الموضوع: الحقووووووني يا شباب .. العربية هتولع

المشاركة الأصلية كتبت بواسطة egy_3assy

نموذج الأعطال

1- موديل السيارة : اكسنت
2- سنة الصنع : 1999
3- الفئة : 1300
4- ناقل الحركة (مانيوال / اوتوماتيك) : مانيوال
5- الكيلومترات المقطوعة : 153000
6- تاريخ أخر صيانة و نوعها : تغيير زيت و تشييك على كهرباء السيارة يوم 27 / 4 / 2012
7- وصف المشكلة أو العطل : غليان الميه الخضراء في القربه و تبخرها في مدة لا تتجاوز 48 ساعه
8- تشخيص العطل (بواسطة الأعضاء) : لا يوجد
9- قطع الغيار المطلوبة و أسعارها : لا يوجد
10- الفترة الزمنية من بدء عرض المشكلة حتي الانتهاء منها : لسه جديدة
11- تقييم صاحب الموضوع للسيارة بعد الأصلاح : لما تتصلح هديها تقييم

هحاول اختصر على قد ما اقدر ومحتاج مساعدة بجد يا جماعة و مش هينفع اسيب الموضوع كدة
اول الشهر اللي فات عملت دورة غسيل لدايرة المية في العربية (اكسنت 99 1300 cc) و جبتلها ميه خضراء وبقت زي الفل..
يوم السبت اللي فات رحت بيها لرحاب من مصر الجديدة مع صحابي ,, وانا على الطريق حسيت العربية مش مظبوطة و بتترجرج كدة ومبتسحبش,, اول ما وصلت و ركنت سمعت صوت كدة فشششششششش في الحوض.. فتحت الكبوت و ببص لقيت مفيش ميه في القربة و خرطوم الفايظ عمال ينفخ في بخار عامل زي القطر بتاع زمان او كنكة الشاي
مبقتش عارف اعمل اية المهم قلت خليها كدة و نخلص الخروجة في الراب و ابقى اشوفها لما تبرد .. وفعلا بعد ساعتين كدة فتحت القربة لقبتها مفيهاش ولا نقطة مية و الردياتير شكل المية ناقصة فيه .. طلعت الجيركن من شنطة العربية و كان فية نصة كدة .. مليت الردياتير و الميه مكفتش ساعتها كان في سواق تاكسي سألتة وقالي العربية سخنت و عشان مفيش مية المروحة مدارتش. .. روحت لميكانيكي هناك في الرحاب بعد ما زودت الميه و حكيتله الحكاية قاللي نستني لما العربية تهدى خالص كمان ساعتين كدة و نفك و نشوف... فقولتلة انا عندي شغل الصبح و الساعه كانت 10ونص كدة فقولتلة لا هاتلي جيركن مية وخلاص .. وزودت مية الردياتير و القربة و خلاص.:b4_033:
روحت بيها تاني يوم الشغل وروحت .. و بعد كدة جيت يوم الاتنين لما روحت البيت من الشغل فتحت الكبوت وببص لقيت الميه بتغلي جوه القربة .. طلعت غيرت هدومي و جري على بتاع الردياتيرات يشوفلي في اية .. قعد يلف في العربية و يحاول يدور على مكان الميه بتنشع منة و سبب غليان الميه قالي لازم نرفع العربية او تجيلي الصبح .. طبعا انا عندي شغل و مينفعش اروحلة الصبح الا يوم الجمعه او السبت و مستحيل طبعا همشي بالعربية وهي كدة .. المهم قولتلو اية الحل دلوقتي قالي روح للميكانيكي بتاعك يراجع على المكنة و الكهربا اللي فيها جايز تكون عالية.. روحت لعم علي (الميكانيكي ) و قالي بعد الكشف ان بلف الغطاء بتاع الردياتير مش مظبوط و لغيتهولك عشان يسمح للمية تيروح وتيجي من القربة للردياتير..
العربية دي اكتر حاجة مفرحاني منها انها مبتسخنش .. لية بيحصل كدة؟؟؟؟
المهم قولتلو عايز اغير البوجيهات و اظبط كهربة و هوا المكنة جبت طقم بوجيهات و ظبطلي الدنيا وزي الفل ...
المفاجئة اني لما روحت الشغل انهاردة الصبح و تعمدت انزل بدري قبل الزحمه عشان اوصل بسرعه و مقفش كتير وانا مش ضامن العربية كدة .. ولما وصلت الشغل (من مصر الجديدة للدقي) في نص ساعه او اقل .. والطريق مفتوح قلت اخد بصة كدة و كانت المفاجئة ان المية برضة بتغلي جوة القربة... والغريب ان امبير الحرارة مش بيعلى عن الطبيعي (في التلت الاول) :i_angr1[1]:
وجت في دماغي كلمة عم على " العربية كدة زي الفل ومش هتعمل حاجة تاني بس لاقدر الله لو حصلت تبقى العربية جايبة جوان.:copy of rfds:
تفتكرو اية الحل واية المشكلة يا رجالة .. محتاج المشورة من اهل الخبرة لو سمحتو.

الاخ المحترم
ارجو ترتيب خطوات الكشف علي النحو التالي
1- عمل كبس لدوره المياه و مراجعه اي تسريب و راجع علي غطاء الرداتير و كوليهات و كوعه المياه
2- اكشف علي المراوح شفها شغاله ولا لاء
3- اعمل اختبار جوان وش سلندر و علي فكره مش لازم العربيه تتطحن لو فيها جوان الطحينه بتبقا اخر مرحله من الجوان وو تقبل تحياتي