أخوكم: م/ علي مجدي
دورت كتير عن تقرير للبيكانتو 2012 قبل ما أشتريها بس مش لقيت
فا جمعت معلومات عنها من النت وقررت أشتريها
اشتريتها وقلت أفيدكم بكل شيء عنها
أولا جيت أشتري توكيل بالضمان لاقيتها بالحجز ومفيش منها معارض حتى الكلام
دا من شهر اتنين اللي فات جبت الخليجي
الفئة اللي معايا هاف أوبشنز مش عارف اللي أقل منها إيه
بس فيه فئتين كمان أعلى منها
أولا: مواصفات الفئة بتاعتي
1248 سي سي بخلاف الموديل السابق 1100 فقط
87 حصان فقط
خزان وقود 35 لتر كاملاً بالإحتياطي
اكصدامات ومرايات بلون السيارة
إشارات بالمرايات
مرايات كهرباء + ضم + بلوتوث
طارة مالتي فانكشن
عدادات عادية مش أوبتيترون
مداخل يو إس بي و إيه يو إكس و آي فون والكابل الخاص بهم
عجلة قيادة وذراع الفتيس مكسوة بالجلد الطبيعي ... أسود
فرش الكراسي جينز قماش بس خامته رديئة
كامل فرش الأبواب والتابلوه الأمامي من خامات بلاستيكية
تكييف عادي
راديو سي دي أصلي مدمج في التابلوه
شنكار سحب أمامي
مقابض أبواب خارجية مغطاه فقط بطبقة من النيكل كروم وليست نيكل بالكامل
مقابض أبواب داخلية سيلفر وليست بلاستيك أسود مثل بعض الفئات الأقل
أوتوماتيك 4 سرعات
عداد سرعات 200 كم/س
مفيش أمبير حرارة بس بيقولوا فيه لمبة تحذيرية
درج تخزين في التابلوه الأمامي ودرج إضافي أسفل المقعد جوار السائق
كل الفئات مش فيها كونسول تسند عليه حتى إيدك
إمكانية طي المقاعد الخلفية لزيادة مساحة التحميل
إيريال سقف خلفي
مصابيح أمامية وخلفية عادية وليست ليدات
جهاز إنذار لمنع فتح أي باب أو الشنطة أو الكبوت بطريقة غير شرعية فقط
يتم تنشيطة بعد 30 ثانية من الإغلاق
عتب جانبي مخلي شكلها حلو أوي
جنوط سبور 14 شكلها جميل أوي
حساسات إضائة أوتوماتيكية مع خاصية follow me home التي
تترك لك النور الواطي مضاءاً لمدة 30 ثانية حتى بعد غلق السيارة
مقاس كاوتش 14/60/165
سبويلر رياضي أعلى الزجاج الخلفي وغير مزود بلمبة ستوب
4 زجاج كهرباء
السعر: 86500
الفئة اللي بعدها بتزيد فوانيس ليدات أمامي وخلفي ....
