الموضوع: ارجوا الافادة بسرعة كيا شوما

المشاركة الأصلية كتبت بواسطة dfdfdf

عربية جيده جداً بالنسبة لعربية كورى ، قطع غيارها بالنسبة للموتور و العفشة و الفتيس هى هى السيفيا يعنى متوفرة جداً جديدة و إستيراد و باسعار معقولة جداً ، هذا بالأضافة إنها سهلة الصيانة ، يعنى أى ميكانيكى معقول ممكن يشتغل فيها ببساطة مش محتاجة عبقرى أو التوكيل ، بالنسبة للثبات فالثبات معقول جداً يعنى أحسن بكتير من عربيات كتير فى فئتها مثل الفيرنا و النوبيرا ، العيب الوحيد هو اكسسوارتها الخارجية خصوصاً الفوانيس الأمامية و الأكصدامات الأمامية و الخلفية ، الأصلية غالية جداً و لكن موجود منها صينى و تايوانى رخيص، أما بالنسبة للفتيس لو بيستخدم بشكل راقى و صيانتة منتظمة يبقى مش حيبقى فيه أى مشاكل مش زى الكثير من العربيات الحديثة اللى الواحد بيسمع عن بلوى فى فتيسها على سبيل المثال لا الحصر الجولف 6 dsg و البيجو 307 و الميجان إلخ ، و فى حالة الأحتياج لموتور و فتيس إستيراد تكلفتة لن تتعدى 4500 جنية باى حال من الأحوال ، و فى منها هاى لاين خليجى بفتحة سقف و abs و جنوط سبور بالأضافة إلى بقية الكماليات ، و من عيوبها الشائعة طلمبة البور يجب التاكد من سلامتها و ممكن تتجاب جديدة اصلية ب 650 جنية ، الخلاصة هى عربية شيك و شبابية و إقتصادية لما تكون حالاتها جيدة و أى إستفسار أخر أنا تحت الأمر ، و كما فى رابطة الوحوش ملاك السيفيا من ثلاث أجزاء حتلقى كل المعلومات اللى ممكن تحتجها ، و أى إستفسار حتلقى ملاك السيفيا و الشوما فى غاية التعاون و الأحترام .

جابلك من أخر الأخر ....... تحياتى ليك