الموضوع: محتاج مساعدتكم ضرورى جدااااا عشان ادبسنا فى شراء شاليه

السلام عليكم ورحمة الله وبركاته
ازيكم يا شباب ايه اخبار الانتخابات معاكو
بصو انا امبارح كنت ماشي ولقيت شب بيوزع ورق دعاية لشركة اسمها ((الاماراتية جروب فيوتشر للاتسويق العقارى))
انا اخدت الورقة عادى زى اى ورق بناخدو وبنرميه
بعد ما وصلت البيت لقيت اخويا بيقولى ان الورقة بتتخربش ومكتوب مبروك كسبت جايزة من المجموعة الاولى
مجاش فى بالى قلت كلام فاضي
المهم ماما اتصلت وقلولها لازم تيجو بكره الفرع انا قلت ده كلام فاضي وبعدها لقيتهم متشجعين ونازلين رحت معاهم دخلنا الشركة شربنا شاى وبعدها جيه واحد قعد معانا وشرح الموضوع فى ساعة ونص
طبع الموضوع مغري
ولقيت بابا وافق وانا كنت فى ذهول تام ووقع العقد
نتملك شاليه فى الغردقة فى قرية بس لينا اسبوعين فى السنة بس وممكن ناجر لو حابين
السؤال دلوقتى ايه مصدر الشركة دى وهل هى موثوق فيها
للمعلومية فى ناس كانت معانا وعائلات وفى ناس اشترت ووقعت العقد
ومقر الشرقة فى الدقي شارع مصدق ....
انا طولت عليكم بس عايز حد يطمنى ضرورى

المشاركة الأصلية كتبت بواسطة iwantes350

لا يا جدعان متخوفونيش كده !!!
بصو عموما
المبلغ كان 35 الف وكان فى خصم خاص لمدة يوم 25 الف
المهم انك تدفع 16 الف مقدم وتقسط الباقى على 3 سنين
وفى حاجة اسمها مصاريف صيانة 250 جنيه فى السنة
اسم القرية sea star فى البحر الاحمر
واسم الشركة الاماراتية جروب فيوتشر للتسويق العقارى
عموما احنا قلناله انه زى التايم شير
بس قالولنا انتو ليكم 3 اسابيع فى السنة لمدة اول 3 سنين وبعد كده ليكم اسبوعين بعد مرور اول 3 سنين
المميز فى الموضوع انى ال3 اسابيع اقدر انزلهم فى اى وقت فى السنة ((اللى انا احدده))
وممكن لو مرحتش السنادى يترحلو السنة الجاية
وممكن انى اأجر اسبوع
وممكن انى ابدل من قرية لقرية
وبالنسبة للعقد اللى مضينا عليه هو كان البنود واضحة ومنها انى بعد ما ادفع المقدم ليا اسبوع مجانى انزل القرية واعاين بنفسي المكان والخدمات ولو لقيت اى نقص فى اى حاجة مذكورة ممكن افسخ العقد وبدون شروط جزائية
ده كل اللى اقدر افيدكم بيه
يا ريت يا شباب تساعدونى وتتاكدو من القرية دى
وربنا يخليكم ليا بجد

