فضفضة مع اخواتي بشخصي مش بصفتي

السلام يا اهل نايل موتورز
بقالي كتير ما فضفضتش معاكم
عندي مشكلة رخمه شويه وبقالي شويه محرج اتكلم فيها لكن طفح الكيل بجد
انا معايا رقم موبايل واحد ومبعرفش امشي بموبيليين دي خالص
ونفس رقم الموبايل اللي كلكم تعرفوه وعشان بحترم اي حد يتصل بيا لانه ممكن يكون في مشكلة حقيقية بتعامل باهتمام مع كل تليفون يتصل بيا حتى لو ماردتش عليه لسبب اجتماع او غيره برجع اكلمه
دلوقتي بقالي كام شهر تليفونات تلفونات
الو نايل موتور
انا لقيت نمرتكم عالنت
الاقي فلتر هوا ليبرتي 2002 بس عايزاه الاصلي وقولي بكام هابعت السواق ياخد
وطبعا مش سايبالي فرصة ارد
الو نايل موتورز اسلام مشهور انال عايز مفصلات لامبو دورز

الو نايل موتورز عايز اتوبيس رحلات 50 فرد للعين السخنة

الو نايل موتورز الاقي فين كتاوت 128 يكون اصلي

والله والله في تليفونات منهم بتكون الساعة 2 صباحا
وفي تليفونات اكون معايا تليفون تاني ويفضل يتصل يتصل اكتر من 7 مرات
ولو قفلت عليه يتصل تاني وتالت وزعلان اني مردتش عليه
تليفوني محطوط في موضوع مركز السمكرة والدهان عشان لو محدش عرف يوصل لاحمد قدورة مدير الورشة يرجعلي
لكن مش عارف ايه علاقة تليفوني بقطع الغيار
الفكرة اني بكون مهذب لابعد الحدود ولما اقوله طلبك مش عندي يزعل ويقلي حاطط تليفونك عالنت ليه
الطريقة اللي بيقول بيها النت بتدل على انه اشتري كمبيوتر امبارح وخد وصله ومعرفش وصل لرقمي الله يخرب بيت جوجل
والله لو حكيتكلم كمية الاتصالات المستفزة لن تتخيلوها وطبعا ساعات بتيجي وانا في اجتماعات مهمة او وقت محتاج فيه تركيزي
انا بقفل التليفون وانا نايم لكن ده مش مبرر انه يتصل 2 صباحا ومرة تانية كنت في اجازة مع عيالي ونسيته مفتوح واتصل 6:30 صباحا
وعبثا تحاول تفهم الناس ان طلبهم مش عندك مفيش فايدة
النهاردة الصبح اول مافتحت الموبايل ولسه ماوصلتش الشغل

الو نايل موتورز اسلام معايا
اسلام مين النمرة غلط
اسلام مشهور حضرتك قولتلة لاء والله ولسه هاقفل
استني استني
خير حضرتك
انا عندي سيات قرطبة وعايز اغير فيها كل حاجة
موتور جامد وتابلو حديث وبيبان بتفتح لفوق وجنوط واو وكراسي ريكارو وعدة صوت فاجرة بقي بترزع ونور تحت العربية
قولت اخدة على قد عقلة طريقة كلامة صعبة قوي وانا تعمدت اكتب الفاظة
انا معايا فلوس بس قوللي هاتخلصها في قد ايه
قولتلة انا مش بعمل الكلام ده لو سمحت النمرة غلط
يقولي انا معايا عشيين(يقصد عشرين الف)
قولتلة الموتور والعفشة والبودي يا دوب العشرين مش صالون وابواب لامبو وجنوط واو الخ الخ
قاللي ليه ده كتيرر قوي
قولتلة هو انت عارف انت عايز ايه موتور ايه وعفشة ايه وصالون ايه وبعدين بتقول كتير
هو انت بتقولي الكلام ده ليه هو انا قولتلك انا هاعملهملك

دي عينات والله ويوميا مش اقل من 5 تليفونات من دي ومحدش يقولي غير رقمك لانه صعب ومش حل
حد عنده حل

هههههههه جامد جدا الحوار ...


