الموضوع: تقرير عن فورد فوكاس 2012

ازيك ياباشا واخبار الفوكس ايه

عندى كام سؤال لانى ناوى اشترى الفوكس 2014

ل هتكون النتشة فى الفتيس دى اتحلت وهل الفتيس فى اى مشكال زى ال dsg

تانى حاجة قولى العربية اخبارها اة واة ملاحظاتك عليها دلوقتى

وتحياتى

الفتيس: بصو يارجاله العربيه بتنقل بالضبط علي حسب دوست رجلك علي البنزين والصراحه مينفعشي اي حد يسوقها مره او اتنيت او تلاته ويعرف يحكم علي الفتيس ويقولك بينتش وله لا، المهم الحمد لله العربيه بقالها معايا فتره واقدر اقول الفتيس ممتاز لو عايز تحرق هتلاقيه بينقل علي حوالي ٦.٥، لو نص نص هتلاقيه بينقل علي ٤.٥، لو حضرتك ماشي برحتك خالص هتلاقيه بينقل علي ٣ ار بي ام، اعتقد الحوار ده علشان يوفر في البنزين ، حوار الكنبه ورا ديقه وكده انا شايف الدايت هوه الحل علشان نعرف نقعد كويس ،،،،،،، بهزر بس لو الاوزان عاديه فالكنبه الي ورا كويسه جدا جدا، العربيه فيها كل تجهيزات الامان الاساسيه ،الاوبشنز علي حسب الفئه، التوكيل عندو كل حاجتها ، معاملتهم كويسه جدا جدا، في ضمان سنتين، بص اهم حاجه الناس تفهم هيه معاها كام فلوس بالضبط وبعدين يدور علي العربيه اللي يكون فيها اعلي مواصفات الامان في حدود نفس المبلغ ، اه ولازم يحدد هوه عايز سيدان وله هاتش باك وله كروس اوفر، انا الصراحه بستغرب جدا الناس اللي بتقارن بين التلاته وانا الصراحه كنت واحد منهم بس الحمد لله فوقت بدري وعرفت انا عايز ايه، حوار دي بتسحب جامد والشد ده .... كل ده فاكس فوقوا يابشر احنا في مصر يعني طرق وعادات سواقه وقوانين مرور فاشله ومحدش ينكر....... انا شايف بجد مفيش طريق محترم يستاهل اني امشي فيه بالفورد بتعتي فمابالك بقي لما بشوف حاد جنبي بعربيه تمنها معدي جامد..... طبعا ربنا يباركلو فيها وكل حاجه بس بتصعب عليا العربيه وبحس انه مش مكانها، احنا تجار العربيات بيشتغلونا جامد للاسف لجهلنا احنا عايزين ايه بالضبط، مصر بلد الكوري بس يكون بأسعار زمان علشان اللي بيحصل ده اسمه ........ ، وخليك فاكر ... طرق مش كويسه وعادات سواقه سيئه جدا وقوانين تقريبا مفيش ..... يبقي لازم تحدد النقط السابقه وبعد كده تحدد النوع وبعد كده تسأل الريفيورز....،، عاش ياجامد

المشاركة الأصلية كتبت بواسطة kareem.elaraby

تويوتا ايه بس يا رجل يا طيب بلا وجع بطن
روح شوف الكورولا أم كاسيت شرايط و تابلوه من 5 سنين فاتو و هتحلف ما انت راكبها !

- جيتا, كان فيه مشاكل في الفتيس ده طبعا غير افتكاسه انها تربو و التوكيل قبل البنزين ما يغلي يقولك لازم 95 و بعد ما غلي يقولك عادي 92 بس سوفت وير يتحدث

روح بقي انت اعمل تست درايف أو اتفرج بس :]

شوف حضرتك لو عاوز ركوبه اليومين دول يا فوكس يا سوبارو امبريزا و دول اللي انا رشحتهم لقريبي اللي انا داخل هنا أسأل علي كام حاجه عشانه

موضوع الكورولا دى عندى حق انا للاسف سمعت كلام اصدقائى وقلت اجرب اشوفها من جوه والله مادخلتش رجلى الثانية فى السيارة وخرجت على طول (عندك حق جدا)

تمام ياباشا كلامك بس انا عندى السيارة البديلة الى هتمشى فى الشوارع الى مش كويسة فا انا هجيب الفورد علشان اسافر مسافات طويلة مستريح وهتكون اغلبها فسح يعنى الى حد كبير هكون بعيد عن الطرق العشوائية


