الموضوع: تجربه ايجار سيارة من Europcar

السلام عليكم ورحمة الله شباب نايل موتورز
وحشتوينى جدا ، انا غيبت عنكم 10 ايام كنت فى مصر وللاسف كنت تقريبا مش بدخل على النت.

انا قبل كده كنت فتحت موضوع بسال فيه عن ايجار سيارة اتوماتيك تامين شامل وبدون ما بكتب شيكات على نفسي وتكون بسعر معقول.

وبعض الاخوة الاعضاء طلبوا ان اكتب عن تجربه ايجار عربيه من شركة Europcar
علشان يقدروا يستفيدوا من تجربتى معاهم

قبل ما انزل ب 4 ايام عملت حجز عن طريق الانترنت
لسيارة رينو كليو اتوماتيك مكيفه لمدة 10 ايام
تكلفه الايجار 402 $ وبعد الضريبة بقت 415$ يعنى تقريبا بالمصرى 2200 جنيه ، يعنى اليوم تقريبا ب 220 جنيه

نزلت من المطار لقيت مندوب الشركة مستنينى فى المطار
خدته ورحنا المكتب ( الاجراءات بتمضى على عقد ايجار)
وبياخد صورة البطاقه والرخصة
وفيه تامين 300 دولار ( لاما تدفعهم كاش وتاخدهم لما تسلم العربيه او يعمل عليهم Hold فى الكريديت كارد)

الدفع باى عملة مش شرط الدولار

معاملة الموظفين ( ممتازة)

الموقف اللى حصل معايا
انا مكنش معايا الكريديت كارد لانى لغيتها وكنت مستنى الجديدة تطلع وسافرت قبل ما اخدها فحجزت بكريديت كارد واحد صاحبي
لكن الفلوس ما اتسحبتش من الكريديت كارد
فالشركة اتصلت بيا وقالولى ان الفلوس ما اتسحبتش (الكلام ده بعد ما اخدت السيارة)
وقالولى لما تجى تسلم العربيه ادفع الفلوس عاادى ومفيش مشكلة

فى حالة سرقه العربيه او عمل حادثه ( اقصى غرامة ممكن تدفعها 300 دولار بس). العربيه تامين شامل ، بس طبعا لازم محضر البوليس
مافيش شيكات بتكتبها على نفسك
التسلم والتسليم فى مطار القاهرة
معاملة الموظفين ممتازة وناس محترمين ومحترفين

انصح الناس اللى زيا (ملهمش فى وجع الدماغ ) وعاوز ياجر عربيه كويسه وبسعر كويس مع ناس محترمة يتعامل معاهم

انا كلمتهم على عمل خصم لاعضاء نايل موتورز ، وهما رحبوا جدا
واخدت رقم استاذ محمود واستاذ عدنان ودول الاتنين المسئولين هناك
لو ادراة نايل موتورز المحترمة تحب تتفق معاهم ( وده هيبقى اتفاق جامد هيخدم اعضاء كتير)
فانا معايا ارقام تليفوناتهم وهم وعودينى انهم هيدونا خصم كويس