عادات غريبة اثناء القيادة....

**OsKaR** · 19-06-2007 02:14 PM

طيب اسمعوا الحكايه ديه و قولوا رأيكم فيها ايه ........
العبد لله واقف في يوم حر في مدينه 6 اكتوبر مستني تك تك ييجي عشان يوصلني من من السوق الى مساكن الشباب - احفظوا المشوار كويس عشان هنستفيد منه بعد كده - و المشوار ده معروف ان هو بجنيه لأنه لا يتعدى 1 كيلو
المهم لما جه التكتك دار نص الحوار التالي :-
انا : فاضي يا أسطى
السواق :تحت امرك يا بيه
انا : مساكن الشباب (لاحظ اني راكب من السوق)
السواق : اتفضل يا بيه

( و بعد ما ركبت دار نص الحوار ده )

السواق : و الله الواحد زهق من الشغلانه ديه و عايز ابيع التكتك و اسنريح :!:
انا : ليه بس يا اسطى ؟ ان الله مع الصابرين استحمل عشان اكل عيشك
السواق : تصور يا باشا :arrow:
انا : اتصور ايه ؟ :?:
السواق : كان راكب معايا زبون من السوق لمساكن الشباب - لاحظ ان ده نفس المشوار بتاعي - و قال ايه مكنش عايز يدفع غير جنيه -اللي انا كنت ناوي ادفعهوله- يعني هي العربيه ماشيه بهواء ولا بميه :|

(انا طبعا ذهلت من السواق :shock: لأن الجنيه كتر على المشوار و معرفتش اقوله ايه بس ربنا هداني و رديت عليه بالاتي)

انا : معلش يا اسطى اصل زي ما فيه زباين بارده في سواقين معندهاش دم
السواق : ليه كفى الله الشر :?:
انا : تتصور يا اسطى مره كنت راكب مع سواق من السوق لمساكن الشباب و قال ايه عايز ياخد اكتر من جنيه و اتخانقنا و اخر ما شاف الظابط خد الجنيه على الجزمه :win:
-لاحظ ان الحكايه من وحي خيالي بس انا كنت عايز اوصله رساله - :twisted:
طبعا السواق بعد ما سمع الحكايه فضل ساكت لحد ما وصلنا و خد الجنيه من سكات :mrgreen:

ولا عزاء للمتعاملين مع المواصلات...........

**Dr.SherifMansy** · 19-06-2007 02:45 PM

والله يا جماعة كل اللى اتقال بيحصل ، انا عندى مشكلة الإلتزام و ده لأنى اتعلمت السواقة خارج مصر و لكن برغم مرور اكتر من 20 سنة لسه باعانى من السواقة هنا لأنى مش عارق ابقى قليل الذوق فى السواقة ، و احيب اضيف بعض العادات اللى بنشوفها مع اسفى:
* سواق التاكسى اللى عمال يقف وهو قدامك كل 1/4 متر علشان يلاقى زبون يوافق مزاج سعادته فى التوصيل و لما تطلع منه و تقف علشان واحدة معاها عيال بتعدى الشارع يدنه يضرب كلاكسات و يشوح بايديه و كان وقفتك دى ضيعت منه زبون العصر و الأوان اللى كان هايوكله الشهد

* السائق اللى يمينه فاضى و يفضل يحدف عليك شمال لحد ما توسعله او يخبط فيك و بعد كده يكمل تانى فى اليمين من غير ما تفهم هو قعد يحدف كده ليه؟ :roll:
* السواق الفتك الفهلوى اللى فاهم انه هو الذكى الوحيد فى الشارع و كل الباقى اغبياء ، و ييجى عند ملف زحمة و بدل ما ياخد دوره ورا العربيات اللى بتلف يروح طالع قدام و من عند الملف يكسر على الموجودين كلهم قال ايه علشان يلف قبلهم و طبعا كل الملف بيقف بالإضافة للحارة اللى قفلها من الشارع (الطوالى) ، و طبعا مستغرب الكل متضايق ليه من واحد اذكى منهم ، اصل دى هبة من الله بتحسدوه عليها ليه يا ناس يا وحشة