السلام عليكم ورحمة الله انا مش عايز لا اقلقك ولا اطمنك ولا اقصد الا اني انقلك اللي حصل معايا بالضبط وانت لك الحكم بالنهاية الحكاية دي حصلت معايا من سنتين تقريبا كنت بشتري من سوبرماركت سبنس اللي في ستي ستارز المهم وانا طالع من باب سبنس قالوا لي يومها انت تسحب معنا كوبون وممكن تكسب عربية كانت بيجو باين المهم انا كبرت دماغي وقلت لا عايز هدايا ولا بقتنع فيها وكان معايا واحد صاحبي ومراته بالمناسبة فقام قلي انا هسحب واشوف المهم قلت له بلاش ومش بلاش وحاولوا بنتين وقفين هناك ياخدوني على جنب علشان مأثرش عليه ومع كل النصيحة دي خد الورقة تبعهم فقالوا له مبروك انت كسبت معانا ما اعرف ايه واسحب سحب طلع له صندوق ببسي قالوا له يومها بالحرف الواحد اها انت محظوظ جدا معنا ودي مش هديتك وانت هتدخل معانا السحب على العربية والكلام ده بس لازم تيجي بكرة بقى وتجيب معاك المدام ولاحظ انهم بيدققوا على موضوع العيلة ده وبياخدوا منك 50 جنيه لجدية الحجز علشان تروح تاني يوم وطبعا بيخلوا بنت تكلمك تاني يوم من الصبح تاكد معاك الموعد بشوية دلع والكلام اللي انت فاهمة واللي قالوا لي صاحبي بالتفصيل بعد كده لاني دخلت معاه الحكاية من اولها لنهايتها المهم يا معلم تاني يوم بيقولي رحنا انا والمدام وقعدونا بنفس المكان بستي ستارز بس بقاعة كده واخدينها وفيها ناس كثير وعائلات وقعدوا يوشوا بدماغه ساعتين وكل شوية يوروه صور والكلام ده وكل ما يحاول يخلع يأثروا على مراته المهم صاحبنا اقتنع تمام والكتالوجات وكل حاجة وكان اسمها شركة شبكة العمل الدولية والله اعلم لو كنت فاكر صح ووجيه يوقع العقد وطبعا نفس الاسطوانة انت لازم تسجل النهاردة لان النهاردة بالذات في خصم معرفش كام طب بكرة فقالوا له لا بكرة مفيش اي خصم النهاردة لازم حضرتك تحجز وهنا بدا دوري لقيته بيتصل بيا بيقولي تعالي ستي ستارز حالا بقوله في ايه قلي لما تيجي هقولك وهات معاك فلوس لبكرة المهم قلت عادي ان شاء الله خير رحت لابس ونازل راح مدخلني معاه جوة حاولوا يقنعوني وطبعا لقوا مخي مقفول من الحكاية دي ولما جي يكلمني قلت له بقولك ايه بقصد المندوب يعني " انا مصدع ومروح من الشغل يدوب على البيت على هنا ومش مستعد اسمع كلمة واحدة لا منك ولا من حد وقفشت كده منه مرتحتش سبحان الله لهم" ومع اني كنت عامل بحسابي اني ادي صاحبي 3000 جنيه يومها قلت له ادي 1000 جنيه معايا وانا ماشي مرضتش اديه اكثر علشان انا قناعتي جوايا ان الموضوع نصب المهم اللي عرفته بعد كده بقى ايه بعد اسبوع قابلته واداني فلوسي تاني وقلي انهم حجزوا ليه بالالف جنيه على انه يكمل لهم ايصالات او شيكات ببقية المبلغ على دفعات وانه كمل لهم المبلغ على 25 الف جنيه كنت هتجنن لان الموضوع نصب بنظري وياريته بيتملك ارض الا شاليه بس بيقضي فيه وقت اسبوعين بالسنة وطبعا اقنعوه ان هيتعمله عضوية دولية يقدر يبدل الاسبوع ده باي شاليه برة مصر باي دولة عايزها بس ليه رسوم سنوية مش فاكر كام دولار 100 - 150 باين وانه حتى لو مش محتاج الشاليه بتاعه ممكن ياجروه له لحسابه وياخد الفلوس دي والكلام اللي بالك منه معلش طولت عليك بالكلام بس حبيت اقولك كل اللي حصل المهم هو كان الكلام معاه على شاليه بشرم الشيخ ولظروف مرحش هناك خالص ولا سأل وحاول يسترد الفلوس معرفش ومتابع مع محامي الشركة لغاية النهاردة . فعن نفسي مقدرش اجزم ان كانوا شركة نصب بنصب ولا لا بس في نصب اكيد بالموضوع وهما نفس الاسلوب الغبي ده يعني دايما ومقدرش اقولك نصابين تماما لانه حتى صاحبي مرحش هناك ولا شاف الشاليه من اصله . والموقف الاخير ده من فترة بسيطة قبل الثورة بشهر كده كنت ببنزينة وكانت العربية الاودي مطلعة عيني يومها بمشكلة بنزين مش مزبوط فيها فداخل بنزينة كالتكس على الصحراوي فلقيت مندوب جوة يومها والله استغربت بيكلمني عن لسه التايم شير رحت فاتح فيه وشوية هضربه بالجزمة فلم نفسه وسكت وحل عني يومها انا كنت عصبي بطريقة مش طبيعية يعني وادي الحكاية كلها بين ايديك وبنصحك انك بما انك تدبست خلاص تروح تشوف بنفسك وقريب جدا . وابقى طمنا عليك
اسف على التطويل بس حبيت انقلك كل اللي حصل بامانة