الموضوع: صيانه ال 60 الف النترا ؟

المشاركة الأصلية كتبت بواسطة Medicalist

السلام عليكم
العربيه يا جماعه ان شاء الله داخله على 58 الف كيلو وده ميعاد صيانه ال 10 الاف
المفروض اعمل ايه وايه الى بيتغير ؟
انا غيرت البوجيهات فى 30 الف و فلتر البنزين على ال 30 الف برضه بس كان نضيف
السيور زى ما هى اغيرها ولا استنى شوى لو كويسه ؟
زيت فتيس الاوتوماتيك ماشاء الله لونه فاتح و مقاسه كويس وما غيرتوش ومش عايز اغيره
الكاوتش طبعا جاب اخره عايز اجيب اتنين جداد لانه الكاوتش الى عندى بيزحف
التيل الامامى لسه برضه ؟
الزيت ال 10 الاف بقى اسود وريحته محروق بقاله من اخر صيانه من شهر 10 الى فات يعنى حوالى 8 شهور كتير
دايما بحط شيل اجرب موبيل ولا اخلينى فى الشيل ؟
وشكرا جزيلا يا رجاله

وعليكم السلام ورحمة الله وبركاتة..،،

عموماً فى صيانة ال60 مفروض حضرتك تغير سير المجموعة ( كل 60 الف او 3 سنين ) -- بوجيهات ( كل 20 الف ) تيل فرامل ( على اساس انه بيتغير كل 20 الف ودة مش بيحصل طبعاً )
زيت اكيد - رجلاش فرامل - والكشف على السوائل

بالنسبة لحضرتك
1- هتغير بوجيهات المرة دى
2- فلتر البنزين المرة اللى جاية لانه كل 40 الف
3- زيت فتيس اكيد لانه حضرتك بيتغير على 40 الف او سنتين ايهما اقرب ( حضرتك مقولتش العربية موديل كام ) كلامى على اساس الاوتو
4- هتغير سير المجموعة
5- 4 فرد للامان بس ممكن فردتين لو الميزانية مش سامحه
6- حضرتك مقولتش غيرت مية الرداياتير ولا لا عموماً هى بتتغير كل 40 الف ولازم حضرتك تغيرها
7- هتغير تيل اكيد ونصيحة هات نوع اسمه موبيس هو هو الاصلى بس ارخص
8- غير زيت لنوع من ال3 يا اما فالفولين او ليكوى مولى او كاسترول ايدج وانا ارشح فالفولين لانى جربته


اسعار الحاجات اللى هتتغير
1- بوجيهات ---> 65 جنيه Genuine parts من اى منفذ بيع قطع غيار هيونداى اصلية
2- سير المجموعة ---> كورى من التوفيقية من ابراهيم البنا ب55 جنيه
3- زيت الفتيس ---> هتجيب 3 كيلو زيت فتيس اتوماتيك شل ATF من اى منفذ بيع قطع غيار هيونداى اصلية ( ارخص من البنزينة على فكرة ) الكيلو ب 28 جنيه يعنى 84 جنيه لل3كيلو
4- 4 فرد دى على حسب بس ارشحلك انك تجيب 4 فرد مقاس 195/65/15 ودة المقاس الاكبر من اللى عندك بس ستوك بردو والفردة هتعمل فى حدود 500 جنيه لو جبتها Toyo هى فرده طرية جداً ومحترمة
5- مياة الرادياتير هتجيب جركن موبيل الاخضر تمنه 67 جنيه من اى بنزينة موبيل
6- تيل الفرامل موبيس علبته زرقا نفس الاصلى بالظبط ب120 جنيه من ابراهيم البنا فى التوفيقية
7- لو هتعمل اوردر لزيت من فالفولين هتكلم 19728 وتطلب زيت Valvloine syn power MST 5w-30 دة ب310 وبيجيي يغيروا لحضرتك تحت البيت وكمان بيجيب لحضرتك فلتر الزيت كمان وتمنه 21 جنيه ومش بياخد من حضرتك اى تكلفة للتغير ولا للتوصيل يعنى اجمالى 331 جنيه عايز تديله بقشيش اديله مش عايز دى حاجة بترجع لحضرتك بس هو مش بيطلب

اخيراً انصح حضرتك بالمكان اللى هتعمل فيه كل دة وهو مركز Speed Service Center بتاع البشمهندس هانى ميخائيل بتاع موضوع واحد من جوا التوكيل لو تفتكره واحنا عاملين معاه اتفاق واعلان رسمى للمنتدى ودى الورشة المعتمدة للقسم
اسعاره حلوة وارخص من التوكيل باضعاف الاضعاف
وبيعمل خصم 10% لحاملى استيكر نايل موتورز

ولو طلبت منه يجبلك كل الحاجات دى بيجبها هو لحضرتك وبنفس التكلفة تقريباً

بالتوفيق ولو احتجت اى حاجة قول انا عربيتى اخت عربيتك وكل دة عملته
ومجرب البشمهندس هانى وبجد انسان شاطر ومحترم جداً فى شغله

المشاركة الأصلية كتبت بواسطة Medicalist

والله يا باشا منا عارف اقولك ايه ربنا يبارك فيك ويجازيك خير عن الافاده\
العربيه 2010 وجنط 15 انا عندى فرده كومهو بس مش فاكر مقاساتها جديده كنت شاريها من سنه وما ركبتهاش مش عارف هل ينفع ابدلها و اجيب بريدجستوت واجيب واحده تانيه بريدجستون ولا صاحب المحل هيرفض
وبالنسبه للتيل اغيره حتى وهو لسه مليان ويمشينى ؟
وشكرا جزيلا يا كبير

العفو يا باشا انا تحت امرك
بص فرده حضرتك شاريها من سنة وممكن هى مثلاً انتاج سنة قبلها والله اعلم اتخزنت ازاى
فمعتقدش هتبقى كويسة لما تركب
ممكن حضرتك تنزل فرع بريدجستون عمارات العبور
تجيب اربع فرد
بص حضرتك المقاس اللى راكب فى العربية دلوقتى 185/65/15
احنا هنعرض شوية لان المقاس الجديد هيديك شوية ثبات عن المقاس القديم هتركب 195/65/15
وحضرتك لو فتحت الباب وبصيت على القايم هتلاقى المقاسين مكتوبين
هى اصلا بتنزل فى كوريا بالمقاس دة
انا كنت سألت فى بريدجستون على الاربع فرد قالى ب561 الmy-01
بالبلوف والترصيص والتركيب والنيتروجين وكل 10 الاف كيلو تيجى تعمل rotation
وفى خصم 5% لحاملى استيكر نايل موتورز

اما بخصوص التيل اعتقد 60 الف كيلو ولسة متغيرش حرام عليك
غيره لان حرام تضيع طنبورتين علشان نوفر 120 جنيه تمن التيل
ولا اية؟