فريق زدني للتنمية البشرية يقدم...

**OlaOsman** · 15-06-2008 09:37 PM

فريق زدني للتنمية البشرية هايبدأو موسم التدريب الصيفي Zedny Summer 2008 و يوم الجمعة اللي جاية و السبت ان شاء الله - 20 و 21 يونية هاتكون المحاضرة الافتتاحية اللي هانعرف فيها تفاصيل البرامج التدريبية للصيف ده.

للي ما يعرفش زدني همه مجموعة من الشباب اللي كانوا زينا بالظبط.. بينتقدوا حال الشباب في البلد و يشتكوا من حاجات كتير زي ضعف الهمم و السلوكيات اللي مش مظبوطة و فقد الشباب للطموح و تحديد الهدف و الإصرار على النجاح.. بس ما فضلوش يشتكوا كتير.. قرروا انهم يعملوا حاجة.. و لما فكروا يقدرو يعملوا ايه لقوا انهم عندهم مهارات شخصية معينة اتعلموها عن طريق دورات تدريبية كانوا بياخدوها في الشركات المتعددة الجنسيات اللي بيشتغلوا فيها.. الدورات دي بآلاف الجنيهات و شافوا ان من الصعب.. بل من المستحيل ان يقدر عليها شباب الجامعة او خريجي الجامعات العاديين.. فاستعانو بالله و قرروا انهم يدوا الكورسات دي بنفسهم بأجر رمزي جددددددددددا و بدأوا في صيف 2004 بفكرة بسيطة جدا انما حماس و إيمان بالله كبيييييييييير جدا :)

زدني دلوقتي ما شاء الله كبر عدد أعضائها بصورة كبيرة و لله الحمد أشرف بإني واحدة من الأعضاء دول.. معظمنا متطوعين بيجمعنا نفس الهدف.. عايزين نعمل حاجة لأهل البلد دي.. عايزين الشباب يبقوا محددين هدفهم و عارفين ازاي يروحوا له.. عارفين قيمة الوقت و عارفين ازاي يستغلوه.. طموحين و عايزين ينجحوا في حياتهم و في نفس الوقت بيتوكلوا على الله و ياخدوا بأسباب النجاح.. عايزين شباب يشرف دينه و بلده و أمته.. عايزين أسر مترابطة و أطفال متأسسين كويس عشان يطلعوا شباب صالحين.

في ال4 سنين اللي فاتوا ربنا قدر شباب فريق زدني انهم يدربوا حوالي 50 ألف متدرب و متدربة داخل و خارج زدني و غير الأرقام كمان الحمد لله أثر زدني بدأ يظهر على شباب مصر.. يمكن أثر طفيف و لا يكاد يرى بالعين المجردة بالنسبة للإحباطات اللي مالية البلد.. انما كفاية لما تلاقي حد بيقول لك انا حياتي اتغيرت من ساعة ما بدأت أحضر في زدني.. او اللي بتقول انا حاسة اني بقيت واحدة تانية من ساعة ما حضرت المحاضرة الفلانية.. طبعا ده غير ظهور بعض الفرق الأخرى للتنمية البشرية اللي بتحذو حذو زدني في التدريب.

مش هاطول عليكوا في الشرح كتير عن زدني.. مع اني فعلا طولت
تعالو بس شرفونا في المحاضرة الافتتاحية كما هو مبين في توقيعي و هاتعرفوا كل حاجة عن الجديد في زدني في صيف 2008. و اللي عايز يستفسر عن أي حاجة رقم الموبايل بتاعهم هو 0114435111 و هيلاقي فريق خدمة العملاء على أتم استعداد للرد على أي استفسار. و الموقع بتاع زدني في اللينك اللي في توقيعي :)

***هذا العرض لنشاطات فريق زدنى تم بالتنسيق مع ادارة المنتدى -الإدارة 4*******

**Chicco** · 16-06-2008 02:47 AM

علا باشا الله ينور عليكي و عليهم ....هو ده الكلام
بدلا من لعن الظلام أوقد شمعة .....عمليا مش شعارات و بس

**OlaOsman** · 16-06-2008 07:47 AM

المشاركة الأصلية كتبت بواسطة Chicco

علا باشا الله ينور عليكي و عليهم ....هو ده الكلام
بدلا من لعن الظلام أوقد شمعة .....عمليا مش شعارات و بس

ربنا يكرمك يا شيكو و يتقبل من الجميع يا رب :)

**Sharky** · 16-06-2008 09:07 AM

شكرا يا علا على المساعدة القيمة

**MTAK** · 16-06-2008 09:25 AM

جزاك الله خيرا اخت علا
وطالما الموضوع فى الاصل تطوع
لى اقتراح بسيط
كما ان مش كل الشباب هاتقدر تاخد كورسات بمبالغ عالية كما ذكرتى
ايضا مش كل الناس تقطن بالقاهرة الكبرى او تستطيع السفر لتأخذ كورسات زدنى
فهل من الممكن بعد انقضاء الكورس يتم نشره على الموقع
كملخص او تفريغ كتابى

**Sharky** · 16-06-2008 10:05 PM

أنا إن شاء الله ححاول أجى يوم السبت بإذن الله

**amr mokhtar** · 16-06-2008 10:41 PM

الحقيقة ربنا يباركلكم فى النشاط الخيرى ده و يتقبل منكم

بس انا فى الإسكندرية و كتير من الأعضاء هنا من الإسكندرية
هل هم ليهم نشاط هنا او عندهم خطط لبدأ اى أنشطة هنا فى الإسكندرية؟؟

**OlaOsman** · 17-06-2008 07:28 AM

المشاركة الأصلية كتبت بواسطة MTAK

جزاك الله خيرا اخت علا
وطالما الموضوع فى الاصل تطوع
لى اقتراح بسيط
كما ان مش كل الشباب هاتقدر تاخد كورسات بمبالغ عالية كما ذكرتى
ايضا مش كل الناس تقطن بالقاهرة الكبرى او تستطيع السفر لتأخذ كورسات زدنى
فهل من الممكن بعد انقضاء الكورس يتم نشره على الموقع
كملخص او تفريغ كتابى

هي فعلا المحاضرات بتتحط على الموقع بعد السيزون ما يخلص، و فريق زدني بيحاولوا يوصلوا لكتير من المحافظات و كان ليهم محاضرات في اسكندرية أكتر من مرة و طنطا و في أماكن تانية مش فاكراها.

جزاك الله خيرا على الاهتمام :)

**OlaOsman** · 17-06-2008 07:30 AM

المشاركة الأصلية كتبت بواسطة sharky

أنا إن شاء الله ححاول أجى يوم السبت بإذن الله

تشرف يا فندم :)

الموضوع: فريق زدني للتنمية البشرية يقدم...

LinkBack

أدوات الموضوع

عرض

-

-

المواضيع المتشابهه

عدم التعامل مع شركة بنت السلطان للتنمية السياحية

ابوالليف يقدم :

---مهم لكل انسان---النفس البشرية--متبعدش--

بيان للتنمية البشرية

الكلمات الدلالية لهذا الموضوع

المفضلات

المفضلات

ضوابط المشاركة