غير رقمك ! وخلي الرقم القديم فى الورشة بس ورقمك الشخصى الجديد معاك برة الورشة

انا اصلا ماشي عامل الموبايل سيانت بكرة التليفونات الكتير

انا عملت سيرش على جوجل برقم تليفونك دلوقت
مفيش غير بعض مواضيع نايل
انت كدة حد موزعه على الناس او الناس فهمت نايل غلط
بس ممكن نعمل شغل
شوف اللى عايز حاجة ونعملها وناخد عمولة
ملاقيش عندك اجهزة كهربائية وملابس وغيارات رجالى

بصراحه مشكله
هقولك حل
غير رقمك و خليه للشغل الحقيقي و الناس القريبه منك و اصحابك و العيله و الحوارات دي
رقمك الجديد يعني استخدامك اللى انت عايزة
و رقمك القديم المعروف دلوقتي اقفله و انت في الشغل و وانت نايم او و انت في اجازة
يعني ساعتين تلاته اربعه كل يوم مفتوح
و شكرا

أمال بأه لو اشتغلت خدمة عملا فى فودافون ولا فى موبينيل أو شركة من شركات الانترنت هتعمل ايه؟

ناس كتير جدا تقول له اكتب كذا على الكيبورد .. يقول لك أصل أنا مبعرفش أكتب انجليزي .. أمال شغال على الانترنت ازاي؟!

غير بأه اللى طلب خدمه و استخدمها و عاوز يرجعها و فلوسه ترجع له .. و يتخانق و يشتم.

عموما الناس دي أهالينا و اخواتنا .. و الحال اللي وصلوا له ده من الفساد اللي كان فى البلد .. اللي خلى الوعي صفر فالميه.

و ربنا يصلح الحال.

اما حد موزع نمرة تليفونك غلط اما حد عاوز يشتغلك و يزهقك

ضريبه النجاح والشهره ياكيكو
استحمل فى سبيل نايل موتورز

دي ضريبه النجاح ... الله ينور

حاسس ان الموضوع ده رسالة موجهة لحد ما

لكن عامة اللي انت فيه ده عادي
انا في مرة دخلت على صفحتك هنا وشوفت الناس اللي بعتالك رسائل وطلباتهم الغريبة
وتوقعت ان ده ممكن يحصل اكتر منه في التليفون

دى ضريبة نجاح و ملهاش حل الا اذا غيرت نمرة التليفون

بس ما تنساش تعمل موضوع اعلانى هنا و تقولنا النمرة الجديده :)

او من الممكن توظف سكرتيره مخصوصه للرد على التليفون (هو انت شويه يا باشا )

ربنا يعينك
================
فكرتنى بواحد صاحبى كان عامل برنامج لمحل ملابس و طبعا هو شغال من البيت

و عمل ان اى فاتورة تتطلع من المحل يكتب اسفل منها بخط صغير تصميم و برمجه فلان

كنوع من الانشار يمكن حد يقصده فى برنامج مشابهه

و لكن عوضا عن ذلك كان يستقبل كل يوم مكالمات بعدد شعر رأسه عن الرغبه فى تغيير فانله بحمالات او سؤال

هاتفتحوا بكره امتى لحد ما راح لصاحب المحل و غير الكود بتاع الحه دى و شال اسمه نوهائى

ربنا يصبرك

يا باشه دى ضريبه النجاح و الشهره
بس هو فى حل يمكن ينفع انك تفعل البريد الصوتى و تشوف كل يوم الرسايل الى جيالك المهم ترد عليه و الى مش مهم كنسلو

شغل ال voice mail و خصص ساعه تسمعه فيها اما تروح و حط فى رسالة ال voice mail ان الناس تسيب رساله و كمان تبعتلك sms و تقول عايزه ايه و دمتم

انا حاسس بالموضوع ده بجد ياكريم بس انت لازم تستحمل شوية او تشيل رقمك من عالنت من المواضيع واللى عايز الرقم يبعتلك رسالة خاصة وخلاص

ده طبيعي جدا في اي شغل او مكان ناجح

اقتباس:

---

المشاركة الأصلية كتبت بواسطة a.saad

انا عملت سيرش على جوجل برقم تليفونك دلوقت
مفيش غير بعض مواضيع نايل
انت كدة حد موزعه على الناس او الناس فهمت نايل غلط
بس ممكن نعمل شغل
شوف اللى عايز حاجة ونعملها وناخد عمولة
ملاقيش عندك اجهزة كهربائية وملابس وغيارات رجالى

---

انا عاوز من أبو استك منه فيه
هههههههه
=====
والله يابوبيدو نفس المشكلة معايا .. لكن مش زيك طبعا
موبايلي مع ناس كتير من خلال الصيدلية
مندوب يتصل عاوز يعمل طلبية .. ومندوب يتصل عاوز فلوس .. وواحد يتصل بيسأل الدوا ده عندي ولا لأ
وواحد يتصل يسأل على جرعة دوااا
وواحد يتصل يقولي إبنه تعبان يجيب له إيه !!!
ومندوب يتصل عاوز يفتح شغل
و
و

علشان كده دايما يغير موبايلي
وللأسف إتضريت أشيل موبايلين .. رقم للناس كلها..ورقم للبيت عندي ورجالة نايل موتورز وبس

هههههههههه
شر البليه ما يضحك
فلتر المكالمات يا باشا علي المتسجلين في جوالك بس
شفت الموضوع بسيط ازاي ههههههههههه

