شوية مواقف لذيذة كدا وانا في البلد بالعربية
اولا انا لحقت الفرح في اوخره وطبعا لازم امشي ورا العربيات اللي بتزف ابن عمي وكلها بلا فخر نص نقل والطريق علي يميني ترعه وعلي شمالي الغيطان والعربيات بتجري من حواليا زي ما يكون الواحد واقف وتلاقي عربية بتجري من جبنك زي الرهوان وكان نفسي اقطر عربيتي في اي عربية منهم علشان الحقهم وطبعا الدنيا ضلمه كحل ولمبة الجاز اللي عندي يدوبك مورياني لون كبوت العربية ودخلنا في حته ما يعلم بيها الا ربنا جسر شكله بيطلع في الروح بيعدي بينا من فوق النيل قولت ربنا يستر وبعد ما نزلت من عليه لقيتها ارض كلها زراعية بس مش مزروعه غرقانه في الطين قولت نهرنا فل وصممت ارجع بظهري علي الجسر تاني واحلي حاجه ان اللي صمم الجسر ده تقريبا صممه علي عرض عربيتي بالظبط يعني سنه يمين او شمال هنزل بالعربية في الترعة هههههههه بس الحمد لله طلعت سوبر مان الصعيد وعرفت ارجع بالعربية كلها مارشدير علي الجسر
ثانيا بس الحق يقال انا محستش بقيمة العربية اللي انا راكبها غير لما روحت بيها البلد اكمنهم مفيش حد في البلد يملك عربية ملاكي فالكل عمال يقوم من الارض يشوف مين اللي راكب البي ام دي ههههههههههه وعمال بدنجل بيها وسط الزراعات والناس وفعلا مكنتش عايز ارجع من البلد بسبب الشو اللي كنت عايش في البلد بيها
وجت لحظت الرجوع لارض الوطن وطبعا انا ركبي بتخبط في بعضها من العربية وكان نفسي قبل ما امشي بيها اخد صورة تذكرية بالعربية مع الشباب دول
المهم روحت للعربية وزودتها مايه من الترعه يمكن البلهارسيا تجيب نتيجة مع الريداتير والماتور وقيست زيت التموين اللي حاطه للعربية ولقيته 100 فل و 14 ويله بينا يا رجالة علي الزراعي بس فوجئت ان ابويا بيخلع مني وبيقولي روح انتا وانا هجيلكم بكره قولتله بتبعني يا حاج قالي عيب عليك امشي انتا بس وانا هاجي بكره بالقطار قولتله ماشي يا حاج بتضحي بيا وسبني وخلع واضطريت اني اروح انا وخالي اللي قعد يتحايل عليا انه يقعد مع ابويا ويجي معاه بكره في القطر بس قولتله ابدا انتا بالذات مش هسيبك زي ما جيت معايا لازم تروح معايا
وسلم امره لربنا وجه معايا اجمل حاجه في الرحلة هيه امي اللي متكلمتش كلمه واحده ولا علقت علي اي حاجه تقريبا كانت بتخزنلي لما اروح البيت وتطلع كل اللي جواها عليا ههههههههه ست الحبايب يا حبيبه
وطلعنا ولسه بقول يا هادي و علي اول الطريق الزراعي والاقي اللي مكنتش عامل حسابه مطره نازله علي عربيتي انا تقريبا بس طول الطريق المطره شغاله ومش مطره عاديه دي مطره بطين وطبعا المساحات عندي ماركة الهلال والنجمه الزهبيه مكانتش شغاله وطول الطريق مطلع راسي بره العربية علشان اشوف الطريق وحاسس اني مبلول من تحت محدش يفهمني غلط انا قولت بيني وبين نفسي طب انا وشي مبلول وكله طينه وبقيت شبه شيكابلا وعادي لكن ايه الميه اللي جيالي من تحت دي وافوجئ بأن البنطلون الجينز كله اسود مع ان كان لونه كخلي اتاري مفيش لباد او اي فاصل بيني وبين الماتور والميه والطين كله داخل عليا جوه العربية كنت حاسس اني راكب نورماندي 2 وهتغرق بيا قولت ولو بردك هكمل وهروح يعني هروح وعمال بتحايل علي السحابه اللي ملازماني طول الطريق دي انها ترحمني وتبعد عن العربية شوية مفيش فايده 60 كيلو سايق تحت المطره وماسك منديل في ايدي امسح بي وشي شوية وازاز العربية الامامي شوية لحد ما المنديل اتحلل في ايدي وبعد ما عديت بني سويف وعند اول مطب بعد مدينة بني سويف والاقي العربية بطلت قولت اشطه اللعب اشتغل وريني يا ميسي هتعمل ايه
ببص في مراية العربية اللي انا واخدها من جهاز العروسين سرقه لقيت منظري كدا
قولت محدش هيقفلي وانا بمنظري ده :8941[1]: قولت هزق العربية ونزلت خالي يزق معايا ونطيت جوه العربية ودورتها ودارت الحمد لله كان نفسي الحقيقة اسيب خالي في الطريق واجري بالعربية بس للاسف محتاجه كمشجع معايا في الطريق لكاس العالم قصدي لحد ما اوصل البيت المهم ركب ولقيت نفس المشكله حصلت بردك مع المطب اللي بعده اتاري البيه الميكانيكي اللي فصلي الشفاط في الطريق وانا رايح العربية واطيت منه وكل ما اجي عند مطب تفصل مني ولازم انزل ازق وادور العربية واتعودت بعد كدا اني لما اقرب علي مطب ادوس بنزين وفرامل مع بعض هههههههههه علشان العربية متفصلش وبقيت طول الطريق علي هذا الحال ولقيت ركبتي مره واحده وقفت من كتر الميه اللي رشحت عليها طول الطريق وقولت لخالي يبتدي يعمل بلقمته ويدوسلي بنزين رجلي اليمين خلاص انفصلت مبقتش حاسس بيها وخالي طبعا ملهوش في السواقة خالص وكان هيلبسني كذا مره في عربية واحنا ماشيين اقوله خف رجلك علي الدواسه يكبس اكتر عليها كان هيضيعني وطبعا الحاجه امي نايمه ورا ولا تعرف اي حاجه عن اللي بيحصل ههههههههه والحمد لله وصلنا ارض الوطن ببعض الخسائر منها طبعا ركبتي اللي لسه بعالجها لحد وقتنا هذا وطبعا العربية بقيت شكل الزريبة بتاعت البهايم من كتر الطين اللي دخلها والازاز اللي اتفيم بالطين واحلي حاجه لما وصلنا المفروض بعدي علي بيتي الاول وبعدين علي بيت خالي ولقيت خالي بيحلف بالطلاق انه هينزل وياخد تاكسي استني بس يا خالي هوصلك والله ابدا ما امشي معاك متر لقدام تاني وتقريبا شتم بس مسمعتهوش كويس ههههههههه ولحد كدا ابقا انتهيت من سرد الحلقة الخامسه وعايزكم تصبروا نفسكوا بالحلقات القديمة شوية لحد ما اخلص المعرض بارض المعارض يوم الاثنين القادم وعليكم خير ونهارنا ابيض ان شاء الله
