افضل فرص الاستثمار

**midoabdeen** · 10-06-2012 10:01 PM

ازيكم يا جماعة عاملين اية
انا عايز حاجة اشغل فيها فلوس بس تكون مضنونة
المبلغ حوالى 15000
هل البنوك ولا البورصة ولا المضاربة فى العملة
انا ماعنديش خبرة اوى فى الحاجات دى ياريت اللى يعرف يدلنى
وشكرا

**Screenplays** · 11-06-2012 03:12 AM

المبلغ ده مينفعش الا للمضاربه للبورصه و انت شايف الحال

فالافضل ارميهم في البنك و خلاص

**AhMeD MeTwAlY** · 11-06-2012 03:24 AM

الافضل ليك البنك لان البلد كل يوم بحال
او شوف حاجه تبع الفوريكس هتظبط معاك

**alrabeh** · 11-06-2012 03:37 AM

أخى الفاضل
إياك والفوركس (مضاربة العملات) فلوسك حتصفر ويقفل عليك الحساب فضلا عن انها حرام لأنها تستخدم نظام الرافعة المالية بالإضافة الى انك لما بتشترى الأول ما بتملكشى حاجة ولما تبيع الأول بيبقى حرام لأنك تبيع ما لا تملك
والبورصة أيضا أنا دارسها كويس جدا وهى معظم معاملاتها بها غبن وغش وتدليس
حتى لو فكرت تستثمر فى شركة كويسة وكسبانة تجد المضارب الكبير ينزل سعر السهم وانت لا حول لك ولا قوة
الموضوع كبير ويطول شرحه

**Medo.Malek** · 11-06-2012 06:13 AM

يا جدعان محدش يقول حال البلد نايم و الاقتصاد واقع ! .. انتو الاقتصاد ..!
انتو اللى بتحركوا البلد بشغلكم و و بجهدكم !
لصاحب الموضوع انصحك تعمل مشروع خدمى صغير و تجيب واحد او اتنين عاطلين تشغلهم فيه
و خلى نيتك انك بتعمل كده لربنا و للبلد و ان شاء الله ربنا هايكرمك
و ربنا يوفقك و يوفقنا للصح

**joesph2010** · 11-06-2012 09:33 AM

متابع بشدة

**aboomar22** · 11-06-2012 09:51 AM

انت عايز تشتغل ولا تشغل الفلوس لو انت عايز تشتغل اقولك فكرة واحد اعرفة كان عاملها انا معرفش تفاصيلها هقولك وانت كما بقة كان بيشترى كروت التليفون المنزلى والمحمول جملة وبيبعها للمحلات وهو مكنش متفرغ دول كانوا معاه فى شنطة وهو ماشى رايخ اى مشوار يعدى على اى محل عاوز كروت تليفون ومعظم المحلات كانت بتاخد وكان بيكسب منها وراس مالها مش كبير هى بس عايزة حركة او حتى لو انت تاخد محل صغير وتبيع فيه حتى لو كروت شحن بس هتمشى ان شاء الله اما البورصة موالها كبير وانت المبلغ اللى معاك صغير لو حابب تخاطر ممكن تشترى اسهم قليلة المخاطرة زى سيدى كرير - المصرية للاتصالات

**Bonanza** · 11-06-2012 10:42 AM

سلام عليكم

اسمحلي اساعد حضرتك علي حد معرفتي و علمي

في الاول لازم تحسب نسبة مخاطرتك كام و مقدار لا قدر الله الخسارة اللي تستطيع تحملها من المبلغ ده

لو مش هاتقدر تتحمل اي نسبة خسائر يبقي اياك اياك اياك تدخل فلوسك البورصة او الفوريكس

البنوك في الحالة دي افضل وسيلة استثمار امنه ليك

من ناحية تانية بقي

حضرتك لسة قايل انك مالكش اي خبرة في البورصة او الفوريكس

طيب ده معناه .. انك هاتسوق عربية و انت مش بتعرف تسوق و كمان مغمض عنيك

البورصة لازم لها معرفة و قراءة و تحليل عشان تقدر تحط فلوسك فيها

و كذلك الفوريكس محتاج تحليل سليم ( اتكلم هنا عن علم التحليل الفني و ده دراسة و كورسات )

فما بالك بقي و انت مش عاوز تخسر و كمان معندكش اي معلومات عن البورصة و فوق ده كلة بقي البورصة اصلا حالها مايعلم بيه الا ربنا في الايام دي .. يبقي النتيجة محسوبة من الاول

و دي نصيحة لوجه الله

وعلي فكرة انا شغال في شركة اوراق مالية و المفروض اني بدي نصايح للناس يشتروا ايه و يبيعوا ايه

طيب تعمل ايه انت دلوقتي

اقولك 3 حاجات

اولا شهادات استثمار

و ثانيا حط فلوسك في البنك

و ثالثا مشروع تجاري بعد دراسة جدوي و تفكير سليم

انا جديا بفكر اعمل اي مشروع عشان حال البورصة التعبان ده

ربنا معاك

**MaZaGAngeE** · 11-06-2012 12:01 PM

المشاركة الأصلية كتبت بواسطة alrabeh

أخى الفاضل
إياك والفوركس (مضاربة العملات) فلوسك حتصفر ويقفل عليك الحساب فضلا عن انها حرام لأنها تستخدم نظام الرافعة المالية بالإضافة الى انك لما بتشترى الأول ما بتملكشى حاجة ولما تبيع الأول بيبقى حرام لأنك تبيع ما لا تملك
والبورصة أيضا أنا دارسها كويس جدا وهى معظم معاملاتها بها غبن وغش وتدليس
حتى لو فكرت تستثمر فى شركة كويسة وكسبانة تجد المضارب الكبير ينزل سعر السهم وانت لا حول لك ولا قوة
الموضوع كبير ويطول شرحه

باشا
الفوركس مش حرام ...... و البورصة فيها لعب دي حقيقة لكن المفروض انك تقدر تحلل فني و تاخد قرار بشراء او بيع بناء على فهم و دراسة مش بسياسة القطيع اللي تودي في داهية...

**AhMeD MeTwAlY** · 11-06-2012 01:10 PM

المشاركة الأصلية كتبت بواسطة alrabeh

أخى الفاضل
إياك والفوركس (مضاربة العملات) فلوسك حتصفر ويقفل عليك الحساب فضلا عن انها حرام لأنها تستخدم نظام الرافعة المالية بالإضافة الى انك لما بتشترى الأول ما بتملكشى حاجة ولما تبيع الأول بيبقى حرام لأنك تبيع ما لا تملك
والبورصة أيضا أنا دارسها كويس جدا وهى معظم معاملاتها بها غبن وغش وتدليس
حتى لو فكرت تستثمر فى شركة كويسة وكسبانة تجد المضارب الكبير ينزل سعر السهم وانت لا حول لك ولا قوة
الموضوع كبير ويطول شرحه

المشاركة الأصلية كتبت بواسطة mazagangee

باشا
الفوركس مش حرام ...... و البورصة فيها لعب دي حقيقة لكن المفروض انك تقدر تحلل فني و تاخد قرار بشراء او بيع بناء على فهم و دراسة مش بسياسة القطيع اللي تودي في داهية...

+1
بالاضافه ان في البدايه حضرتك بيفتح معاك حساب تجريبي عشان تقدر تشوف ان اتعلمت ولي لا عشان مش تدخل للحياه العمليه مره واحده تدخل الاول في مضاربات مجانيه مش بتدفع عليها حاجه وبعد فتره بتبدي تدخل بفلوسك وصلت يا باشا