الموضوع: محتار فى اختيار سيارة !! ارجو النصيحة

السلام عليكم !!

بصوا يا شباب انا متابع المنتدى من غير ما اشارك بقالى فترة علشان انا لسة معنديش عربية .. بس قريبا ان شاء الله على اخر الشهر دة 6-2012 ناوى اجيب اول عربية ليا .. طبعا انا سوقت عربيات كتير جدا بحكم عملى و كلها ايجار . بس الموضوع بيختلف تماما لما تبقى عربية ناوى تكمل بيها 10 سنين قدام.

انا محتاج منكم نصيحة فى كذا حاجة

اولا عايز رايكم فى الاختيار لو بقارن فى الشريحةالسعرية لوجان و سانديرو و لانوس ( انا مستبعد الفيرنا تماما )

ثانيا عايز اقارن لوجان 2012 الاوتو ب كيا ريو سيدان

عارف انهم مش نفس الشريحة السعرية بس بصرف النظر عن الفلوس.. انا عارف ان لولا اتفاقية اغادير كانت اللوجان هتبقى بنفس سعر الريو فى حدود ال 97 الف.

هقولكم احتياجاتى فى العربية علشان تقدروا تدونى معلومات مفيدة فى المقارنة..

انا عايز عربية مريحة فى السفر ( معدل مرة الى الاسكندرية و مرة الى الصعيد شهريا )

ثبات على الطريق السريع

همشى بيها حوالى من 40 ل 60 كيلو يوميا داخل القاهرة

راحة السائق فى المسافات الطويلة شئ مهم جدا بالنسبالى

خدمة ما بعد البيع و اسعار قطع الغيار.


سؤالين صغيرين فى الاخر بقى

( حد عندة معلومات لو ركبت غاز للعربية و هى زيرو دا تاثيرة اية سواء لوجان او ريو علشان بعد ازمات البنزين المتكررة و ارتفاع سعرة المتوقع قريبا هيبقى الغاز ضرورى خصوصا انى بسافر و بمشى كتير جوة المدينة ) اللى اعرفة ان اجهزة الغاز الجديدة شالت معظم السلبيات اللى كانت بتاثر على الموتور و بقى الغاز بيدى كفائة زى بنزين 95

( هل تركيب الغاز بيخرج العربية من الضمان ؟؟ )


انا اسف للاطالة و غنى عن الذكر انى حطيت الموضوع هنا علشان شوفت قد اية وحوش اللوجان فاهمين و محايدين و بيدوا نصيحة صادقة و فعلا بعد لف طويل فى المنتديات قسم لوجان هنا هو اعلى قسم فى المنتديات العربية كلها.

منتظر ردودكم و لو اشتريت لوجان هبقى اكتيف ممبر معاكم اكيد :)

شكرا



ممنوع الكتابه باللون الاحمر
مشرف عام 1

المشاركة الأصلية كتبت بواسطة كوباية شاى

شكرا على اهتمامك و ردك .. انا استبعدت السانديرو بما ان هى هى اللوجان مع فرق مساحة الشنطة .. بردو مش مايل للانوس لان شوفت كلام كتير ان تقفيلها بقى زفت بعد ما بقت بتتقفل فى مصر .. انا بقارن اكتر دلوقتى بين اللوجان و الريو .. حاسس ان اللوجان شكلها بتستحمل اكتر .. حاسس ان الريو فرفورة كدة :)

الله يبارك فيك

مستنى اراء باقى الاعضاء :)

هههههه حلوه قوي فرفورة دي, عندك حق ولو إن الريو لسه متجربتش كتير فصعب نحكم عليها دلوقت.
أنا عن نفسي لو كانت فلوس الريو جاهزه معايا وكنت متأكد من كفائة الموتور ال ١٤٠٠ سي سي بتاعها مع الأوتوماتيك والتكيف كنت دخلت عليها ومفكرتش, بس ده مش عشان اللوجان وحشة بالعكس اللوجان زي الفل ومرضية جدا معايا بس عشان الريو فيها دلع أكتر وأروش, بس كنت هادفع فرق كبيييير عشان الدلع ده, وفضلت أستنى شوية عشان دي أول عربية زيرو أشتريها فقولت قدام حبة أنقل لحاجة أعلى من اللوجان والريو إن شاء الله.

بصراحة أنا شايف زي مالناس قالولك, من بين إختياراتك اللوجان أنسب إختيار, كمان مش معقول تركب غاز للريو, ومعرفش هل ممكن للوجان ولا لأ, بس أعتقد كان فيه موضوع فى المنتدي بيتكلم عن كده, إعمل بحث وحاول تلاقية.

بالنسبة للسانديرو هي هي اللوجان مع فرق الشكل الخارجي ومساحة الشنطة, بس خد بالك, كان لي صديق بيعمل نفس المقارنة بين اللوجان والسانديرو ورسي على اللوجان بعد مسأل في التوكيل ولقى إن قطع غيار السانديرو المختلفة عن اللوجان (زي الصاج الخارجي والفوانيس مثلا) ممكن يكون فيها نقص ومش متوفرة زي قطع غيار اللوجان, لأن اللوجان أكثر إنتشار وبقالها فترة في السوق عن السانديرو. العضو akerima معاه العربيتين وممكن يأكد لنا المعلومة دي أو ينفيها