الموضوع: مابقتش طايق البيت

المشاركة الأصلية كتبت بواسطة azmeralda

'طبعا متسيبش البيت وحاول تستحمل زى ما والدتك استحملت عشانك
ومتتحسرش كل واحد بياخد نصيبه وياما ابهات زىه واسوأ منه حاول تبص للى اقل منك مش اعلى منك وياما بيوت فى وضع زى ده بس هم مش بيقولوا زى ما انت مش بتقول
وهو ابتلاء حاول تدور عالدروس اللى ربنا باعتها لك فيه زى انك تعامل مراتك ان شاء الله وولادك ازاى ومتكونش صورة منه
وزى انك تعوض امك
وزى انك تبره برضه وتقاوم نفسك وتعامل ربنا فيه وفى اى حد يظلمك مش تعامل الشخص نفسه
وزى انك تتفوق وتخرج بنفسك وبوالدتك من الوضع ده
وزى ان فكرك ميبقاش زى فكر المتخلفين اللى بيوصلوا المرأة فى مجتمعنا فى الآخر انها تتقبل اوضاع عذاب واهانة لمجرد انها تحتفظ ببرواز ولقب زوجة عشان متتعرضش للبلاوى الى بتتعرض لها المطلقة
وزى انك تتفقه فى الدين اكتر عشان تعرف اللى ليك وعليك فى اى تعامل

وتأكد ان المشكلة هتزيدك صلابة وهتخلى منك انسان احسن متسمحلوش يهزمك او يقتل حاجات حلوة فيك
بالنسبة للحاجات الحلوة دى ماتت خلاص من زمااااان اوى
وعليك بالدعاء ربنا قادر على كل شىء


ومحدش هيقدر يقوللك ليه الناس دى بتعمل كده لأن هى الدنيا كده فيها الحلو والوحش والله اعلم هو اتعرض لأ]ه فى صغره خلاه كده وممكن جدا يكون من وجهة نظره بيقنع نفسه انه عامل اللى عليه ومبيغلطش
وفعلا هو دا اللى بيحصل هو مقتنع انة مش بيغلط خالص الناس كلها مش بتفهم وهو اللى فاهم كل حاجة
واحنا مش بنختار اهلنا بس بنختار احنا ممكن نكون مين فى الدنيا
ركز فى اللى تقدر تعمله اكتر من الحاجات الى ملكش يد فيها

المشاركة الأصلية كتبت بواسطة gasser_beek

مش عارف ابدأ الرد منين والله يا ميدو....

انا حاسس بيك جدا والله واتضايقك اوى لما قريت موضوعك لأنى بحط نفسى مكانك قبل ما أرد....

للأسف برده فى الأول والاخر ده والدك....ومحدش بيختار أبوه وأمه....حاول مره واتنين وتلاته تقرب منه وتتكلم معاه وتحسسه انه ملهوش دور فى حياتكم....وانك محتاجله يبقى قريب منك....حاول تيجى على نفسك شوف مثلا هوا بيحب ايه وتعملهوله.....مثلا بيحب الكوره اتكلم معاه فى الكوره بيحب السياسه اقعد اتكلم معاه فى السياسه...والله يا ميدو الكلام ده مع انه ممكن يبقى بسيط أوى بس ممكن وحده وحده يقربك منه ويبدأ يحس إنه مقصر فى حق....
مش بعرف اعمل كدة هو كويس مش وحش بس اسلوبة بيخليك تبعد عنة وكمان لما بيزعل من حد بيبقى عايز يموتة والله كان بيخاصمنى بالاسبوع ومايكلمنيش علشان مش عارف يقرب منى ويعرف انا عايز اية

حاول على قدر المستطاع كل ما تتخنق تقرب من ربنا أكتروأكتر وتخليك جمب والدتك أكتر - ربنا يارب يباركلك فيها ويديها الصحه وطولة العمر- لأن واضح انها بتحبك أوى ووجودك جمبها بيريحها.....حاول يا ميدو تانى وتالت ورابع ومتزهقش لأن ده فى النهايه أبوك برده مهما عمل فيك ومهما زعلك أبوك برده...

أعرف واحد صاحبى يا ميدو والله كان مخنوق أوى زيك ويمكن اكتر من والده....وساب البيت وسافر السعوديه ومسألش 3 سنين عن والده خالص.....والده اتوفى من 4 شهور تقريبا بقى بيضرب نفسه يا ميدو بالجزمه انه مسألش عنه ولا كلف نفسه يرفع التليفون يطمن عليه برغم كل اللى عمله فيه لأنى زى ما بقولك ده ابوه برده...وصاحبى عايش بقاله 4 شهور فى اكتئاب واحساس بالذنب ان برغم كل اللى ابوه عمله فيه وفى امه خايف ان ابوه يكون اتوفى وهوا غضبان عليه عشان قاطعه ومسالش عنه 3 سنين...

الخلاصه يعنى .... حاول على قد ما تقدر تقرب منه ومتزهقش...وافتكر كل ما يصدك مره أو يزعلك مره...انك بتعمل كده ابتغاءا لمرضاة الله عز وجل لأنه أبوك ومهما عمل ليه حق عليك....

