الأصدقاء الأعزاء في هذا المنتدي الرائع ... انا علي وشك شراء سيارة جديدة ان شاء الله ... واستقريت لحد كبير علي الرينو الفلوانس ... وكنت حابب أعرف رأيكم ... مميزاتها ... عيوبها ... ولكم جزيل الشكر
عرض للطباعة
الأصدقاء الأعزاء في هذا المنتدي الرائع ... انا علي وشك شراء سيارة جديدة ان شاء الله ... واستقريت لحد كبير علي الرينو الفلوانس ... وكنت حابب أعرف رأيكم ... مميزاتها ... عيوبها ... ولكم جزيل الشكر
بص حضرتك........هو ما شاء الله على العربية من كتر المزايا صعب اوى تتكتب
ممكن حضرتك تقرأ الموضوع ده وبعد ما تقراه......انزل علطول على المعرض وخلص فى الفئة التانية اوتوماتيك......او التوب لاين
http://www.nilemotors.net/Nile/147081-a.html
وشوف دى كمان
http://www.nilemotors.net/Nile/292141-a-2.html
وشوف الكلام الكتير ده
أنا عايز أعمل شكر خاص لمالكى الفلوانس وأحب أوضح شوية حاجات فى العربية مش موجودة فى أى عربية تانية
أنا هحكيلكم حكايتى مع العربيات من طأطأ لسلام عليكم
أنا كان معايا ميجان 2005......واشتريتها مستعمل سنة 2009 وقعدت معايا حوالى سنتين و 9 شهور
الميجان من العربيات المحترمة جدا وعربية ركوبة فعلا.........بس مشكلتها فعلا فى أعطالها الغير منطقية واللى مش موجودة فى عربيات تانية أقل منها فى المستوى......والقلق اللى جالى وانا بركبها نتيجة التجارب اللى مريت بيها ......
المهم.........بعتها وجبت سيفك 2009 مستعملة......وكانت عربية حالتها ممتازة........لكن للأسف .....ما استريحتش فيها خالص.......والسبب هى الميجان
الميجان عودتنى على حاجات ممتعة.........ومالقيتهاش فى السيفك
يعنى على سبيل المثال...........لما بروح افتح الشنطة بتاعة السيفك.......لازم أحط المفتاح او افتحها من الدراع اللى جوة..........لكن الميجان من الشنطة نفسها..........السنتر بتعها بيشمل فتحة تنك البنزين والشنطة وكله........
واللى خلانى أشترى السيفك...انى كنت فاكر ان الفلوانس بنفس أعطال الميجان...........لكن لما قريت ال 123 صفحة ( رابطة حائزى الفلوانس) وعرفت ان العربية ما شاء الله مافبهاش أعطال الميجان..........عزمت النية على شاء الفلوانس والحمد لله ربنا وفقنى واشتريتها (تانى فئة اوتوماتيك)
العربية لما ركبتها ......بس الله ما شاء الله.............حاجة تفرح وتفتح النفس فى سواقة العربية
العربية هقول على شوية مميزات للأخوة اللى ممكن يقروا اللى انا كاتبه وتساعدهم على الاختيار:
1. أولا العربية كراحة فى الركوب......حاجة فوق الوصف فى الراحة فى المناورة والكرسى المريح ..........
2. الباور الناعم اللى بيخلى الواحد وهو بيركن مش تعبان ولا بيفرق معاه فى الطلوع والرجوع
3. الارتفاع عن الأرض.......يعنى انسى المطبات والنقر والتكسير اللى تحس بيه وانت سايق......يعنى لو معاك 3 أفراد فى الكنبة الخلفية.......صعب جدا تحك فى مطب رخم
4. الشنطة الواسعة اللى تشيل شنط كتييير جدا .....