لو محتاج الخط القديم خليه زى ما هو
واشترى خط جديد وشويه شويه هيتنشر شهر بالكتير هيبقى مع الناس الى انت محتاجها
والقديم ياما سيلنت ياما مقفول

المشكلة انك لو عملت سيرش برقم تليفوني مش هي دي المشكلة لان اللي بيدو مش بيدور برقم تليفوني
بيدور بكلمات دلالية تانية ويفتح معاه اي موضوع تاني يلاقي رقم تليفوني
في ناس بتكون في وضع حرجومش بحب اقول الكلام ده على الملاء بس بحاول اوصلكم الفكرة
واحد عامل حادثة عالطريق وقاعد جنب عربيتة لا عارف يحركها ولا يسيبها يتصل ادله على تليفون ونش يشيل بيه عربيتة
واحد من حبايبنا تايه في الحرفيين او عندة مشكلة كبيرة مع واحد من اللي بنتعامل معاهم بحول احل له مشكلتة
لكن مش عشان كتاوت وفلتر هوا
الفكرة اني مش من النوع اللي بينتبه لتليفونين ابدا
انا شايل نوت عشان صع يتنسي في حتة وجربت شيلت موبايلين دايما انسي التاني وانا مش عايز الغي الاصلي الحالي
لانه في كروت نايل موتورز وفي البيزنس كارد بتاع شغلي وفي اماكن كتير جدا برة مصر بيتصلو بيا كل فترة
انا اول حاجة هاشيلة من موضوع مركز السمكرة والدهان
وربنا يستر يسهل في الباقي

احمد يا سعد اللي يتصل عايز فانلات هابقي ابعتة ليك :-)
م.محمد طه حلوة بتاع البروجرامر ده اكيد كرة نفسه حد يعمل كدة
صحيح بتريق علي ايه ما انا من النفس الكاس بشرب :-)

رد على الارقام المسجلة عندك

وشغل البريد الصوتى برسالة " فضلا ارسل sms بطلبك "

وممكن تفعلها اتناء الاجتماعات وبالليل . "وعشين" الف سلامة عليك

معلش ياباشا في ناس بتستسهل و بتحب كلام التليفونات.

بحكم عملي (مشتيريات أجنبية برضو:majd(2): ) كنت بسيب رقمي للعملاء الاجانب و شركات الشحن ومديري يقولي يابني بلاش و انا اقوله عشان الشغل يمشي و بعد ما الناس زهقتني و قرفتني بقى اللي يقولى عايز رقمك اقولة sorry my Company policy مينفعش اديك رقم الموبايل كلمني على Land Line

ملهاش حل غير زى مالناس قالت

انا معايا خطين واحد للعيله واصحابى وواحد للشغل بتاع الشغل بيتفتح من 9 الصبح لحد 12 بالليل بعد كدة بقفله

هوه فين تليفونك يا أستاذ كريم ؟
أنا فى المنتدى بقالى حوالى سنة ونصف أو سنتين مشوفتش رقمك خالص
ياريت تكتبه علشان إتصل بيك أسأل على فلتر هواء للشاهين
ههههههههههههههههه

الحل انك تعمل خاصيه عدم الازعاج وفيها تخصص كل الي انت مسيفو عندك علي الموبيل بس هما الي يتصلو بيك واي رقم خارجى هيرن هيديلو التليفون غير متاح

حط كول تون بصوتك توضح فيها انك مش عايز إزعاج ، أو ن لازم المكالمة تكون مهمة مثلا (وأعتقد الخدمة دي موجودة) وممكن تعمل النغمة تصاعدية بحيث على ما تسمعها يكون هو سمع رسالتك

بصراحة انا مش مقتنع بإني اتصل بحد ألاقية حاطط حاجه زي كده ، بس فعلا ربنا يكون فى عونك

شكرا لمشاركاتكم القيمة
انا تليفوني فيه 2700 وشوية اسم :-)
ده من غير اللي عالفيس بوك والميل بيهم يدخلو علي 3.5 او 4 الالاف
اسوء حاجة عيالي بقو عندهم فوبيا من موبيايلي لما بركب العربية
تصدقو ان في مكالمة فضلت من الماستر ريست لغاية ما وصلت شقتي في العجمي والعيال نامو وقامو والمكالمة شغال حتي فصل اتوماتيك بعد ساعة رجع يكلمني تاني
مراتي بقت تجيب سدادات ودان او تحط هيدفون الموبايل في ودنها
ولما اروح هاصورلكم موبايل من الموبيالات واحد استفزني جدا في الكلام واحاول اقفل معاه بالزوق وده مفيش فايدة
كذا مرة مفيش فايدة محستش غير وانا رازع الموبايل في الحيط نزلة 200 جتة
كان n82 :-)
لدرجة ان الشاشة اتفتت بقت زي الورق الخفيف كدة :-)
غالبا لازم افعل خط جديد وامر لله واخليه برايفت

