الراجل فى البنزينة خرب واتلف الكواتشه على الآخر ... احذروا
السلام عليكم
امبارح وانا نازل متأخر للشغل اتفأجت ان العجلة اليمين نايمة على الاخر طبعا اتصدمت على الصبح بس مكنش فيه غير ان الواحد يركب تاكسى وفعلا ساعتها الواحد بيحس بقيمة العربية .
المهم بالليل روحت لبتاع كاوتش جمب البيت لقى خرم على الجمب قالى مش هايعملوا غير خابور من بره قلتله لأ يأما من جوه لكن خابور على الجمب ماينفعش قالى لأ هو خابور سيبته ومشيت , روحت بنزينة توتال اللى عند المدخل بتاع دجلة المعادى على الاوتوستراد.
روحت قلت للراجل فيه خرم على الجمب وعايز الحمه من جوه فبص عليها وقالى صح لازم يتعمل من جوه قلت كويس الراجل شكله فاهم
الراجل فك العجله وفى مكان الخرم من جوه جاب جهاز صغير كده بيقعد ياكل ياكل فى الكاوتش من جوه , الراجل قعد يكحت يكحت فقلتله ايه كل ده , قالى يابيه عشان اللحام يلزق صح لازم اشيل اول طبقة للكاوتش من جوه وكمان هالزق طبقتين من اللحام واحده صغيره و واحده كبيره فوقها علشان ماتجيليش تانى
المهم الراجل خلص وبينفخ العجلة الاقى مكان الخرم واللحام طالعه بالونه كبيرة كأن كده العجلة عنده ورم , الراجل استعبط وقالى يا بيه العجله دى واخده مطب , قولتله نعم ؟؟؟ واخده مطب دلوقتى يعنى ما انا جيبهالك سليمه , راح فكها تانى وكحت تانى وحط لحام ثالث فوقهم برضه .
لقيت العجلة لسه عندها ورم ومش مستوية خالص مكان اللحام والراجل معلق ان العجلة واخده مطب جامد , طبعا ابتديت أعلى صوتى راح نادى لواحد قال ايه ده ابو العريف راح قالى يابيه عادى اى عجله تتلحم تعمل كده وبعد كده قالى انت اصلا جاى بالعجلة كده
المهم روحت جبت مدير المحطة وبعدها مدير الصيانه كلمنى وتم الاتفاق ان النهارده بالليل ياما يجبلى كواتشه مستعمله استعمال نظيف نفس حاله الكاوتش بتاعتى "عاملة 40الف" يا اما يجيب واحده جديدة وادفع نصف ثمنها
رأيكوا ايه اجيب واحد جديدة ولا اجيب اتنين جداد احسن , ولا خلينى فى المستعملة بما إنى هابيع العربية قريب وعلى فكرة الاستبن عندى ضايعه
محدش يعرف حد بتاع كاوتش فاهم ومش نصاب فى المعادى احسن انا اتخنقت من الصنايعيه كلهم
انا طولت عليكوا بس قلت اضع الموضوع عشان محدش يحصلوا اللى حصلى وتاخدوا بالكوا من حك الكاوتش