5. الصاج المحمل ومددى منظر للعربية بالقوة والصلابة.....لو واحد ركن عليها ماتلاقيش الصاج عروج
6. الكماليات اللى مالهاش حصر...........تحس انهم كانوا عايزينك تدخل وتسيب العربية تمشى لوحدها من غير ما تتعب نفسك وتدوس بنزين وفرامل........آه...........الفرامل بالصلاة على النبى.........مش قادر أوصف الفرامل........من الآخر (أحسن من السيفك والفانتازيا)
7. الكنبة الخلفية مريحة جدا للى بيقعد ورا..........واسعة جدا ومريحة جدا جدا
8. العزل ثم العزل ثم العزل ........حاجة تحفة......بس صوت الموتور بيطلع فوق ال 160 .......بس قبل كدة........ولا الهوا.....انسى صوت الظلط والأسفلت الوحش والهوا والكلام ده كله
7. أنا مش هتكلم عن الكماليات .......عشان بتختلف من فئة للتانية...........بس اللى عايز يشترى......ما يشتريش أقل من الفئة التانية أوتوماتيك
8. بالنسبة لإعادة البيع..............لو العربية إعادة البيع ما اتحسنتش.......عمرى ما هفكر أغير...........ولو حبيت أغير.......يبقى أكيد هفكر فى الفلوانس 2015...........لو غيرت لأحسن..........يعنى الميجان لو كانت بدون أعطال.........ماكنتش بعتها..........لأنى بصراحة ما لقيتش ركوبة أحسن منها....ماعدا الفلوانس
وبالتوفيق لأى حد ناوى يشترى ويجيب فلوانس ........ومش هيعرف قيمة اللى انا بقوله الا لما يقران بينها وبين أى عربية تانية فى نفس فئتها السعرية أو أعلى منها لغاية 50 ألف جنيه
شاكر جدا لحضرتك
عربيه محترمه قوى فيها امان و كماليات و ثبات و استهلاك بنزين معقول و ما شاء الله منتشره. هو كان فى بعض الملاحظات على التكييف بتاعها ضعيف حبتين مقارنه بالياباني لكن غير كده زى الفل ما شاء الله . انا بس محبش الخليجى منها شكلها ما بيجبنيش لكن بتاعه الوكيل أحلى منها فى الشكل
ما شاء الله الكلام عن العربية
يفتح النفس
ان شاء الله بالتوفيق ..
الحمد لله النهارده رايح استلم العربية الجديدة فلوانس 2012 e3 ادعولي
حد يا جماعة ممكن يفيدني هل في وصلة تاخد من ال aux |اللي في العربية وتخرج usb ?
مبروك يا استاذ شريف العربيه
عايزين راى حضرتك ايه فى العربيه وخصوصا موضوع النتشه بتاعة الفتيس والسحب على الاول والتانى اخباره ايه؟
هو حضرتك استلمت بعد الحجز بقد ايه
ألف مبروك مقدماً وإن شاء الله تأخذ خيرها كله يارب أمين
أنا أسف جدا لتأخير تقريري ... بكرة باذن الله حاكتب تقرير وافي عن العربية بعد اسبوعين ... من المتعة :)
بسم الله الرحمن الرحيم ... أنا فكرت كتير ازاي ممكن اكتب التقرير ده واقسمه ازاي لحد ما استقريت علي اني اقسم التقرير ثلاثة اجزاء الجزء الأول عن السيارة من الخارج والجزء الثاني عن المقصورة الداخلية للسيارة والجزء الثالث عن أداء السيارة ... واتمني الكلام يكون مفيد لكل اللي حايقراه ان شاء الله ... متنسوش عربيتي الفئه الثانية أوتوماتيك E3 Dynamic اللون نبيتي
أولا : السيارة من الخارج
- العربية بسم الله ما شاء الله بتخطف عين اللي بيشوفها
- احساس كبير بالفخامه
- الشنطة مرتفعة قليلا من الخلف مما يحجب جزء من الرؤية في مراية الصالون
- المرايات الجانبية رؤيتها فوق الرائعة ... الجزء المقعر في مرأة السائق بيلخبط شوية في الأول لكن بعد كده بتاخد عليه
- صاج العربية محمل وقوي جدا وبيبان وانت بتفتح الباب وبتقفله وحتي لما بتحاول تنضف العربية ... صاج قوي فعلا ما شاء الله
- المقابض النيكل عامله شكل رائع للعربية
- الجنوط عادية ومفيهاش شئ مميز لكن قوية
- الشنطة واسع جدا جدا ما شاء الله
ثانيا : المقصورة الداخلية