!!!
* بلاش نظلم اللى بيدلدل ايده من الشباك سواء تاكسجى او سواق ملاكى ، الحكاية و ما فيها ان ده سواق حريص عارف اهمية ضغط الهواء فى اطارات العربية فا بيمد ايده علشان كل شوية يحسس يشوف الكاوتش منفوخ كويس ولا ريح حبتين :lol: !!!
* مرة على كوبرى اكتوبر كان امامى شيروكى و لما جيت اعدى منها قعدت تعوم يمين و شمال زى ما تكون بتفرمل على ارض عليها زيت ، و لكن الشيروكى مش بتفرمل ، دى ماشية ولكن بتعوم بشكل فظيع ، ربنا ستر و فرملت و قعدت اضرب نور و لكن مافيش فايدة فوقفت بايدى على الكلاكس ، و هنا اتعدلت الشيروكى و زجاج السائق اتفتح فطلعت جنبها بحذر لقيت واحدة فى قمة الثورة بتشوح لى بايدها و فيها الموبايل و بتقول " ايه الإزعاج ده ... مش عارفة اطلب نمرة الموبايل من الكلاكس بتاعك" :shock: !!!! بصراحة لو كنت رديت كان هايبقى رد فيه تجريح فمشيت و انا دمى محروق.
*فيه ناس مشاة دلوقت بتعدى الشارع بالطول و لما تزمر ممكن يمد او يجرى لكن مش بيوسع الطريق لك
*هواية تعدية الشارع من مطالع و منازل الكبارى ، و انت اللى راكب عربية يبقى انت اللى تاخد بالك و تتصرف ، انا شخصيا بافكر فى تركيب هلب زى السفن علشان لو حصل امامى كدة ارميه و اكلبش العربية فى الأرض فى الحال حرصا على سلامة العابرين للطريق
*اكيد كلكم اتعرضتم للموقف ده: جرب ابتدى اركن او لف العربية فى شارع ضيق و حتلاقى الناس اللى ماشية لازم تعدى من المكان اللى العربية رايحة فيه و كأنهم فى سباق مين يعدى الأول ، يعنى لو بترجع بضهرك الكل يجرى من وراء العربية و تلاقى قدام البوز فاضى ، تقول خلاص اعدل الوش دلوقتى ، فتلاقى الآية انعكست و الكل بيجرى علشان يعدى من قدام العربية و يسيبوا الضهر فاضى ، طبعا ده بيحصل مع الخبطة الرقيقة الظريفة بكف الأيد على الكبود او الشنطة اللى تسمع بلد ، ولا ادرى هلى الخبطة دى للتنبيه ولا ده سيم فى السباق يقول به انى عديت قبل اللوح السواق ما يقدر يظبط عربيته !!!
اسف للإطالة و لكن الموضوع فعلا شيق و تحياتى

**kimo** · 19-06-2007 03:45 PM

السلام عليكم
حكاية ماساوية
كنت ماشى على طريق اسكندرية الزراعى اليوم انا وزوجتى بجانبى وراينا عربية تعدينى بسرعة حوالى 110كم اوبل والسائق
مطلع يده من الشباك وسندها على الباب قلت لزوجتى انظرى الى التخلف ده مش ممكن يحصل فى اروبا ده واحد مش خايف
على نفسة المفروض يخاف على ارواح الناس اللى حوله لم يمر 3 دقائق الا وشاهدنا السيارة مدمرة على الرصيف 4 عربيات معاه
والناس اللى طالعة من السيارات لا حول لهم ولا قوة بصراحة تمنيت ان انزل من السيارة واطمئن ان هذا العابث مات وان لم يمت لامتة انا
والله يسترها معنا ومعاكو ويحفظنا من هؤلاء

