الموضوع: مغامرة شيقه مع لوجان..رينو شركه محترمة..مركز العبور في النازل

اخوتي الاعزاء السلام عليكم ورحمة الله...
احكي لكم عن مغامرة شيقه حدثت لي مع سيارتي العزيزة رينو لوجان 2010 بعد سنتين ونصف مع قياده خلت من اي مشكله مع هذا السيارة الاصيله...

يوم الاربعاء اللي فات بعد سفر عنيف تلاه مشوار طويل في الزحام رجعت للسيارة ودورت المحرك فطفت السيارة افتكرت اني انا طفيتها من غير ما اقصد...دورت تاني طفت...تالت طفت....قلت بخخخخ...شكرا...دورت ودوست بنزين جامد اشتغلت قلت الحمد لله ومشيت وعقدت النيه الذهاب للعبور خاصة اني كده كده في القاهرة وقربت من 30 الف كيلو قلت اعمل صيانه بالمرة...

اتصلت بالكول سنتر لاطلب ميعاد اصلاح وصيانة الثلاثين...ادوني الاحد 9 صباحا وكله فل...

في نفس اليوم على كوبري اكتوبر راجع من مدينة نصر في اتجاه الجيزة والدنيا زحام رهيب والكوبري واقف...وانا ماشي العربيه طفت دورت ومشيت(طبعا الواحد بيمشي ع الاول خطوتين ويقف) طفت تاني...وهكذا مع كل تهدئة او دوسة فرامل الاقيها طفت وقعدت ادورها وتطفي لحد ما وصلت الدقي...تخيلوا بقى....
كلمت الكول سنتر تاني لاحصل على اكسبشن واذهب الخميس اللي كان تاني يوم بدل الاحد لانه عطل كبير...قالي اتصل الساعه 8 الصبح تاني يوم وهنديك اكسبشن...

مشوار بالعربيه بالليل...العربيه زي الفل...عرفت انها هتعملها وتبقى كويسه اول ما تروح بيها التوكيل( صدق الي قال العربيات بتخاف من التوكيل)
نمت بدري وصحيت 8 واتصلت راحوا ادوني اكسبشن بعد الاتصال بمدير مركز العبور وقالولي هتاخدها في نفس اليوم بس هتتاخر...قلت الحمد لله...واتجهت فورا الى العبور وصلت الساعه عشرة ونص لاني كنت رايح من الهرم وخدت صلاح سالم وكان زحمه جدا...وبرضه العربيه زي الفل...

وصلت لقيت امجد ومحمد بهجت هم اللي بيدخلوا العربيات بصراحه اتشائمت...لاني حكيت عن خبرتي مع محمد بهجت وانه ضايع...وبيقول على حاجات اتعملت في العربيه ومبتكونش اتعملت ده لو انت سالته...واللي يقوله انك عاوز تعمله مبيتعملش...

المهم رحت لامجد قالي خد رقم واستنى...قعدت مستني....امجد يروح يختفي والبيه محمد بهجت بره بيشرب سجاير ويحكي والناس ملطوعه ومجدش بينادي على ارقام...رحت لمحمد بهجت وزعقت بالادب وقلتله العطله جايه منين لو سمحت اندهوا ورانا مصالح....

امجد نده على رقمي قلت اهه احسن من بهجت وحكيتله القصه....وقلتله على اللباد اللي البيه محمد بهجت قالي انه اتركب والسخونه زي ماهي عند الدواسات وتصفيرة في بدال الفرامل....قالي ماشي الساعه 3 هتاخدها....قلتله تفتكر ايه السبب؟؟؟ قالي هنضف بوابة الموتور قلت اكيد هو حاطه كاحتمال...

سكت واستنين للساعه 3 نده على امجد قلتله ايه الاخبار قالي كله تمام قلتله ايه اللي كان فيها قالي منا قايلك بوابة الموتور....قلتله انا افتكرتك حاطه احتمال قالي لا هو كده....قلتله يعني ده حصل واتكرر مع ناس عشان كده انت متاكد؟؟؟؟اصل متاخدش على ان العربيه كويسه دلوقت امبارح بالليل كانت كويسه والنهارده وانا جاي برضه.... قالي هو كده متقلقش...مكنتش مطمن بس بعد تاكيداته سكت...ومشيت وبرضه في طريق العوده العربيه زي الفل والساعه 4 العصر...

