الموضوع: حياتي عباره عن كارثه و مش لاقي حل

انا شاب عندي حوالي 25 سنه
و حياتي بالنسبالي عباره عن كارثه مالهاش حل
مش هيكفيني مجلد بحالو اكتب فيه قصه حياتي و مشاكلي لانها كتير جدااااا و مش فاهم في ايه

انا اصلا عضو معاكو من زمان و داخل باكونت تاني
المهم انا حياتي بايظه في كل حاجه من زمان من بيت من كليه من صحاب
انا لسه ماخلصتش كليه لحد دلوقتي ...و مش فاهم اي حاجه في الكليه و في كنت في كليه قبليها و طلع عيني و دكاتره مصتقصدني ولا ايه مش عارف...لدرجه امي صممت تروح تقابل حد منهم

و انا مستوايا الاجتماعي و المادي عالي الحمدلله
بس تقدروا تقولوا من بره هلا هلا و من جوه ما يعلم الله
يعني احنا قاعدين في بيت و عندنا شقق بملايين ..و كلوا مركون ولا ليه اي لازمه
و مصارفنا هو اكل و شرب و صباح الفل
يعني من صغري و انا بحط جنيه فوق الجنيه و اجيب حاجه ليا لدرجه اني ممكن انزل اخرج مع صحابي يروحوا ياكلوا و انا ماكولش علشان اوفر و احوش قرشين ..و هي اصلا خروجه تلاقيها مثلا في العيد...
بس بلبس كويس و معايا عربيه بعد طلوع الروح الحمدلله
و لو جبنا حاجه بجنيه يبقي الحمدلله نعرف نجيب ام 3 جنيه مستريح...ده نظام الصرف من زمان
لدرجه كان فيه صحابي و انا صغير فكرني اني معايا فلوس و بخيل و اني باخد مصروف اكثر منهم و انا مثلا ببقي نص اللي بياخدوا
لأني دايما معود نفسي معايا جنيه يبقي ها عيش بالجنيه مش اكثر..
بس بصراحه وصلت مرحله اني باخد منه فلوس من وراه لأنه كان بيديلي مصروف لحد قريب بتاع عيل في اعدادي يادوب نص المفروض اصرفه
و كنت باخد الفلوس علشان اتاكد فعلا انا مش هتفرق الفلوس ديه معاه...و فعلا ولا كانت بتفرق ولا عمره ما قال صرفنا زياده الشهر ده مثلا

ابويا بعيد عني و عن البيت تماما ...و منعزل عن الدنيا و عايش مع نفسه ولا ليه علاقه بأي حاجه
ولا يعرف الناس عايشه ازاي و بنقعد بالسنين مش بنكلم بعض من كثر المشاكل
مش بيعمل حاجه غير بيتفرج علي التلفزيون طول ما هو صاحي
و بيجيب طلبات البيت علشان هو بس اللي معاه مصروف البيت
هو دلوقتي مش شغال لأنه عدي الستين ..بس هو كده من زمان حتا لو وراه حاجه مش معانا في الدنيا نهائي
و من الشخصيات اللي مصمم انه بيفهم في كل حاجه و يعمل اللي هو عايزه و يبوظ الدنيا...و فعلا مش بيفهم في حاجه غير شغله بس
و بيتعامل معايا علي اني عال و اني نكره و ماليش اي لازمه...و بيلعن اليوم الي خلفني فيه


و مش لاقي اي شغل و نفسي اعمل شغل خاص ليا
و جربت اشتغلت و كلوا طبعا يقولي تدريب من غير فلوس و قعدت شهور و مافيش اي فايده منها خالص..ولا خبره ولا فلوس
و قعدت ادور علي حاجه تجيب مصاريفي مش عارف
و نزلت شغل كان بيجيلي اكتئاب اكثر من اللي عندي...لأنها ولا بتجيب فلوس ولا منظر اوي ولا حتا بتعامل مع اشكال عدله
قولت انزل بالعربيه مشاوير في شركات ..الاقي اللي بشتغل معاهم بيضرب نص الفلوس عليا
غير اني عندي مشكله في رجليا مولود بيها ..مقدرش اقف ولا اقعد كتير ولا ادوس عليها كثير مده طويله
و عربيتي مانيوال
لقيت الموضوع مش هيجيب همه طبعا
و تلاقي يوم ارجع الاقي العربيه بايظ فيها حاجه غريبه جداااااااا بثمن اليوم
فهما كام يوم نزلت الشغلانا ديه ولقيته فاحتني في الفلوس وبهدله عربيه عالفاضي ..
غير بصراحه الاقي صحابي اللي مهندسين و كلاء نيابه و الملاح و انا لسه بتنيل في الكليه و كمان مش شغال
و كل حاجه بايظه و كتير خطبوا و فيه اتجوزوا و خلفوا
و انا لسه مش عارف اصرف علي نفسي

