الموضوع: عادات غريبة اثناء القيادة....

المشاركة الأصلية كتبت بواسطة memo_hefnawy

عادات غربية مستفزه :
-----

* واحد ماشى ما بين حارتين ولا هو مسك الحارة دى ولا دى ولا مدى لحد مكان يعدوا منه ولما تكلكسله يزعل أوى كأنك عايز تعدى من جوة أوضت النوم بتاعت ساعته

* واحد تانى ماشى و راك و إيده على الكلاكس و الطريق أمامك مقفول و هو شايف ده بقه بيكون يومه مطين و لما الطريق بيفتح مش بعديه و ممكن أقف كمان لحد ما يبطل و يحترم نفسه (بس ده طبعا بعد مشاورة ليه مره إن هاطير من فوق إللى قدامى ولا عربيتى بالأجنحة؟) بعدها لو مش بطل يستاهل إللى يجراله

* واحد تالت فاكر نفسه فتك و الطريق ماشى بالعافيه على الكوبرى أوى فى أى حته و صاحبنا ده كل ما يلمح خرم إبره عايز يتزنق فيه و يدخل قدامك بالدراع ده برده مش بدخله لأن الطريق و السواقه ليهم أصول عشان مش نقفل الطريق و فى الآخر نتفرج على بعض

* واحد تانى يجى من وراك بليل وضارب نور عالى أو فى وشك ترعشله تطفى نورك و تشاورله لو وراك مفيش فايده أنا وقفت مرتين مره واحد ورايا على الزراعى مرسيدس وقفت لأنى شاورتله مرتين و مفيش فايدة و نوره ضارب لفوق أول ما وقفت صاحبنا راح طافى النور و عرف إن الله حق واحد تانى كنت فى شارع جانبى ورا عباس العقاد واقف أمام بيت و أنا جاى فى وشه و ده ضارب العالى رعشت و قلبت و طفيت و كلكست و صاحبنا عامل عبيط و أنا بقه فى الحاجات دى بكون أرخم ما يكون مع الناس إللى مفيش عندها دم دى أبدا وقفت وش فى وش وضرتله عالى لقيت البيه خارج من شياكه يقولى فى إيه !!
قولتله أنا إللى فى إيه ؟ إنت ضارب العالى ليه ؟ طبعا عمل عبيط ومردش بجد بكون مش فاهم الناس دى عندها عقل فعلا ؟ ولا بيفكروا من أماكن تانية ؟ ومن ده كثير

* واحد تانى ماشى فى اليمين و فجأة و إنت بتعدى من شماله يحدف عليك !!! عشان إللى قدامه وقف أو هدى و دى بتتكرر كثير أوى و بتعمل حوادث
ده بزعق معاه وش و تخيلوا الردود ممكن تكون إيه ؟؟
إللى يقولك إللى قدامى وقف أعمل إيه أخبطه ؟ -- لأ يا روح ماما إخبطنى أنا - ما تقف إنت كمان ولا تخبطنى أنا وهو لأ - تخيل الرد بعد ردى ؟ يعنى أخبطه ؟ ده متخلف بمشى و أسيبه لأن مهما حاولت تفهمه هو حمار
واحد تانى يرد بآسف مشوفتكش بقوله حصل خير و خلى بالك من مراياتك بعد كده
لكن الردود الغبية بتخلى الواحد عايز ينزل يولع فيه

* مره سواق تاكسى أنا راجع من شغلى و فى طريق النصر بعد الحرب فى المهندسين و العبور من على أكتوبر و التحدى من أول طريق النصر فى الزحمه بعد عباس العقاد أخيرا هاوصل بيتنا و خلصت من الزحمه يجى سواق تاكسى يقف فجأه قدامى ينزل من غير ولا إحم ولا دستور قولت ماشى الصبر جميل نزل الست و ما أدراك واحده ست بتنزل و بتلم حاجاتها كأنها إتفاجأت إن هنا مكان النزول -الصبر من غير ولا كلاكس ولا غيره (مش بحب أستخدمه إلا فى الضرورة) - مشى وقف تانى أمام القسم يركب و أنا شمالى واقف الحارة إللى إحنا فيها هى السالكة و البيه موقفها صبرت عليه تانى قولت سيبه ياكل عيش رغم إنه غبى ومش بياخد جمب - مشى تانى و عند مدخل مكرم عبيد الميكروباصات قافلة اليمين و أنا عارف و البيه داخال معايا من الشمال و فجأة نمله شاورتله ضرب فرامل فى وسط الشارع عشان يشوفها رايحه فين أنا هنا بقه ...للصـــــبر حدود خلاص جبت آخرى أضرب كلاكس ....................... النرفزة التانية كنت راكب يومها 131 قبل ما أجيب الويرا إكتشفت إن الكلاكس مش شغال ....... بقيت هاتجنن أكثر أديله نوور ولا أحرق بنزين و ده ولا هنا أنا طبعا لما لقيت الكلاكس كده شيط أكثر و قمت راجع مريح ورا و عادل مرتين و زانق من حته بين ميكروباص بيتحرك و بين الحمار و هاتك يا زعيق و الحمار يقول إيه ؟؟؟؟؟؟؟؟؟؟ تخيلوا ؟؟؟؟؟؟ يقولى ما الناس كلها بتقف و هو قال الكلمة دى و بجد كنت خلاص هانزل أضربه ...قولتله و لو الناس بقر تبقى ثور زيهم ماتقف يا حمار على جمب ولا إشتريت الطريق و مشيت و بجد و أنا على أخرى من غباء ولا مبالاة الناس

* أكثر ما يغيظ هو الغباء و الإستغباء و اللامبالاة :arrow:

السلام عليكم

بصراحة يا باشا إنت جيت على الجرح

كل اللى قلته دا أنا بعانى و قرفان منه .

للأسف يا باشا دى عادات و تقاليد الشعب المصرى فى السواقة و كل دا من الميكروباصات منهم لله علموا الشعب التناحة فى السواقة

تخيل يا باشا فى الخليج بيقولوا علينا فى السواقة أيه ؟

بيقواوا أن المصرى دا عايز يركب العربية و يدوس بنزين و خلاص مايعرفش حاجة تانية فيها (فاكر نفسه راكب الحمار عنده فى البلد)

المشاركة الأصلية كتبت بواسطة memo_hefnawy

يا عم حسام الإلتزام حلو و فى نفس الوقت محدش طالبك إنك تكون ذى بتوع الميكروباصات !!!!!!!

أنا مثلا ملتزم جدا و مش بحب أمشى مخالف ولو 50 متر ولو عملتها أحس إنى مخنوق من نفسى لأن الصح صح ولا يجزأ

بس فى الوقت نفسه مش معنى إنك ملتزم إنك يتزنق عليك و يتاخد مكانك أو أو لأ خالص فى فرق بين الإلتزام و الإستسلام

إلتزم بس مش تسيب حد يبلطج عليك أنا لو واحد زنق عليا سهوا و مش دارى أو قاصد بلطجة بقرص و أنا بحدف عليه سنه صغيرة تلاقيه لو نايم صحى و لو مبلطج يعرف إن على نفسه لكن مش بمشى أزنق على حد ولا أضايق حد بس مش أسيب حد يبلطج عليا

فيه فرق بين إنك تسيب حقك و إنك تاخد حقك و زيادة و إنك تاخد حقك و بس :arrow:

كلامك صحيح 100% ، الإلتزام حلو طبعا لكن بدون ما حد يبلطج عليك ، ربنا يرحمنا من سلوكيات سواقين التاكسى والميكروباص.