السلام عليكم ايها الخبراء وحوش الرينو

انا اخوكم عبدالحكيم
ان شاء الله فى خلال شهرين ( ربنا ميجبش حاجة وحشة) ناوى اشترى سيارة مستعملة ودى هتكون اول سيارة لى
انا معجب جدا بالاوربى عامة والرينو ميجان خاصة وكل ما اسال الناس بتخوفنى منها جدا جدا جدا لدرجة لما بجيب سيرتها اللى ادامى بحس انى شتمته والاسباب طبعا قطع الغيار واعادة البيع وقطع الغيار وهكذا
انا محتاج نصيحتكم اشتريها ولا هعانى وبالنسبة للاستخدام اليومى 60 كم الميجان افضل ولا الكليو
واخر سؤال اسعارهم ايه فى المستعمل ( الميزانية 50 الف بسسسسسسس) بس تكون اتوماتيك
ارجو الرد لانى فعلا حيران وياريت لو حد يسيب رقم تلفونه يكون من مالكى هاتين السيارتين
شكرا جزيلا

بص حضرتك هو انا رأيى الشخصى يعنى لو هركب اوروبى هركبه زيرو او كسر زيرو يعنى عداد عامل بالكتير 20000 كيلو
ده طبعا عشان استمتع بالعربية كاوبشنز و موتور و تكييف و متكلفنيش غير الصيانات العادية بتاعتها انما انى اشوف عربية اوروبى مستعملة عاملة كيلوات كتير بعتبرها مغامرة نوعا ما عشان موضوع قطع الغيار و كده و اظن ان المبلغ يجيبلك ميجان 2005
من الاخر الاوروبى زيرو و الكورى و اليابانى استعمال ده رأيى

و هقولك على حاجة تانى للامانة برضه
ميجان 2006 كانت مع واحد قريبى كان جايبها زيرو بصراحة تحفة فعلا قعدت معاه 4 سنين من غير ما تقول بم بس بعدها ابتدت اعطال الميجان الخزعبلية تظهر فيها مش ده مش تعييب فيها المشكلة ان مفيش صنايعى يفهم فيها (الكلام ده كان وقت ما كانت الميجان 2 مفيش منها غير 3 عربيات ف البلد كلها برضه :d ) ف كان بيرفعها لحد التوكيل يعنى سفر 400 كيلو

اقتباس:

---

المشاركة الأصلية كتبت بواسطة midobond

و هقولك على حاجة تانى للامانة برضه
ميجان 2006 كانت مع واحد قريبى كان جايبها زيرو بصراحة تحفة فعلا قعدت معاه 4 سنين من غير ما تقول بم بس بعدها ابتدت اعطال الميجان الخزعبلية تظهر فيها مش ده مش تعييب فيها المشكلة ان مفيش صنايعى يفهم فيها (الكلام ده كان وقت ما كانت الميجان 2 مفيش منها غير 3 عربيات ف البلد كلها برضه :d ) ف كان بيرفعها لحد التوكيل يعنى سفر 400 كيلو

---

الف شكر على اهتمام حضرتك وفى انتظار المزيد من الردود
يا جماعة لا تبخلوا بالنصيحة الفلوس دى شقا 3 سنين مش ورث والله مش عايز اندم

لا شكر على واجب يا فندم انا حاسس بيك اوى على فكرة لانى كنت ف نفس الموقف من 3 سنين بالظبط
والدى استقر الحمدد لله على نوبيرا ووفقه فى عربية كانت زى الفل رغم انى كنت معترض وقتها العربية عاملة اكتر من 100 الف كيلو لما جبناها بس كانت ما شاء الله عليها قعدت معانا سنتين بالظبط مكناش بنغيرلها غير زيت و نحطلها بنزين
المبلغ اللى معاك يجيبلك نوبيرا 2008 نضيفة كمان مستريح اوى خد مميزاتها بقى تسارع جيد الى حد كبير -تكييف محترم جدا جدا جدا - صالون واسع -ثبات كويس جدا -اى صنايعى يشتغل فيها قطع غيار ممكن تلاقيها عند اللبان اصلا من كتر ماهى منتشرة :d
لان السعر ده لو هتجيب بيه ميجان هتبقى ميجان متهانة اوى بصراحة و ربنا يوفقك للى فيه الخير و اتمنى انك تكون فهمت وجهة نظرى و على فكرة انا بعت النوبيرا اصلا عشان محدش يقول انى متحيز و كان على عينى و الله انا بعتها عشان اركب فانتازيا ان شاء الله بس قول يا رب :d