الساعه 6 رحت المهندسين طفت....قلت الله يخرب بيتك يا امجد...مشيت...قلت خلاص اروح تاني يوم الاحد وامري لله...عشر دقايق وطفت تاني...وقعد الموضوع يتدهور لدرجة اني جيت بعد ميدان مصطفى محمود والعربيه طفت وادورها تطفي...ادوس بنزين تدور اشيل رجلي من ع البنزين تطفي....
كنت في غاية الضيق والنكد من اني هضطر اسيب العربيه هنا ليوم الاحد عشان البهوات اللي ده غلطهم ماجزين جمعه وسبت...وانا اللي هشيل الليله واتحرم من العربيه خميس وجمعه وسبت بسبب غبائهم...
قلت والله لاتصل باكول سنتر بس عشان اعمل شكوى مكانش عندي اي امل....بتاع خدمة العملاء حكيتله وانا متنرفذ قعد يعتذرلي وقالي خليها للاحد لان كده كده لو في طواريء العربيه بتتقطر للمركز وبتستنى للاحد.... واقترح عليا اروح مركز خدمه معتمد في الجيزة اسمه عثمان موتورز في فيصل وده مش هيخرج العربيه من الضمان...اداني النمرة...

اتصلت بيه وكلي امل راح قالي شطبنا حكيتله راح قالي كلم الكول سنتر خليهم يبعتولك عربية الطواريء...قلتله دي هتقطر العربيه وتقعد لللاحد قالي لا...في عربية طواريء اصلاح يا باشا كلمهم خليهم يبعتوهالك..ده من حقك...

كلمت الاخ بتاع خدمة العملاء هو هو...قلتله هو في حاجه زي كده؟؟؟قالي اه بس لو العربيه مش بتتحرك والعيب ممكن يتعالج في نفس المكان...قلتله ده على اساس اني عربيتي نور التابلوه هو اللي بايظ؟؟؟؟منك لله في سري...وقعدت احكيله تاني...قالي هوصلك بالمهندس...كلمني الراجل حكيتله قالي جايلك في السكه وخد رقم موبايلي...

نص ساعه او اقل وجالي بشمهندس محمد بعربيه لوجان روماني...ومعاه عده...دور لقاها بتطفي...فتح الكبوت وفك غطاء الموتور وفك حاجه اعتقد انها بوابة الموتور قالي اسمها بس انا مش فاكره....وجاب قطعه بدالها كانت معاه...ركبها قالي دور دارت زي الفل...قالي العيب فيدي وقالي اسمها...وقالي تجيلي في المقطم يوم الاحد الساعه 8 الصبح عشان اركبلك واحده مكانها جديده...انت من حقك واحده جديده...ودون بيانات الرخصه ...وسالني وهو مستغرب انت كنت في العبور النهارده؟؟؟قلتله اه..والصيانات بتعملها فين...قلتله كلها في العبور باجي من اسيوط اعملها مع ان في مركز خدمه وحتى ال25 وال15 اللي ملهمش لازمه...قالي صادق وكان مستغرب جدا...وشكرته ومشي...

العربيه بعد ما مشي بقت زي الفل...باستثناء انها في شارع النيل عجوزه لقيتها كاني دايس بنزين للاخر والار بي ام علي ل5000 والصوت رهيب مع اني مش دايس بنزين...واضطريت اطفي العربيه..بالاضافه ان دواسة البنزين تقلت شويه...لكن للان الحمد الله العربيه ماشيه كويس وانقذني اني اقعد يومين من غير عربيه...دعيتله بجد من قلبي ...وهروحله ان شاء الله يوم الاحد المقطم...

اسف جدا على الاطاله....لكن حبيت اخوتي الاحباء هنا يعرفوا الموقف بالتفصيل عشان يستفيدوا واللي يروح العبور تاني يركز مع البهوات اللي هناك وتبقى عينه في وسط راسه وميسلمش باي كلام يقولوهوله...

والسلام عليكم ورحمة الله وبركاته...