الموضوع: صيانه 20 الف في الالنترا md

السلام عليكم يا شباب..ربنا وفقني والحمد لله وعملت صيانه 20000كلم ..في غبور ابو رواش
روحت الساعه 8:15 وكنت رقم واحد استلمو العربيه بعديها بتلت ساعه وكان اليوم ده باين عليه زحمه (الثلاثاء).وكنت منبه للمهندس في الاستلام علي صوت صرخه في الكاوتشوك مع الملفات وصوت خبطه خفبفه الدريكسيون مع المطبات ونبهتو اني مغير عندهم علبه الدريكسيون على ال13000 كم. وخد عندك بقى انتظار لغايه الساعه 1:30 . قد تم عمل الاتي:
1-مراجعة السوائل كلها وتربيط العفشه وتنظيف فلتر التكييف.
2-ضبط المحرك الكترونيا علي الجهاز.
3-تغير فلتر الهواء (90 جبيه).
4-تغيير فلتر البنزين(160 جنيه). وبالمناسبه كبير قوي علي فلتر بنزين وشكله غريب.
5-تغيير اربعه بوجيهات (140 جنيه) ماركه ngk.
6-ضبط الزوايا.
7-سرقه الفلاش مموري كنت سايبها في الكونصول اللي في الوسط وحواليها 100 حاجه انضف .
8-المصنعيه+ الضريبه كانت( 280 +67) يبقي الاجمالي(737 جنيه)والله المستعان.
ومن النصيب كانت العربيه واقفه تحت شباك الاستراحه وكنت متابع كله.بس بصراحه المره دي كنت خارج بالعربيه مختلفه عن كل مره( للاحسن).
الملاحظه المهمه * ان استهلاك البنزين فرق جدا انا خرجت فولت من بنزينة الامارات وصفرت العدادات لقيته كاتب المسافه المتبقيه في التانك تمشيني 570 كلم ودي عمرها ما حصلت معايا من ساعة ما جبت العربيه كان اخرها 490 كلم.
*بعد ضبط الزوايا صرخة الكاوتشوك راحت
*ولقو ان الوصله اللي بين علبه الدريكسيون وقطمه الدريكسيون فيه بوش يعني ما اتربتطش كويس لمل غيرو العلبه قبل كده.خدوا البوش اللي فيها يعني( ربطوها) فالدبه اللي في الدريكسيون منعت.
*التوكيل كله بياخد رست نص ساعه من 1 الي 1:30
*اصبحوا بيخدو منك صورة امر الشغل الزرقاء وانت خارج من التوكيل ودا بصراحه حاجه بايخه قوي انا كنت بحب احتفظ بيهم عشان اقدر ارجعلهم في اي وقت.
*احب اسجل تقديري للمهندس عاطف سمير في الاستقبال الراجل ده للمره التانيه محترم جدا جدا وخدوم قوي وبيجيد توصيف العيب اللي بتقوله عليه وبيكتبه كويس في امر الشغل وبقولك جرب وارجعلي تاني. وهو اللي قالي قبل كده العلبه عايزه تتغير وما قاوحش.تحيه لهذا الرجل.
دا تقريري عن صيانه ال20 الف للاستفاده وشكرا

متابع باهتمام