تجربتي مع رسالة Oil Pressure Fault
السلام عليكم ورحمة الله وبركاته
ازيكم ياشباب؟
يوم الخميس كنت في مطروح وميجي حصل فيها التالي:
1- رسالة Oil pressure fault
2- لمبة الزيت منورة
3- لمبة Stop في التابلوه منوره
المهم أنا وقفت ساعتها علطول وقست الزيت لقيت الزيت مظبوط، قلت يمكن مشكلة في الحساس ولا حاجة وماحطيتش في دماغي
تاني يوم الصبح كنت راجع القاهرة فراجعت الزيت الصبح لقيته ناقص سنة بسيطة خالص يعني حوالي نصف سم فتوكلت على الله واتحركت بالعربية وأنا ماشي طول الطريق كانت الرسالة كل شوية تظهر وبعدين تختفي ويظهر oil level correct، المهم أنا كنت حاسس إن فيه مشكلة ما وإن الحساس مش بايظ ولا حاجة بس قعدت أدعي ربنا يستر وأوصل بالسلامة وطول الطريق عيني على الحرارة ومركز أوي مع صوت الموتور وربنا سترها الحمدلله ووصلت بدون مشاكل
بعد صلاة الجمعة بقى جيت أقيس الزيت لقيته نقص شوية بقى حوالي 2-3 سم وكان أقرب للحد الأدنى في مقياس الزيت ولاحظت آثار تسريب زيت في حوض العربية
المهم وديت العربية لواحد جاري شغال في التوكيل بتعامل معاه فقالي إن المشكلة في حاجة اسمها سويتش ضغط الزيت وإنها بتسرب زيت فعلا (دي اسمها في العربيات مكنة زيت أو ساعة زيت)
رحت اشتريتها من عند ميشيل حليم بـ 195ج وركبهالي وزودنا الزيت كان نقص حبة حلوين يعني العربية أخدت حوالي كيلو زيت لحد ما وصل للمعدل الطبيعي والحمدلله اللمبة طفت والرسالة اختفت وكله تمام وأديني بتابع الزيت ومافيش مشاكل لحد الآن
قلت أشارككم التجربة وللعلم فيه إتنين سويتش زي ده ومختلفين عن بعض في الفيشة فقط ومابيركبوش مكان بعض وأماكنهم (واحدة في الموتور من قدام وواحدة ورا تحت عند كارتير الزيت) والاتنين سعرهم واحد تقريبا والسعر ده للقطع الأصلية طبعا