قدمت في كذا توكيل ملابس ...مع انهم بشترطوا انك تقف 8 ساعات و رجليا هتروح في ستين داهيه و قولت اجرب و خلاص
و اترفضت...و سالت في كذا حاجه تانيه بس يقولولي عايزين متخرجين
غير في معرض عربيات..و معرفه و برضوا عمل اهبل
ها يجي واحد يقولي قدم كول سنتر...هقول دي استحاله هعرف اشتغالها..لأني فعلا مش طايق الدنيا و الناس و مش بحب ارد علي التليفونات
فهتنرفز علي عميل و اشتمه من اول يوم و هيطردوني

فجأه عرفت ان ابويا شايلي فلوس من فتره و طبعا ما كنتش مصدق نفسي..و فاكره بيضحك عليا...طلع انه ادا كل واحد من اخواتي البنات برضوا فلوس
قعدت اقنعوا في مصالح بتيجي قدامي كويسه و فيها فلوس كويسه اشغل الفلوس
و هو يقعد يقولي كلام غريب غير مفهوم و يرفض
و ضيع عليا حاجات كان فعلا فيها فلوس و مشيت مع الناس اللي كنت متفق معاها
المهم هو فاكر اني مش هسحب فلوس
و سحبت فلوس بدل ما هو موقف الدنيا في اي مصلحه شغل..بدئت في حاجات و كل شويه عمال البس في الحيط و بتعامل مع ناس زباله
و كل ما اظبط حاجه تانيه و ابدء فيها و فيها فلوس حلوه تلاقيها و قفت بطريقه غريبه او تمشي و يحصل مصيبه و اخسر تاني...لدرجه شاركت واحد في شغل ..و الله سلفتوا فلوس غير فلوس الشغل
و لسه لحد دلوقتي ماجبليش فلوسي.. و نصب عليا...
بس انا بتعامل الحمدلله بوصلات امانه و هجيب فلوسي ان شاء الله
خسران يجي ثلث الفلوس لحد دلوقتي في كذا حاجه

مع اني من الناس لما تيجي تعمل حاجه بقعد افكر مليون مره و اسأل طوب الارض و افهم قبل ما اشتري حاجه او اعمل حاجه..
بس نصيبي بقي...


و انا بطبعتي مش اللي ببعزق في فلوس ...و اقسم بالله ما جبت حتا بجنيه حاجه دلع ليا بيها
غير بس مصاريفي...لدرجه ان العربيه بتشحر فيها حاجات و مش عايز اسحب فلوس علشان مش ناقص مصاريف و بلصم نفسي
كل شويه عمال افكر الفلوس لو ضاعت مش هعرف اجبها تاني
و فعلا هكح تراب اكثر ما انا بكح تراب

غير بقي نيجي للصحاب ما فيش حد مقدرني في اي حاجه ..و مش لاقي صاحب فعلا ..انه بس حتا يبعتلي رساله علي الموبايل يقولي عامل ايه

مع اني بسأل عليهم و محدش بيعبرني...و تقف مع الناس و تبقي جدع وتلاقيهم زباله
و تسلف ناس و انا اصلا خربان خلقه...و يعمل اهبل و ما يكلمنيش كمان
اقسم بالله انا كنت اعرف يجي 10 صحاب يمكن اكثر قطعوا معايا فجأه من غير سبب او يكونوا غلطانين جامد فيا
و انا اللي بحاول اكلمهم تاني و قولهم اللي فات مات و برضوا عاملين عبط