يا باشا دول حاجه من اتنين مالهمش تالت
شخص ساذج لدرجه انه يتصل بيك عشان بيدور علي حاجه تافهه و معتقد انك هاتجيبهاله من التلاجه عندك و تبعتهاله

او شخص سمج و طبعا بيبقى باين اوي


حل انك تجيب خط تاني اكتر حل معقول
و عموما المكالمات المهمه اما واحد يتصل يستغيث بيك ترد عليها لكن الي بيقولك فلتر ماكنتش تكمل المكالمه
للاسف الاحترام دلوقتي مبقاش ينفع!

نزل برنامج على التليفون و اعمل عليه white list بالارقام اللى تعرفها فقط , و هات رقم جديد حطه هنا و متردش عليه غير و انت بالك رايق و مستعد لمكالمات من هذا القبيل

الله يكون في العون

الحل موجود ان شاء الله .. هو مش مؤثر بنسبة 100% . لكن هيقلل الموضوع بنسبة كبيرة جداً .. بشكل مفاجىء .. ثم يصل الى نسبة 100% خلال شهر على الأكثر

1- حضرتك الاماكن اللي تقدر تتحكم فيها عالنت بوضع ارقام تليفونك .. مثل الموقع هنا او مواقع إعلانات مبوبه أخرى مثلاً

دي سهلة توضح فيها مواعيد الإتصال .. وأسباب الإتصال .. الخ


بالنسبه بقى لرقم تليفونك الموجود على مواقع أخرى وضعها أشخاص أخرين مثلا .. أو تظهر بمحرك البحث جوجل

دي بتندرج تحت بيانات شخصيه .. تقدر تطلب من جوجل حذفها من محرك البحث .. ودة حقك

لان في الغالب الناس دي بتوصل لرقمك عن طريق البحث بجوجل

فلو قدرنا نحذف اي صفحة تشير الى رقم تليفونك من جوجل .. كدة احنا عدينا مشوار كبير

لكن تليفونك هيفضل في مواقع الاعلانات اللي ملكش تحكم فيها .. وهيقدم وينزل لتحت .. لانه مابقاش عليه زوار

لان احنا هنشيله من البحث

اتبع الرابط دة .. لو عايز تنفذ الخطة دي

إزالة محتوى من موقع الويب لشخص آخر - مساعدة أدوات مشرفي المواقع

متهيأ لى فيه حل انك تفعل أوبشن فى الموبايل انه ما يرنش غير المكالمات اللى فى الكونتاكت ليست بتاعتك .. والأرقام الغريبة يتجاهلها.

وتبدأ تنشر رقم تانى للبيزنس وتفعل فيه الرسائل الصوتية علشان اللى عايزك ضرورى لما تكون مش فاضى يسيب رسالة صوتية وتبقى ترد عليه لما تروق.

وحل شيل موبايلين هو حمل موبايل بخطين ، ودلوقتى فيها نوكيات وسامسونجات وإل جيهات حديثة وأندرويد كمان بخطين بعيد عن الصينى وقرفه.

اشكركم جزيلا على المعاونة
وبدات فعلا وضع خطة قريبة المدي لحل المشكلة

اقتباس:

---

المشاركة الأصلية كتبت بواسطة karim_monir

شكرا لمشاركاتكم القيمة
انا تليفوني فيه 2700 وشوية اسم :-)
ده من غير اللي عالفيس بوك والميل بيهم يدخلو علي 3.5 او 4 الالاف
اسوء حاجة عيالي بقو عندهم فوبيا من موبيايلي لما بركب العربية
تصدقو ان في مكالمة فضلت من الماستر ريست لغاية ما وصلت شقتي في العجمي والعيال نامو وقامو والمكالمة شغال حتي فصل اتوماتيك بعد ساعة رجع يكلمني تاني
مراتي بقت تجيب سدادات ودان او تحط هيدفون الموبايل في ودنها
ولما اروح هاصورلكم موبايل من الموبيالات واحد استفزني جدا في الكلام واحاول اقفل معاه بالزوق وده مفيش فايدة
كذا مرة مفيش فايدة محستش غير وانا رازع الموبايل في الحيط نزلة 200 جتة
كان n82 :-)
لدرجة ان الشاشة اتفتت بقت زي الورق الخفيف كدة :-)
غالبا لازم افعل خط جديد وامر لله واخليه برايفت

---

أحسن حل انك تجيب موبيل بخطين - واحد برايفت وواحد للشغل .
و بتاع الشغل ممكن تعمل خاصيه انه ميرنش غير لما يكون حد من 3000 واحد اللي متسجلين عندك