- بمجرد جلوسك جوا العربية بتلمس يعني ايه عربية فرنساوي ... الفخامة والشياكه عنوان رئيسي للعربية والفرق بينها وبين الأماني واضح جدا فيما يخص الشياكة (وان كانت دي مسألة نسبية) لكن قريب جدا كنت راكب أوكتافيا اللي هي فيها نفس مواصفات الفلوانس تقريبا وحسيت جدا الفرق في درجة الجمال الداخلي وحتي الخارجي للفلوانس علي الأوكتافيا ... مقدرش أنكر قوة الأوكتافيا وروعتها لكن انا هنا بتكلم علي جمال السيارة وتفرد تصميمها وفي ده تتفوق الفلوانس بصراحة
- كرسي السائق مريح جدا جدا وبيتظبط علي كذا وضع راتفاعا وهبوطا وكذلك عجلة القيادة يمكن التحكم في وضعها فبتلاقي نفسك في النهاية بتقدر تظبط وضع القيادة بدقة للوضع اللي بيريحك فعلا
- عدادات العربية مريحة جدا ... اضاءة بيضاء للعدادات وشاشة السيارة اللي هي شاشة الكاسيت والساعه ودرجة الحرارة شديدة الوضوح والتنظيم
- كل وظائف السيارة في متناول يد السائق ويمكن الوصول لها بسهوله شديدة
- وضع ازرار التحكم في الموبايل والكاسيت خلف عجلة القيادة بيلخبط في الأول شوية لكن بعد كام يوم بتاخد عليه وبيبقي سهل جدا
- الكروز كنترول رائع والسبيد ليميتر (speed limiter) اختراع عبقري علي الطرق اللي فيها رادرات
- تابلوه السيارة واسع وخاصية التبريد مفيدة جدا جدا
- أماكن التخزين في السيارة ليست علي المستوي المطلوب من حيث عددها فقط التابلوه والكونسول ...
- السيارة واسعة جدا ما شاء الله ... لو ثلاثة متوسطي الحجم قاعدين ورا بيبقوا مرتاحين لحد كبير ...
- وحدة التكييف الخلفية مفيدة جدا جدا
- الكنبة الخلفية بها مسند يمكن فتحه وغلقة ويوجد به اماكن للأكواب والمشروبات ... أوبشن هايل بالذات مع الأطفال
- تكييف العربية وعلي غير كل ما قيل وعلي غير المتوقع جيد جدا ... صحيح هو أقل من الكوري نوعا ما ولكن ليس بشكل كبير والفرق الجوهري بينه وبين الكوري ليس درجة التبريد النهائية ولكن زمن الوصول لدرجة التبريد المطلوبة ... في عز الحر وده كان واضح خلال الفترة اللي فاتت العربية بتاخد معايا حوالي 10 دقائق للوصول لدرجة الحرارة المطلوبة ودي أسوأ الاحتمالات لكن في العادي الموضوع بياخد دقيقتين بالكتير ... أوبشنز التكييف ممتازة ويمكن ظبط كل جانب علي حدة وسرعات المروحة 8 سرعات مما يعطي امكانية الوصول لدرجة تبريد مثالية ...
- كاسيت السيارة ونظام الصوت ممتاز ... وسهل البرمجة ... الصوت شديد الوضوح ... يمكن التحكم في كثير من وظائف الصوت وهناك خاصية رائعة تجعل الكاسيت يرفع الصوت تلقائيا في حالة زيادة سرعة السيارة علي الطريق ... امكانية سماع الأغاني علي تليفونك المحمول من خلال البلوتوث خاصية رائعة
- خاصية التحكم بالمحمول واستقبال المكالمات علي سماعات الكاسيت من خلال البلوتوث ممتازة ... الصوت شديد النقاء ويمكن التحكم في كثير من خصائص الموبايل من خلال السيارة ويمكن اضافة اكتر من موبايل ولكن واحد فقط الذي يعمل في نفس الوقت
- الرينو كارد رائع ويشعرك بالأمان ولكن يجب التعود علي استخدامه ...
- عزل السيارة فوق الرائع يكفي اني اقول انك لو قافل زجاج السايرة مشغل التكييف لو حد بيحاول يكلمك من بره عمرك ما حاتسمعوا وعمرك ما حاتسمع اي صوت بره العربية تقريبا
- بشكل عام الجلوس داخل مقصورة الفلوانس تجربة مختلفة تماما تشعرك بالتميز والراحة والرفاهية والجمال
ثالثا : الأداء
- الطلعة الأولي للسيارة بطيئه لحد ما ... وده بسبب وزن العربية مقارنة بالموتور والمقارنة دي بالنسبة لي كانت واضحة جدا بسبب تعودي علي الفيرنا اللي موتورها اقوي بكتير من صاج وحجم ووزن العربية ... لكن ده مع التكييف ... لو حبيت تعمل كيك داون بدون تكييف العربية حاتطير تقريبا ...