ما فيش حد شايفني في الصوره ذي بقيت صحابه او اي حد..و كأني شفاف
معظم الوقت محدش بيفتكرني غير لما يكون عايز حاجه
انا بحاول مغلطش في حد ولا اضايق حد و الراجل معايا ببقي راجل معاه..
ده انا والله بحاول اشغل صحابي اللي مش شغالين او شغالين شغل اي كلام
و جبت شغل لواحد صاحبي بعد ما كان قاعد يجي سنتين من غير شغل
و زعل مني علشان بهزر معاه علي انه اتخرج و شغال
و قعد ما يكلمنيش و لا يرد علي تليفوناتي لحد ما كلمتوا من نمره غريبه
و كأني بقور عليه علشان شغال...حاجه غريبه
ده غير اللي اكلموا علي شغل ليه و يعاملني معامله زباله و يقفش عليا علي كلام اهبل بسبب موضوع الشغل ده
و مش بيكلمني لحد دلوقتي...و غير اللي يرد كويس و يكبر دماغه و ما يكلمنيش تاني و ما يعبرنيش
كأني انا اللي بشحت منهم
و اللي كنت مكلموا علي شغل ليا ...و قعد يشغل ناس صحابنا و كبرلي


انا من الأخر عندي اكتئاب من و انا عندي يجي 12 سنه
و نفسي اموت من زمان و مش طايق الدنياو لا طايق حاجه ولا طايق حد
و جالي من فتره اكتئاب حاد لدرجه اني مش عارف انام لمدهكذا اسبوع و جالي رعاش و حاجات غريبه
اخدت ادويه لمده سنه ...ادويه بتهمد جبل
و قولت هسافر بره في اي حتا اغور من الدنيا هنا و مش هرجع تاني و فعلا كنت ببدء اني امشي في الموضوع
بس رجعت في كلامي في الاخر....و ياريت غورت من البلد دي و من الناس و من الكليه
اشتغل حتا كناس...
و قريب قعدت يجي 5 ايام متواصل مش باكل نهائي من الاكتئاب و العكننه...بصراحه اكلت صباع كفته و واحد اندومي في اخر يوم و دبوس فرخه
مش بعمل حاجه غير بشرب في سجاير...
هتقولولي وفر السجاير!!! انا ما بقتش اعمل حاجه غير سجاير و بعتبرها بتونسني في قرفي بدل الصحاب
فعلا مش هقدر ابطلها دلوقتي

حاليا انا عايش مع نفسي ...بنزل اقعد علي قهوه لوحدي اشرب في سجاير و قهوه او شاي
انا اصلا طول حياتي حاسس اني فيا حاجه غريبه و غلط...لأن فيه حاجات غريبه في حياتي مش فاهمها



كل شويه اقول ممكن يكون ماسسني جن...و قابت كذا شيخ و قالي ما فيش حاجه
كنت بتمني ان يكون فيه حاجه علشان يطلع و استريح ...يمكن الدنيا تتعدل




كل اللي كتبته ده و الله اقسم بالله ممكن تقولوا عليه عنوان بس ...مش موجز حتا
فيه بلاوي و تفاصيل و قرف كتير ...ذرات التراب لما بتكتر بتعمل جبال
مشاكلي طول حياتي في المدرسه و مشاكل الكليه..و مصايب تانيه
يعني مثلا كنت هتحبس زمان و ادخل الاحداث و انا صغير ..في حاجه ما كنتش غلطتي
انا بقعد اقول اني لو كنت ملحد ولا كافر مش هيحصلي القرف ده

انا حاليا واصل مرحله اني اقعد في البيت و ماروحش في حتا و ما اصرفش جنيه غير السجاير اللي بتونسني ديه
و اضرب الدنيا جزمه قديمه ذي ما هي ضارباني و اريح دماغي لحد ما اشوفلي سفاريه اغور في اي بلوه تانيه

حد عنده حل تاني قبل ما اعمل في نفسي حاجه؟؟؟...
وبلاش الردود اللي فيها ..يا عم كل الناس عندها مشاكل و قرفانه