سبارك 2012 - صدأ خفيف - rpm عالي عند الضغط على الدبرياج
السلام عليكم،
الحمد لله، ربنا كرمني واستلمت العربية امبارح (سبارك الشكل القديم)، فيه كذا ملاحظة كنت عايز أسألكم عليها، جزاكم الله خيراً.
أول حاجة، كان فيه صدأ خفيف عند مسمارين في الموتور. مسؤول المبيعات قال لي إن ده طبيعي نتيجة الشحن والتخزين، فسألته إن كان ممكن أشوف نفس الشيء في عربية تانية، وبالفعل وراني نفس الصدأ في عربية سبارك جديدة تانية، وقال إنه بيروح بالتنر.
هل ده فعلاً طبيعي، وعادي إني أنضفها بالتنر؟
تاني حاجة، فأنا أول مرة أسوق manual حديث (سابق الخبرة 128 و افيو أوتوماتيك)، وفوجئت بالآتي معرفش ده عادي ولا لأ، لما بدوس على الدبرياج عشان أنقل أو أفرمل (وطبعاً مش دايس على البنزين)، سرعة الموتور (ال rpm ) بتعلى، لو كانت مثلاً ألفين توصل لثلاثة.
دورت شوية على النت لاقيت ناس بره بيقولوا إن في بعض العربيات لو إنت على نقلة عالية وسرعتك بطيئة فالعربية بتزود بنزين للموتور عشان ما يوقفش، وبالتالي لما تدوس دبرياج فسرعة الموتور بتزيد جداً. (لو كنت فاهم غلط ياريت حد يصحح المعلومة).
لكن بردو الكلام مش منطبق لحالتي، لأن سرعة العربية بتبقى مناسبة للنقلة (25 على الثاني مثلاً)، فهل فيه عيب في العربية أو أنا بعمل حاجة غلط؟
جزاكم الله خيراً.