بس افهم من كلام حضرتك انى اتوكل على الله فى الفورد وانا مطمن :d

وزى ما قلت لحضرتك هستنى موديل 2014

توكل علي الله ولو عندك اي استفسار انا تحت امرك :)

الاستاذ محمد فوزي و الاستاذ yehiaseg الحقيقه انا متشكر جدا لمجهودكم الرائع و الاستفاضه و التوضيح الهايل عن العربيه و اللي كانت من الاسباب القويه اللي خلتني اقرر اني اشتريها و المفروض اني استلمها من معرض خلال كام يوم لانهم مش لقيين اللون النبيتي اللي عاجبني ... المهم كنت عايز اعرف ايه اهم الحاجات اللي اخد بالي منها و انا باستلم و ابقى شاكر فضلكم

مبروك مقدما ياباشا ولاشكر علي واجب تحت امرك، الكلام اللاحق منقول من قسم نيسان :
1- حاول تستلم العربية بالنهار افضل من الليل عشان تبص على صاج العربية وتطمن انه خالى من اى خرابيش او خبطات

2- انزع عند الاستلام الورق الملزوق على صاج السيارة سواء اللى على الكابوت او على السقف , وذلك للتاكد من بوية السيارة سليمة ولالا , لان الورق ده ممكن يكون مدارى تحت منه فرق لون لقدر الله

3- شيك على الزجاج الكهرباء كله , وتاكد من فتحه وقفله , و تشوف هل فى صوت تزيق او اى مشكلة فى الزجاج لقدر الله

4- جرب الكاسيت وشوفه شغال ولالا , ومتنساش تسال هل بيجى معاه وصلة يو اس بى مثلا وليه ريموت ولالا بردوا , وياريت تكون واخد معاك اسطوانتين من نوعين مختلفين عشان تجرب الاتنين زي سوني وال جي مثلا, عشان محدش يتلكك ويقولك الاسطوانات نوعها وحش , وكمان خلى معاك فلاشة فيها قران مثلا اذا كان ينفع توصلها عليه

5- اسال على الضمان بتاع السيارة وضمان الكاسيت والكتالوج بتاع العربية

6- شيك على الروافع مثل : الولاعة بتاعت العربية وطفاية السجاير وعلى الاريال

7- شيك وبص على المياة بتاعت السيارة من ميه مساحات والقربة والردياتير والبطارية عشان بس لو فى حاجة نقصة مش تمشى على عماك وتزودها فى اقرب مكان

8- اتاكد من وجود الاستبن (الكاوتش الاحتياطى )

9- نبص على شنطة العدة

10- نقعد على الكراسى اللى قدام ونحرك فيها لقدام وكمان لورا عشان نشوف هل فيها اى مشكلة ولالا , وكمان احزمة الامان

11- تشغيل الانوار كلها ونجربها سواء الانوار الداخلية جوة السيارة من نور الصالون والطابلوه ومن بره الفوجات والكشافات الامامية ولمبة الاستوب والفوانيس الخلفية

12- تتاكد من عمل المساحة وتشغل المياه بتاعت المساحة كمان

13- تفتح الابواب الاربعة والكابوت والشنطة وتشوفهم بيفتحوا ويقفلوا بسهولة ومفيش مشكلة فيهم ولالا

14- نتاكد من ان السنتر شغال ونتاكد من الريموت شغال ولالا

15- ركز فى استلام المفاتيح , فى عدد المفاتيح والريموت اللى بيجوا مع السيارة

16- نبص على عداد الكيلومتر واهم حاجة انه لايزيد عن 70 كيلو وكدا كتير كمان

17- التاكد من ان التكيف شغال ,لانك حتشغله بعد 500 كيلو فتكون مطمن ان مفيش مشكلة .. كفائته مش حتكون قوية لان العربية لسه جديدة ومش حيبان تبريده فى اللحظة دى لانك حتشغله لمدة دقيقة او اتنين بالكتير عقبال ما ترغى مع البائع ,المهم عشان بس تكون مطمن ان كل حاجة تمام .. وتاخد بالك هل فى اى قلق وهى واقفة ولالا مع تشغيل التكيف

18- اتاكد من ان الماتور صوته ناعم وهادى فى بداية التشغيل

19- حرك الدريكسيون يمين وشمال عشان تتاكد من عدم وجود اى مشكلة وصوت تزيق , وكمان شوف ظبط الدريسكيون لفوق ولتحت اخباره ايه

20- سخن السيارة وبعد ماتسخن اتاكد من ان المروحة اشتغلت بتاعت الرديايتير ولالا

21- اذا كان السيارة فيها فتحة سقف , نطمن انها شغالة وكله تمام.