ومرايات بالشماسات..... فقط
السعر: 87000
أعلى فئة بتزيد في السعر أول وبتزيد كالآتي
فرامل ABS
لمبة ستوب بالإسبويلر
جنوط سبور 15/60/185
فتحة سقف
عدادات أوبتيترون
والفئة دي نادراً ما تلاقيها لأن سعرها 96500
+++ تقييم السيارة +++
الموتور 5/10
التكييف 7/10
الفرملة 6/10
السحب 3/10 (بطة بمعنى الكلمة)
قوة العفشة 3/10 (ضعيفة أوي)
نعومة المطبات 6/10
العزل 6/10
الثبات 3/10
الإرتفاع عن الأرض 7/10
مساحة رؤية أمامية وجانبية 8/10
مساحة رؤية من الزجاج الخلفي 4/10
مساحة الركاب 5/10
حجم صندوق الأمتعة 4/10
راحة الجلوس 8/10 (كراسي مريحة)
مساحة الرأس 5/10
أنوار شبورة 9/10
أنوار عالي وواطي أمامية 7/10
قوة الصاج 5/10
صوت الكاسيت نقاء وحجم الصوت 4/10
.............* مميزات السيارة................*
شكل خارجي أنيق جداً وجذاب
استهلاك بنزين اقتصادي لحد كبير
عدادات واضحة
مساحة خلفية مع رشاش لها
إمكانية إمالة عجلة القيادة لأعلى وأسفل
الباور كهرباء بس لما بتكون العربية واقفة أو سرعتها بطيئة بيكون زي الملبن ف إيدك
بزابيز المساحات الأمامية تبخ رزاز يوزع المياه على كامل الزجاج لتنظيفه على أكمل وجه >>>>>>>>>>>>>>>>>>> مميزاتها محدودة للغاااااااااااااااااااااا ااااية
>>>>>>>>>>>> عيوب السيارة <<<<<<<<<<<<
حدث ولا حرج
شنطة صغيرة أوي أوي لدرجة ان لو انت مركب الجنط الإستبن والتاني عايز تشيله وتروح تلحمه
... مش هتعرف تحطه في الشنطة .... لازم جوا العربية
العدة بتاعة العربية صعبة المنال وكمان مش سهلة كدا في الإستخدام لدرجة انك تكره تغير
الفردة وتضطر تمشي بيها نايمة لحد ما تزودها أو تلحمها
عليك أن تختار حاجة من اتنين ... إما أن توفر مساحة للكراسي الأمامية
أو توفر مساحة للمقاعد الخلفية وذلك لضيق المساحات بالداخل
أداء الفرملة نسبياً مرضي بس متنفعش الشباب نوهاااااائي
المتور تقريباً بتاع توك توك لأن السحب بتاعه أزبل من الزبالة حتى لو عملت كيك داون
تكييف رخم أوي ودايماً تشغله على 4 لأن 3 حتى مش هيرضيك
فرش الكراسي قماش عامل زي الجينز كدا ولو وقع عليه نقطة مية هتبقعه
وتعلم فيه وكمان صعب التنظيف ولو بالكيماويات وأنا جربت
إضاءة الفوانيس الأمامية زي الزفت لدرجة اني ركبتلها كتاوت فرنساوي
ولمبات تريفا ألماني تلجي 100 وات بدل ال 51 اللي بتنزل بيها
بس إضاءة فوانيس الشبورة أكثر من ممتازة
العفشة ضعيفة جداً لدرجة اني غيرت مقص أمامي ومساعد أمامي يسار
ولسة مكنتش كملت 1000 كيلو لمجرد اني كنت ماشي على سرعة 40
وواحد بيعديني من اليمين وحدف عليا فا أنا حدفت شمال عالرصيف
والجنط تلقى الصدمة مع الرصيف مطباتها ناشفة بس مش زي السيراتو
أعتقد السلحفاه أسرع منها
تقفيل الأبواو من الداخل بالكامل بلاستيك وخامات معفنة والتابلوه كله بلاستيك * بلاستيك
ضغطة الكلاكس قوية بغباء جداً لدرجة انك استحالة تضرب كلاكس بصابع واحد ...
لازم تخبطه بمعصم إيدك أو بالبوكس إن لزم الأمر
ثبات العربية يتحدى الصفر
.................................................. ...........................
كل دا كوم وأسعار قطع غيارها كوم تاني
الجنط الحديد 13 يعمل 430
وال سبور 14 زي بتاعي يعمل 1350
وفوانيس أمامي وخلفي ليدات تعمل 11500
دا بالإضافة ل 10% ضريبة المبيعات وكمان قطع الغيار مش متوفرة حتى في التوكيل المحترم
أرجو أن أكون قد أفدتكم
تجربتي للسيارة كانت حقيقية وكاملة وبرغم أني عامل بيها 6500 بس ....... بس أنا مطلع عين أمها معايا .... يعني فهمتها من الألف للياء
.................................................. ....................................
أرجو من مشرف القسم تنسيق الموضوع
المشاركة القادمة هتكون بعد شوية كدا لحد ما أرفع ملف الصور مضغوط على الميديا فاير
وأجيبلكوا الرابط هنا في المشاركة الجاية
برجاء من المشرف تحميل الصور وعرضها في الموضوع ليستفيد الأعضاء
لأني ماسيبتش حتة ف العربية إلا لما صورتها
أخوكم في الله : علي
