الولاعات ستاندارد في كل العربيات العادية بتطلع 12 فولت
صب الكمبيوتر بياخد من كهربة البيت 220 فولت
حسب النوع والماركة بيبقا جواه محول كهربا ياخد الـ220 ويطلع 15 أو 12 أو 9 فولت ودي بتختلف من ماركة للتانية
لو النوع اللي عندك بياخد 220 ويطلع 12 يبقا هاتستغنا عن المحول ده وتوصل من بعده عادي جدا ويشتغل
لكن أولا وأخيرا الصوت مش هايرضيك ومش هاتلاقيه عامل نفس الأداء اللي كان بيعمله في البيت لأنه مصمم للأماكن المفتوحة وصوته في العربية هايبقا مختلف تماما
كتجربة مبدئية قبل ما تلعب في حاجة ممكن توقف عربيتك في الجراج جنب فيشة كهربا وتجيب مشترك طويل توصل بيه الصب لحد جوة العربية وتسمع صوته وتشوف هايعجبك ولا لأ
لو عجبك الصوت وقررت تخوض التجربة يبقا هاتفك الوحدة الرئيسية بتاعة الصب (اللي فيها دايرة الباور)
هاتلاقي جواها ترانس أو محول كهربائي تقوم موصله بالكهربا وتقيس الخرج بتاعه بالآفوميتر -- وإوعى تتكهرب من الناحية الـ220 لأنها هاتكون مكشوفة قدامك ^_^
لو طلع الخرج 12 فولت هاتروح فاصل الكهربا وتفك الترانس ده من مكانه خالص وتوصل بداله طرفين أرضي وكهربا من العربية
ويستحسن تبعد عن الولاعة لأنها غالبا مش بتتحمل حجات زي كده وبتضرب على طول
البديل الأسهل انك تعمل سلك من البطارية مباشرة على مفتاح واحد تكة للتشغيل والغلق ومبروك عليك
وزيادة في الأمان استخدم سلك 1 مللي وحط عليه فيوز 5 أمبير عشان لا قدر الله لو حصل أي خطأ في الكهربا الفيوز يضرب بدون خساير
ماعتقدش ان دايرة الباور دي هاتبقا أكتر من 60 واط بأي حال من الأحوال عشان كده قلتلك حط فيوز 5 أمبير
انما لو لقيت كل حاجة شغالة تمام بس لما تيجي تعلي الصوت يروح الفيوز ضارب يبقا دايرة الباور أعلى من 60 واط
ساعتها شيل الفيوز الخمسة ده وحط بداله فيوز 10 أمبير هاتبقا الدنيا تمام
المفضلات