الموضوع: نصيحه بخصوص الصيانه فى العوض جروب (تجربه شخصيه)

السلام عليكم ورحمة الله وبركاته/
عملت من شهرين تقريبا صيانة الـ 5000 فى العوض جروب-مطلع المقطم اللى على الاتوستراد
استلموا العربيه ورفضوا تماما انى ادخل اشوف الصيانه بنفسى ودى كانت طلباتي:-
1- رجلشة فرامل اليد لإنها مبقتش زى الاول
2- رفع العربيه وفحصها من تحت لانى خدت بيها كذا مطب عالى
3- غسيل الموتور بالفوم
وطبعا معروف ان صيانة الـ 5000 مفهاش الا تربيط العفشه وتغيير الزيت وبما انى غيرت الزيت بره فكان مطلوب منهم تربيط العفشه بس+طلباتى اللى فوق
المهم قعدت كتير فى الـريسيبشن والوقت طول دخلت جوه (بالفهلوه كده) لقيتها واقفه عند الميكانيكى بيعملها فرامل اليد وكانت خلصانه استأذنت منه اجربها الاول وركبتها لقيت الفرامل تقريبا زى ماهيا جبت المهندس قاله رجلش كمان شويه لسه فيها رجلاش !!! يعنى لولا متابعتى كانوا سلموهالى كده
المهم وانا بجرب سمعته بيقول للفنى هيا خلصت كهربا قاله لأ لسه احنا غسلنا الموتور بس.. المهندس قالى طب حضرتك اتفضل فى الريسيبشن.. وقفت بره الورشه وفضلت باصص لقيتهم خرجوها على بره على طول (على غسيل البودى الخارجى) قولت يمكن هما اجراءاتهم كده او يكونوا عملوها الاول وتقريبا اتأكدت ان العربيه متكشفش عليها كهربا ولا اترفعت.. رضيت بالامر الواقع وقولت مش مشكله مفيش شكوى واضحه !
المصيبه الكبيره لما روحت للعفشجى قريب عشان يشيك عليها قالى انت ماربطتش العفشه من ساعه ماجبيتها ولا ايه ؟ دى العفشه فيها رباط بالعبيط وفعلا قعد يربطها ادامى !!
انا مش عارف امال الصيانه فى التوكيل بتعمل ايه ؟!! يعنى لا كهربا ولا رفع ولا تربيط عفشه معملوش تقريبا غير فرامل اليد والغسيل بالفوم وطبعا خدوا عليه 30 جنيه !!!

عشان كده حبيت احذر الناس من الصيانه فى المكان ده عن تجربه شخصيه
والله الموفق

م/ علاء فهمي

المشاركة الأصلية كتبت بواسطة biomedo

مبروك على الصيانه
والف شكر على النصيحه

العفو دى امانه ولازم كل واحد يفيد الناس زى مابيستفاد منهم