4 سنوات و 65 الف كم مع المازدا .. معلوماتى و تجاربى ان شاء يفيد كل الناس

مازدا 3 2008 خارج المصنع من اليابان 11\2007 .. تم شراءها 8\2008 ..الان 65 الف كم بعد استعمال يومى 7 ايام X س 24 ساعة .. استعمال متوسط مش حرق على طول ولا بططب عليها
الحمد لله مافيش اى اعطال وعمرها ماقالت لا .. ده حتى البطارية الاصلية لسه متغيرش مع انى كشفت عليها من شهرمن باب الاحتياط و الكهربائى قالى لازم تتغير و مع ذلك العربية كل يوم زى الفل نمسك الخشب
ماتم تغييره حتى الان ....
1- زيت الموتور مع الفلتر كل 10 - 12 الف كم
2- فلتر الهواء على 30 الف و جبت فلتر اسبور اللى بيفضل 100 الف و كان ب 400 جنية من عادل وجدى
3- البوجيهات على 45 الف وكانت حالتها لسه جيدة جدا ومحتفظ بيها حتى الان و جبت NKG iridium اللى بتفضل 100 الف كم و سعرهم كان 250 جنية
4- فلتر البنزين فى اخر صيانة على 65 الف و جبت alcon صناعة اتحاد اوربى ب 150 جنيه و الاصلى كان عامل 310
5- تيل امامى على 65 الف و كان لسة ممكن يماشينى 5 الف كم كمان و جبت نوع اسبانى اسمة road معرفش اية ب 240 جنية من محل اسمى يافا لل ford فى ش دمشق لان تيل المازدا هوهو بتاعه الفوكس و بتاعه الفولفو 40 و ده كان برضه مكتوب عاى العلبة
6- تيش الميزان الخلفى لان العربية كان فيها صوت تخبيط من وراء مع المطبات الصغيرة وده كان فى اخر صيانه على 65 الف وجبت نوع بلجيكى مشهور sedim ب 320 جنية للجوز لان الاصلى كانوا بيقولوا ارقام استهبال 900 جنية و جبتوا من محل يافا ford لانة زى بتاعة الفوكس تمام و الاصلى بتاع الفوكس كان عامل 720 جنيه .. دة اشهر حاجة بتبوظ فى المازدا للامانة و بتعمل مجرد صوت

باقى الحاجات فى العربية اصلى ده حتى التكيف ماجيتش جنبه خالص و لا شحنته ولا مرة و مع ذلك اقل كلمة اقولها علية تكيف تلاجة

انطباعى بعد 4 سنوات .. عربية اعتمادية تمام التمام و هو ده اللى انا عايزة .. عربية كل يوم افحتها مشاوير و ماتقولش البم
بالمناسبة استهلاك البنزين 200-220 لجوة البلد سواقه معتدلة - 280 كم للسريع للصفيحة مع تكييف صبح و ليل

الصيانة بعد ال 30 الف كم بعملها عند الميكانيكى عادى جدا

اى استفسار .. انا فى الخدمة مع تحياتى

الميكانيكى بتاع حضرتك فييين ؟؟؟
واية اخبار العفشة مع حضرتك ؟؟؟؟

ربنا يبارك لك فيها ويرزقك خيرها ويكفيك شرها
بسمع ان العربية قريبة قوي من الارض وبتحك في كل مطب ونقرة حتي لو مش راكب فيها الا السواق بس

أتمني تصححلي لو معلوماتي غلط
شكرًا

اقتباس:

---

المشاركة الأصلية كتبت بواسطة omarkhaled55

الميكانيكى بتاع حضرتك فييين ؟؟؟
اسطى احمد فى اول جسر السويس بجانب بنك مصر عند جنينة ابن سندر وهو مشهور هناك
واية اخبار العفشة مع حضرتك ؟؟؟؟
بعد تغيير التيش و تربيط قدام و وراء --> كلة 100 100 زى الزيرو بجد

---

اقتباس:

---

المشاركة الأصلية كتبت بواسطة seifmando

ربنا يبارك لك فيها ويرزقك خيرها ويكفيك شرها
بسمع ان العربية قريبة قوي من الارض وبتحك في كل مطب ونقرة حتي لو مش راكب فيها الا السواق بس

أتمني تصححلي لو معلوماتي غلط
شكرًا

---

فعلا هى قريبة من الارض لكن 90 % من المطبات مش بتحك لو 2 راكبين قدام
و الحاجة الحلوة اللى ميعرفهاش غير ملاك المازدا 3 .. وهى ان مهما بتحك و تسمع اصوات الحك و فى الاخر مافيش اى مشكلة بتحصل .. كل الحك بيجى فى حديدتين صلب ماشين بطول العربية بيحمو العربية من اى مشكلة و عند تجربة 100 حكة و حكة

