أزمة البنزين ومؤشر البنزين لعربيتى الكورولا 2003 مانيوال

بسم الله الرحمن الرحيم

السلام عليكم ورحمة الله وبركاته

مع وجود أزمة البنزين برفض أروح أمون فى الزحمة وبستنى بألأربع أيام علشان أمون لسببين

أن عربيتى بيكون المؤشر فى النص تقريبا وأن عربيتى 1300 ومابتستهلكش كتير ثانيا مابحبش أمشى مع الموجة وأقول أروح أمون لحسن مش حلاقى بنزين بعد كدة .

واحد قريبى قالى غلط فى العربيات ألأنجيكشن يوصل العداد تحت المنتصف علشان وساخة البنزين . للعلم أنا بحط بنزين 92 وللعلم قريبى لما الؤشر بينقص الربع بيروح يمون على طول وأنا طبعا عكسة يعنى لما يبقى مفيش غير ربع التنك بروح أمون سواء أزمة أو مفيش أية رأى اللى فاهمين !

انا كنت بعمل زي حضرتك بالزبط وعمري ما عانيت من مشكلة من الحكاية دي لان في الاساس حتى لما المؤشر بينور على ان البنزين خلاص قرب ينتهي لسه بيفضل معاك حوالي عشرة لتر او اكثر فعمرك ما هتسحب الرواسب اللي في التنك والله اعلم

أنا كمان شايف كدة ونادر ما كانت اللمبة بتنور ألا يمكن مرة واحدة علشان كنت عايز أجربة لما ينور

المفروض انك ماتستناش لما التنك يفضى عالأخر لأن ده بيكون حمل على طرمبه البنزين اولا
وممكن فعلا تسحب رواسب وتسبب مشكله بالرشاشات ثانيا

بس اعتقد انه لحد الربع كويس جدا وعادي بس ماتسيبهاش دايما لحد الاحتياطي

أنا فعلا بعمل كدة بالظبط عند أول الربع ألأخير ومابستناش اللمبة تنور ألا نادر جدا يمكن مرة واحد فقط

من الافضل طبعا عدم الانتظار لما التنك يفضى حتى لا يتم سحب رواسب

لما اللمبة تنور التانك بيكون فيه من 8 الى 10 لتر لان التانك عندنا عرضي
العربية معايا من الزيرو من 5 سنين معود نفسي افولها 40 لتر ب 74 جنيه وادفع جنيه تبس
وعلى طول بصفر العداد الصغير واعرف مشيت قد ايه ب 40 لتر دول عشان اراقب استهلاك البنزين لو في مشكلة في بوجيهات او غيره
وموضوع قريبك ده مالوش اساس من االصحة
اللي مش صح انك تسيبها كتير بعد ماتنور يعني بعربيتك تمشي 50 كم متر وهي منورة
استهلاك عربيتك 250 في الصفيحة جوة البلد تقريبا يعني ال 5 لتر هايمشوك اكتر من 50 كم جوة البلد وبالتكييف

مش بفول غير أول لمبة البنزين لما تنور و مفيش أي مشاكل الحمد لله... بالنسبة للرواسب لو فعلاً موجودة في البنزين ففلتر البنزين بيحجزها و الفلتر بيتغير في معاده.

بحب الدماغ دى بس بعد التحذيرات بقيت ألتزم فى أول الربع ألأخير

مش انت كده كده هتمون ..... فول العربيه وكل ما يوصل العداد الى ربعه استهلاك ويتبقى ثلاث ارباع التنك مليان فول تانى ومكذا ... يعنى دايما مش هتحتاج الا لملىء ربع التانك فقط وتحافظ على كل شىء بدون مخاطره ........ خاصه ان البنزين عندنا ملىء بالشواثب من الخزانات بتاعه المحطات ده غير الأيام دى ....

لو سبت البنزين علي الربع
1- بتسحب الرواسب الي في التنك واكيد غلط علي الرشاشات
2-غلط علي الطرمبه وبتلاحظ صوت الطرمبع عالي شيل الكنبه
3- السحب بيتقل
الكلام ده في المحركات الحديثه بس ايام 128كانت سعات اللمبه بتنور ومفيش مشكله


منقول من كلام اكثر من ميكانيكي
والافضل علي النص حتي كمان بدل متدفع 70مثلا تدفع35