عندى 132 المانى 1600 اشترى نيسان و لا ايه؟؟

**ahmedtalat** · 30-05-2012 11:26 AM

السلام عليكم يا اهل النيسان صنى

عندى مشكله كبيره
انا عندى عربيه 132 موديل عام 1978 و انا بحافظ عليها و حالتها كويسه و بسوقها من سنه 1995 لحد دلوقت و هى ممتازه و الحمد لله

كل لما حد يشوفنى من اصحابى يقوللى ايه ده هو انت لسه ما غيرتش و جبت زيرو؟
يا راجل ايه العربيه القديمه دى ؟

بصراحه بزعل فى نفسى لكن هيه عربيه بنت حلال و حماله اسيه

و الميكانيكى بتاعى بيقوللى متبعهاش يا باشمهندس الجديد كله ورق فى ورق

انا بصراحه مش عارف اعمل ايه و مش عارف اخد قرار الشراء

انا عارف ان انا الوحيد صاحب القرار بس انا متعود على عربيتى فعلا و حاسس ان في بيننا صله كده
يا ترى حد فيكم زى اخد قرار شراء بصعوبه كده و لا انا اخر واحد فى الدنيا دى

على فكره انا بفكر لو بعت اجيب نيسان صنى سوبر صالون

يا ترى عفشتها حلوه و متينه وتستحمل شوارع بلدنا ويا ترى واسعه كده من جوه زى ال132
لأن انا طويل 190 سنتيمتر

الغريب ان فى واحد جارى بيغير العربيه بتاعته كل سنه ؟؟ انا مش عارف ازاى؟؟

افتونى ايها الأصدقاء

**yasserelsayad** · 30-05-2012 12:02 PM

الصنى كويسة بس المشكلة انها ضيقة شوية من جوا
وانت بسم الله ما شاء الله 190 سنتيمتر فا لما هترجع الكرسى هيبقى اكنك لغيت الكنبة اللى ورا محدش هيعرف يقعد معاك .. وكمان هى بتاكل بنزين شوية
غير كدا عربية كويسة وتكييف كويس فى الحر اداءه تمام

**mohammedabdallh** · 30-05-2012 02:22 PM

لو مريحاك كبر دماغك
بس لو قرفاك غير للافضل طبعا
ومتنساش دى بكام ودى بكام ؟؟؟؟؟؟
132 لو غيرتها كلها بكام وشدتها من اول وجديد
ودى فنوسها بكام
احسبها صح
دى بتمون 80 ودى 92

**Dr'AhmZZong** · 30-05-2012 02:36 PM

الصني عربية جميلة و هتستحمل الهبد و الرزع بتاع بلدنا ..

بس حضرتك ما شاء الله 190 سنتي .. يعني العربية هتاخد معاك 3 مرتاحين أو 4 بالكتير قوي .. لأن حضرتك هترجع الكرسي و الدهر فمحدش هيقعد وراك ..

في المجمل عربية جيدا جدا وعلى قد سعرها ..

و برده متنساش ميزة الاوتوماتيك ..

**Abdm** · 30-05-2012 02:42 PM

الخلاصة لو العربية مريحاك ومصارفها معقولة وما فيش مشاكل فى التصليح والصيانة وقطع الغيار يبقى خليها معاك وحافظ عليها أحسن ..... لو عايز تغير علشان الناس يبقى ما لوش لازمة وما تعملش حساب لحد غير نفسك وأنت صاحب القرار لواحدك

مميزات الجديد تكييف ونعومة وقلة أعطال وتعامل مع التوكيل على الآقل خالص فى فترة الضمان فى مواعيد الصيانات الدورية .... بس عد فلوس يا باشا فى ثمنها يعنى هتدفع أكتر من 5 أضعاف ثمن ال 132 ....
وربنا يكرم الجميع واللى معاة ويقدر يغير كل سنة ربنا يرزقة والآرزاق دية بتاعت ربنا ... أهم حاجة بالحلال وربنا يبارك

**A7MED_PHARMA** · 30-05-2012 04:46 PM

عربيتك حسب إحتياجك
.
لو عاوز تغير من باب التغيير .. وعاوز تجيب حاجة تستحمل الهبد والرزع .. وتستحمل طولك((ياراجل هو لسه فيه حد 190 سم دلوقتي )) هههههههههههههههه بسم الله ماشاء الله
فكر في الدفع الرباعي

انا بعشق العربيات القديمةعلى فكرة .. وخصوصا لما تتظبط

**DarkMagician** · 30-05-2012 05:00 PM

الناس دايما مش عاجبها حاجة ودايما بتنتقد والله حتى لو جبت بي ام

انت ما دام مرتاح والعربية مريحاك او مش بتحتاج عربية مكيفة مثلا او مبتمشيش مسافات طويلة عشان موضوع المانوال و راحة الكراسي مثلا

يبقى خليك في عربيتك وبالذات بقى لو قليلة الاعطال

وربنا يكرمك بالخير ان شاء الله