ماشاء الله نقل تجربه ظريف اوي علشان الواحد يستفيد منها
الميكانيكي ده فاهم و معاه الجهاز بتاع الياباني ولا جهاز يونيفرسال و ماعندش اصلا جهاز
انا اعرف المنطقه دي كويس لاني ساكن عند مستشفي منشية البكري و اعرف فيصل الكهربائي فأقربلي طبعا بدل ماروح مشوار لحد الحرفيين

طب انا عندى العربية بربط عفشة كل 3 اسابيع مثلا
وبعد اسبوعين بسمع صوت دربكة فى العفشة الامامية
دة ممكن يكون من اية ؟؟؟؟؟؟

وهل الميكانكى دة كويس واسعارة اية ؟؟؟
وهو ميكانيكى ولا مركز صيانة ؟؟؟

اقتباس:

---

المشاركة الأصلية كتبت بواسطة walidadel

ماشاء الله نقل تجربه ظريف اوي علشان الواحد يستفيد منها
الميكانيكي ده فاهم و معاه الجهاز بتاع الياباني ولا جهاز يونيفرسال و ماعندش اصلا جهاز
انا اعرف المنطقه دي كويس لاني ساكن عند مستشفي منشية البكري و اعرف فيصل الكهربائي فأقربلي طبعا بدل ماروح مشوار لحد الحرفيين

---

الميكانيكى بيفهم و عندهم خبرة كويسة فى العربيات الجديدة .. بس الحقيقة معرفش اذا كان عنده جهاز الاعطال ولا لا (اعتقد لا و الله اعلم) علشان الحمد لله لم اتعرض لاى مشكلة فى العربية غير الدبدبة فى العفشة الخلفية و قد بحثت كثيرا فى النت عن هذا الموضوع و تم تشخيص المشكلة من قبل ما اروحله و هى تتلخص فى تغيير تيش الميزان الخلفى وفعلا التيش طالع سايب خالص ..
هو فى بنك مصر واخد ناصية جنب فيصل الكهربائى و هو بعد البنك ب 3 عمارات على جسر السويس .. هو رابطلى العفشة بامتياز بس للامانة هو شغلة اكتر فى اللانسر و الكورى بس الحقيقة انا ساكن فى الرحاب و بصلح عندة المازدا و الشاريد 2007 و بيجو 206 ولم اشعر باى كذب او فتى

اقتباس:

---

المشاركة الأصلية كتبت بواسطة omarkhaled55

طب انا عندى العربية بربط عفشة كل 3 اسابيع مثلا
وبعد اسبوعين بسمع صوت دربكة فى العفشة الامامية
دة ممكن يكون من اية ؟؟؟؟؟؟

وهل الميكانكى دة كويس واسعارة اية ؟؟؟
وهو ميكانيكى ولا مركز صيانة ؟؟؟

---

هو ميكانيكى مش مركز صيانة و اسعارة معقولة
فى مرة تغيير البوجيهات و تربيط العفشة و صيالنة على السريع .. شغل ساعة زمن --> 50 جنية
وفى مرة تغيير التيش و تظبيط العفشة و فلتر البنزين و تيل امامى و رجلاش الخلفى شغل من 10 ص الى 3 مساء --> 300 جنية للخمس ساعات ( اعتقد انه طلب كتير المرة دى بس انا ماكسفتوش لان العربية رجعت زى الزيرو )
بالنسبة للدربكة الامامية او الخلفية مع الطرق الغير ممهدة لكن فى الطرق الناعمة مافيش اصوات --> دى مشكلة التيش للميزان الامامى او الميزان الخلفى على حسب الصوت قدام و لا وراء خلى حد يفكه و يشوفه سايب ولا .. بس لازم يتفك الاول و يطلع خالص لانه من برة يبان انه ماسك كويس جدا لكن لما يطاع هيبان ان الحشو اللى جوه سايب .. وقد بحثت كتيرا فى الحتة دى علشان كل ماروح لحد بيص علية يقولى ده 100% و فى الاخر طلع 0%
وقد اختفت كل الاصوات نهائيا الحمد لله

راجع الرابط دة
http://www.moogproblemsolver.com/_pd...K750069_En.pdf

اقتباس:

---

المشاركة الأصلية كتبت بواسطة janjon1978

هو فى بنك مصر واخد ناصية جنب فيصل الكهربائى و هو بعد البنك ب 3 عمارات على جسر السويس .. هو رابطلى العفشة بامتياز بس للامانة هو شغلة اكتر فى اللانسر و الكورى بس الحقيقة انا ساكن فى الرحاب و بصلح عندة المازدا و الشاريد 2007 و بيجو 206 ولم اشعر باى كذب او فتى

---

اه كده انا عرفته ده ميكانيكي واخد محلين كده جنب بعض و جنبه جمعيه .... ربنا يسهل هابقي اروحله كده يبصلي علي العفشه لان فيها دبدبه بسيطه من قدام بس مستفزه اوي

ربنا يباركلك فيها

اخبارها ايه معاك فى الشد يا باشا .. يعنى بتشد مع مين و بتعرف تأدى معاه ؟؟