- أبعاد العربية كبيرة لكن بعد أربع أيام كنت اتعودت لحد كبير ولقيتها سهلة التحكم جدا الحمد لله
- أداء العربية بيتأثر لحد ما بالتكييف لكن مش أوي
- السحب علي الأول والثاني ضعيف نسبيا لكن بمجرد ما بتفتح بيبقي صعب جدا اي عربية تحصلك
- النتشة في الفتيس موجودة بين الأول والثاني ولأني كنت مركز معاها فكانت ملحوظة اول اسبوع لكن بمرور الوقت اتعودت لدرجة اني مش بحسها فعلا دلوقتي ...
- ثبات العربية ممتاااااااز ... قدرتها علي المناورة جيدة جدا ... الفرامل فوق الرائعة
- استهلاك البنزين فوق المتوسط وعالي مع التكييف تقريبا متوسط أثناء عمل التكييف 6.5 - 7 كم لكل لتر يعني متوسط 130 كم لكل 20 لتر وبدون تكييف ممكن المتوسط يوصل ل 10 كم لكل لتر يعني 200 كم لكل 20 لتر .. دي أرقام تقريبية .. وبنزين 92 شغال زي الفل بدون مشاكل مع العربية الحمد لله ...
- الباور فوق الممتاز ... الدركسيون خفيف جدا جدا جدا في الركنات والخروج من ركنه وعلي السرعات البطيئة جدا وبيتقل بوضوح مع السرعات العالية ودي من عوامل الأمان ...
- استجابة الفتيس للنقلة مذهلة ... بتحس كأن العربية عايزة تتطير ...
- الحاجة الوحيده اللي مضايقاني في العربية هو صوت انذار عدم ارتداء الحزام ورغم تعودي علي ارتداء الحزام طول عمري لكن في بعض الشوار واثناء الركن او الحركة في الشوارع الضيقة بتبقي عايز تفك الحزام وللأسف العربية مش بتسمحلك بده والصوت بيفضل يعلي بشكل بيضطرك انك تلبس الحزام لحد قبل ما تنزل من العربية
أتمني ان التقرير يكون مفيد ومكنش نسيت حاجه وبالتوفيق للجميع ان شاء الله
+11111111111111111
ياباشا ألف مبروك على العربية ربنا يعطيك خيرها ويكفيك شرها
كان لى سؤال عن المرايات الضم هلى يمكن تشغيل هذه الخاصية وإنت داخل السيارة يعنى لو معدى فى شارع ضيق وخايف المرايات تتخبط فهل يمكنك ضم المريات ولا الخاصية دى فقط بعد إطفاء السيارة، وكان لى استفسار ثانى هل المريات بيتم ضمها مع بعض ولا ممكن كل واحدة لوحدها، وآسف على الإطالة، ومرة أخرى مبروك على السيارة
المرايات طبعا بتقدر تقفلها وانت جوة ......عن طريق انك بتدوس على زرار جنب زرار التحكم فى زجاج الكهربا....واللى بيتحكم فى المرايات نفسها.....وموضوع انك ممكن تفتح واحدة وتقفل واحد كهربا.....صعب ومتهيألى مش موجود فى أى عربية تانية
والفلوانس مراياتها كبيرة وميزتها انها مش بارزة برة العربية........يعنى وانت ماشى ما تقلقش خالص.....صعب تحك....ولو اتخبطت...يبقى ده معناه ان انت كنت على وشك حك الرفرف والباب
والمرايات بتقفل لوحدها لما العربية بتقفلها بالريموت.........وأول ما تفتح الباب....المرايات بتفتح لوحدها من غير ما تدوس على أى زرار
ربنا يباركلك فيها يارب ويعطيك خيرها ويكفيك شرها ويبعد عنك وعنها عيون الحساد ان شاء الله
الكلام مظبوط جدا ... وبأكد ان المرايات بتضم او تقفل مع بعضها مش كل واحده علي حدة
أولا الله يبارك فيك وعقبالك لو ناوي ان شاء الله ... ثانيا أنا جبت موديل 2012 لسببين .. الأول : اني كنت بعت عربيتي ومكنتش اقدر استني شهرين علي ما التوكيل يجيب 2013 ... السبب الثاني : ان عرفت ان مفيش اي فرق لا في الشكل ولا في الامكانيات بين 2013 و 2012 فتوكلت علي الله واشتريت ... أنا جبتها من معرض الليثي في مصر الجديدة هم ناس محترمين جدا الحقيقة