**Santino** · 19-06-2007 05:57 PM

أكتر حاجة بتخنقني دلوقتي هي الإكصدامات العمولة اللي الميكروباصات و التاكسيات بيعملوها - بتبقي صاج جامد أوي متفصل علي مقاس العربية و بيبقي بارز عن العربية في الجنب و زواياه حادة جداً و حامية و غالباً بيبقي مدهون إسود - أكيد طبعاً كلنا شوفنا الإكصدامات دي , بتبقي الخبطة منها أو حتي ترييحه علي السمكري بسرعة . حاجة أذي في أذي . اللي يغيظك بقي إن العربيات اللي بيركبوا فيها الصاج ده بتبقي ليها إكصدامات بتاعتها بتتباع و متوفره , زي الميكروباصات التويوتا . إيه حجته بقي إنه يجيب الإكصدام الفيبر !!!!!!! أنا رأيي إنه بيجيبه علشان لو واحد ريّح علي عربيته يتأذي ( يعني نظام تخربشني أعورك ) . اللي بيقتلني بقه إن العملية دخلت في العربيات الملاكي , في واحد كنت ح أنتحر منه خلاص , شايل الإكصدام النيكل و مفصل إكصدام شكله وحش جداً علي عربيته و داهنه أسود و عليه أثار جثث الرفارف و البويه بتاعت ضحاياه من العربيات التانيه , المفاجأه إن عربيته .... 128 :shock: :shock: :shock: !!! يعني كل حاجة عربيته متوفرة و نيكل و فيبر , يعني ملوش حجه في اللي عامله ده .

حاجة تانية برضو بتضايقني جداً , اللمبات الزرقا اللي بيسموها ليزر و بيركبوها الميكروباصات و التاكسيات علشان يبان بالليل أنه عربيه أجره , بيركبوا منها كام صف لمبات بيبقي عامل فرح في عربيته و منشنها في عين اللي قدامه أو اللي وره ( نفسي أعرف بيركبوا منها ورا لييييه ؟؟!!! ) اللمبات دي لمّا بتضرب في العين بتزغلل جامد , و كل ما حد يركب معايا بسأله اللمبات دي بتزغلله و للا لأ بيقوللي إنها بتزغلله جامد و بتدايقه أوي . هو مش المفروض المرور يمنع الحاجات دي ؟

**ahmed1981** · 19-06-2007 06:12 PM

هو مش المفروض المرور يمنع الحاجات دي ؟

لا مؤاخذة هو فيه مرور في
مصر؟؟؟؟؟؟؟؟؟؟؟؟؟؟؟؟؟ :?: :?: :?: :?: :?: :?: :?: :!: :!:

**Hossam_Hassan** · 20-06-2007 10:30 AM

[/quote]

لا مؤاخذة هو فيه مرور في

مصر؟؟؟؟؟؟؟؟؟؟؟؟؟؟؟؟؟ :?: :?: :?: :?: :?: :?: :?: :!: :!:[/quote]

أكيد فى مرور و كمان فى منتهى الكفأة و الهمة و النشاط و التنظيم وسهل جدا لو عاوز تتأكد من كلامى أمشى فى شارع فيكى يا مصر هتلاقى موكب V.I.P و تشوف بنفسك كفأة المرور. :x :x :x :x :x :x :x

**mabdo** · 20-06-2007 01:44 PM

بصراحة يا جماعة لازم نحدد يعنى احنا فى اسكندرية فى الحد الادنى من اصول القيادة ، الناس مش ملايكة بس نقدر نقول فى جزء كبير بيبقى عامل بالاصول لكن العربيات اللى ملاكى القاهرة الكبرى بيقبى و لومؤاخذة و بلاش انا مش باجمع بس الاغلبية حتى انى بمجرد ماشوف ملاكى القاهرة اروح بعيد عنه Shocked

