تقرير عن السيراتو بعد استخدام 3 ايام

**ysalah** · 18-06-2008 06:52 PM

1. العربية معزولة بطريقة ممتازة وانت جوه العربية تحس انك معزول عن العالم.
2. التكييف رائع.
3. الموتور قوي 121 حصان لما تجري بالعربية بسرعة تسمع صوت بسيط للموتور لكن صوت حلو مش وحش والتكيف لما بيشتغل ما بيأسرش علي العربية تماماً.
4. موضوع بطأ التجميع مش ملحوظة اوي غير للناس اللي غاوية شد وجري.
5. الفتيس الستبترونيك رائع.
6. المساعة الداخلية رائعة امامي وخلفي علي فكرة انا طويل وقعدت ورا 100%.
7. مساحة الشنطة تحفة.
8. توزيع السماعات رائع في العربية وعلي فكرة هي بتنزل من غير كاسيت او علي حسب المعرض اللي اشتريت منه انا ركبت كاسيت كينوود الصوت تحفة .
9.اتزان عالي جداً في الملفات مقارنة بالاوبترا والانترا.
10. لو عايزين تعرفوا اي معلومة عن العربية اتصلوا برقم 0225222222 ده خدمة العملاء في التوكيل وبصراحة ناس 100% بيقولو علي كل حاجة في العربية حتي لو عيوبها.
عيوب العربية:
1. لو نزلت العربية بجنوط كانت حاتكتسح السوق.
2. بعض الخامات في العربية مش جيدة زي فرامل اليد.
واي خدمة يا جماعة

**Hassan Khalil** · 18-06-2008 07:09 PM

ربنا يباركلك فيها ...
ان شاء الله تكتبلنا تقريرك عنها بعد 100000 كم

**SOBKY** · 18-06-2008 07:21 PM

الف مبروك يا غالي .
و ربنا يديلك خيرها و يكفيك شرها .
السيراتو انا ما جربتهاش فعلا ... بس سمعتها حلوة حتى هنا في الخليج

**SEATLOVER** · 18-06-2008 08:05 PM

الف مبروك
و ربنا يديلك خيرها و يكفيك شرها
اخبار العفشة واحساسك بالمطبات اية ؟

**fahd_628** · 18-06-2008 09:17 PM

شكرا على التقييم

**Noha.M** · 18-06-2008 10:54 PM

ميرسي على التقييم

فعلا كل اللى قلته حاسة بيه

و احب اضيف ان عفشتها مش ناشفة خااااااااالص مقارنة بالسيتي و اللانوس اللى كانت معايا و مافيش اى مقارنة تذكر ..يعني مثلا فى شارع ورانا مكسر كنت دايما لما بعدي فيه زمان كنت بتشال و اتهبد مييت مرة فى السيتي و اللنوس كمان كانت انيل لكن مع السيراتو احساس مختلف خالص

اللى مريحني كمان موووت و ابتدي يطمنى ناحية الجرى ثباتها لان من ساعة ما اللانوس لفت بيه مليون لفة و كنت هدلق من كبرى السيدة عايشة و انا بطلت اجري خااااااااااااالص لكن ما السيراتو بجد بقا مزاج عندى اجرى على ملفات كمان . مع ان خطيبي بيفضل يزعقلى و يقولى اهدي يا ماما انتى مش راكبة مرسيدس برضه

**fahd_628** · 18-06-2008 11:15 PM

اللى مريحني كمان موووت و ابتدي يطمنى ناحية الجرى ثباتها لان من ساعة ما اللانوس لفت بيه مليون لفة و كنت هدلق من كبرى السيدة عايشة و انا بطلت اجري خااااااااااااالص لكن ما السيراتو بجد بقا مزاج عندى اجرى على ملفات كمان . مع ان خطيبي بيفضل يزعقلى و يقولى اهدي يا ماما انتى مش راكبة مرسيدس برضه

اية التهور دة يا اونا :) :) :) :)

بس خدى بالك بقى

**Abohmaid** · 19-06-2008 04:40 AM

الف مبروك وربنا يباركلك فيها
بس انا ليا سؤال انت لية شغلت التكييف قبل 1000 كيلو انا لغاية دلوقتى عامل 500 كيلو ولسة ماشغلتش التكييف هوة اية الاصح اشغلة واللا لأ

**ysalah** · 19-06-2008 09:07 AM

صباح الفل علي الجميع
اولاً بالنسبة للعفشة في العربية ممتازة لان المساعدين غاز وزيت وده بيدي احساس بالراحة ويخلي الواحد ما يحسش بالمطبات عكس عربيات كتير .
ثانياً بالنسبة للتكيف ان شغلته بعد سؤال التوكيل وعرفت ان ما فيش مشكلة المهم ما تحملش العربية اكتر من اللازم بمعني انك تكون مشغل التكيف وبتشد بالعربية يعني بتزود عدد لفات الموتور مرة واحدة وده غلط كمان لازم تعرف ان العربيات دي نازلة ملينة من بلادها علشان تكون جاهزة للعمل الشاق في الشرق الاوسط وبالتالي تم تجربتها في اسوء الظروف وكمان اليومين دول الدنيا حر اوي لازم الواعد يستمتع ويحس بالفرق مش كده ولا ايه ودلع نفسك ياباشا

اونا ياريت تخلي بالك من الجري واعرفي ان ربنا سترها اةي في كوبر السيد عائشة لان ده اسوء كوبري في التاريخ