ده ربنا سبحانه وتعالى قال " وإن جاهداك على أن تشرك بى ما ليس لك به علم فلا تطعهما وصاحبهما فى الدنيا معروفا"

ياااااااااااااااااااااااا ه.....يعنى سبحانه وتعالى بيقولك لو صلت بأبوك أنه شغال زن عليك كل شويه زن زن زن زن عشان تكفر بالله عز وجل أوعى تقاطعه أو تزعله وتصاحبهم فى الدنيا بالمعروف.....عرفت برده قيمة رضاء الأب وألأم عند ربنا سبحانه وتعالى.....

إن شاء الله تتحسن الأمور وربنا يباركلك فى والدتك يارب ويسعدها بيك.....ونسئل الله الهداية للسيد الوالد ولنا أجمعين يارب العالمين....

المشاركة الأصلية كتبت بواسطة ghostmido

بص بقى يا معلم.
انا مش عايزك تشيل هم الدنيا كتير وكويس انك سالت الناس هنا كلهم فى منتهى الادب والذوق.
انا عندى سؤال بس يا باسا يمكن اعرف اساعدك انت بتدرس ولا شغال؟
تقبل تحياتى ولو احتجت اى مشورة او مساعدة كلمنى رقمى هتلاقيه فى ملفى الخاص.
بس اوعى تسيب البيت صدقنى كل حاجة ليها حل.
انا شغال من صغرى فى النقاشة ولسة مخلص بكارليوس تجارة السنة دى

المشاركة الأصلية كتبت بواسطة a.saad

بص يا ميدو
انا قصرت مع اهلى كتير
بسبب شغلى
اخترت الشغل على حساب اهلى
فى الاخر
كل اللى بنيته فى الشغل راح
اللى بيبقى ليك هو الناس اللى بتحبك من قلبها
شوف ليه والدك مش سعيد فى البيت
حلل الموقف
هل هو - عذراً فى اللفظ - من النوع اللى مش بيحب يشيل مسئولية
هل هو عدم تفاهم معاكم او مع الوالدة
انظر للموقف بحيادية كأنك شخص من الخارج هتعرف الموقف فيه ايه
وبعد كدة حاول تدخل حد من اللى ليهم تأثير عليه
سواء ادبى كخال والدك او عمه او جدك
او نفسى زى صديق مقرب ليه
ربنا يقوم والدتك بالسلامة

مهم تحاول تقنعة مافيش فايدة ناس كتير كلمتة باسلوب غير مباشر زى خالى مثلا لان خالى اصغر منة فكان بيقولة الكلام دا وهو باردوا ولا بيقتنع باى حاجة
طول عمرة مفرق بينى وبين اخويا ياعنى حتى احنا اتنين مش كتير ياعنى مالناش غير بعض انما هو كان بيدلعة وهو صغير وكنت بقولى كدة غلط كنت بتشتم وانت بتكرهة ومش بتحبة وفى الاخر لما اخويا كبر مطلع عنينا وابويا بقى بيعاملنى انا احسن منة علشان عارف مستقبلى ياعنى حتى اخويا اللى باقيلى خلانا نشيل من بعض انا وهو

المشاركة الأصلية كتبت بواسطة egyptiandiver

ربنا يصبرك ... كل واحد فينا عند مشاكل، إلي ايدو بتوجعو أو ضهرو قافش أو عندو صداع مزمن. لو صحتك كويسة ممكن صحة حد من الاسرة تكون فيها مشكلة... أو الواحد شغلو في مشكلة. لي واحد صاحبي كان يقولي: أنا عندي مكتب إستيراد و في نفس الوقت موظف في بنك ،،، لما التجارة تشد أرباح البنك تريح ... و لما أرباح البنك تزبط التجارة تنام! في الاخر كلو بيتساوى! بالنسبة لوالد حضرتك الافضل مكنش يكون في موجهة، لكن بما انها حصلت يبقى متهيألي الحل المؤقت يكون التجاهل منك ليه و هو كمان هيتجنبك! و ربنا يصلح حالنا و حالك قول آمين و تذكر في النهاية إن الحياه كلها رحلة قصيرة مهما طالت... و الام و الاب مش ممكن يتعوضو مهما يكون في مشاكل - أخوك أحمد سامي

المشاركة الأصلية كتبت بواسطة aminibrahim

لو شغال خد شقه باليجار انت والحاجه شويه
واشترو دماغكو النوعيه بتاعة القهاوي واللي بطلع سر البيت عمره ملا بينعدل

لا على فكرة هو مش للدرجة اللى انت بتتلكم عنها دى

المشاركة الأصلية كتبت بواسطة chicobon

ربنا يعينك شيل الراجل من دماغك و هي تمشي انت واضح بتمسك عليه كل كلمة بيقولها لك هتسيب البيت تروح فين محدش بينفع حد صدقني الدنيا ديف محدش واخد منها حاجة ا

والله لا مش بمسك علية كل كلمة ولا حاجة انا اصلا طول النهار برا البيت ياعنى مش بشوفة كتير اوى ياعنى انا بس صعبان عليا امى اللى طول اليوم فى البيت المشكلة المرة دى وقعت امى اللى ماليش غيرها فى الدنيا ياعنى انا اصلا ماعنديش حاجة تانية اخسرها بعدها وربنا يستر وتقوم بالسلامة

با>ن الله
ربنا يشفيها
وشكرا لحضرتك جدا