معلش مع احترامي.. مسألة ان السواقة في اسكندرية بتختلف وان فيه جزء كبير بيسوق بالأصول وكذا دي مش دقيقة خالص.. حسب مشاهدتي الخاصة يعني.. يكن على الكورنيش الوضع بيختلف عشان الكورنيش معمول -حالياً- بهندسة طرق محترمة نوعاً ما وبيساعدك عى انك تسوق باحترام.. ده سواء كنت سكندري أو غير كده..
داخل البلد بأه وفي أي حتة.. سواقة معتمدة على البلطجة -زي أي حتة في مصر- وزي ما تقول قول.. خصوصاً لو اللي قدامك أو وراك أخد باله من نمر العربية.. انها قاهرة..

العادة الغريبة اللي كنت عايز اقولها مشهورة في الخليج حيث العربيات معظمها فتيس اوتوماتيك.. تلاقي الشباب اللطيف الظريف رافع رجله الشمال ومطلعها من شباك العربية.. أو في القليل النادر تلاقيه راكنها على جنب التابلوه شمال الدريكسيون.. :)

**memoo_1st** · 20-06-2007 04:39 PM

.الشباب الجميل اللي مرجعين المسند والكرسي للاخر و فاكرين ان دي شطاره و يدوب لامسين الدركسيون و الدواسات بطراطيف صوابعهم مش عارف فيها ايه يعني لو قعد مضبوط حتي لو مش علشان ياخد باله من طريقه يبقي علشان يحاف علي استقامه ضهره(الوضع الصحيح للجلوس انك تكون علي شكل زاويه قايمه) بس تقول لمين الكلام دا !!!!!!

هوا انا ليا رأي في ال موضوع دا هوا استحاله حد هيعمل حاجه مش مريحاه علشان يبقى روش ف الي بيعمل كدا دا اكيد اريحلو و كل واحد حر

**memoo_1st** · 20-06-2007 04:51 PM

راكب الحمار ......عندهم حق همه قالو حقيقه وليس بإدعاء للأسف

يعنى لو مش حقيقة كنا زعلنا لكن ده إللى حاصل و روح إتفرج الرخصه هناك بتطلع إزاى و إختبارات إيه و شوف بتطلع هنا إزاى و وسايط و كوسة و فلوس إيه (الرخصة يعنى حياة أرواح)

مابالك بسلوكيات السائق المعدومة فى مصر كلها الناس متبلده + بتتغابى + بتستهبل

على فكره انا مختلف مع حضرتك علشان الناس الي بتسوق في ال خليج خاصتا الشباب حضرتك لما تتفرج عليهم تشوف قمه الاستهتار و عدم الاحساس بالمسؤليه وحضرتك لو عايز تتأكد شوف كميه الحوادث اليي عندهم اكتر من عندنا بكتييييييييييييييييييير مع ان هما هناك الشوارع زي الفل يعني مفيش حاجه اسمها عيب طريق
وبعد كل دا حضرتك تقولي هما بيسوقو احسن مننا او ان احنا مش بنفهم سواقه لا طبعا
وكلامي دا ميمنعش ان احنا عندنا عادات سيئه بس هما اكتر بكتيييييييييييييييير

واخيرا احب اقول لحضرتك ان التقرير الي عملتو السعوديه عن خسائر السيارات في اخر 10 سنين وصلت 10 مليار ريال

-

الموضوع: عادات غريبة اثناء القيادة....

LinkBack

أدوات الموضوع

عرض

-

-

-

-

-

المواضيع المتشابهه

تقطيع فى النوبيرا اثناء القيادة

أخطاء اثناء القيادة للمبتدئين

تفادي الغضب اثناء القيادة

اسوأ المواقف اثناء القيادة

هل انت بتركز اثناء القيادة ؟

الكلمات الدلالية لهذا الموضوع

المفضلات

المفضلات

ضوابط المشاركة